2 Bomambo 23 - Kalanga Bible (KBTP)

Josiya unomisa kuthigamigwa kwe midzimu

1 Ipapo mambo kakubunganya bakulu bose be Juda ne be Jerusalema. 2 Ngono mambo katathila ku ng'umba ya Yahwe ana bathu bose be Juda ne bagali bose be Jerusalema ne bapirisiti ne balebesambeli ne bathu bose, batukunu ne bakulu ngono kababalila matama wose e Lukwalo gwe Tjidumano gwakawang'wa mu Ng'umba ya Yahwe. 3 Mambo bakama pa phanda, bakathama tjidumano mbeli kwa Yahwe kuti banowotobela Yahwe bakabhata milayo yabo nge meya dzabo dzose nenge moyo wabo wose, kushingikadza matama e tjidumano akakwagwa mu lukwalo, ngono bathu bose bakazwisunga nge tjidumano. 4 Mambo bakalaya Hilikiya mpirisiti nkulu ne bapirisiti banontobela nge mamo ne balindi be mikoba kuti badusile kuzhe zwija zose zwakathamigwa Bhaale ne zwa Ashera ne zwe mibunga yose ye kudzimu, kazwipisila kuzhe kwe Jerusalema mu minda dze Kidironi, kasengela milota yazo ku Bhetele. 5 Kadusa bapirisiti be midzimu bakabe bashalugwa na bomambo be Juda kupisa motsha mu magalo akatuthumala ku mizi mikulu ye Juda ne yakapoteleka Jerusalema, ibabo bose bakabe bepisila Bhaale motsha, bepisila ne zhuba ne mwedzi ne nyenyedzi nenge mibunga yose ye kudzimu. 6 Kadusila ifano tja Ashera kuzhe kwe Ng'umba ya Yahwe kuzhe kwe Jerusalema katji yisa ku nkuku we Kidironi, katjipisila ku nkuku we Kidironi, ngono katjikwiya kawulusila hwuluba yatjo ku zwikumbu zwe bathu koga. 7 Kaliga ne ng'umba dze balume be fukula dze midzimu dzakabe dzili pa Ng'umba ya Yahwe, kwakabe bakadzi belukila tante dza Ashera. 8 Josiya kazhisa bapirisiti bose kudwa ku mizi yose ye Juda, katemapadza magalo wose akatuthumala akabe episigwa motsha nge bapirisiti, kudwa ku Geba kunoti ku Bheerisheba, ngono kaligila pasi magalo akatuthumala eku nkoba akabe ali ku nkoba wa Joshuwa ntungamili we nzi nkulu, akabe ali tjekulumeshwe pa nkoba we nzi nkulu. 9 Koga bapirisiti be magalo akatuthumala bakasizhe ku tjibeso tjinopisigwa zwibhayilo tja Yahwe mu Jerusalema, ngono bakaja tjiwunga tjisina mbidzo mu makamu abo. 10 Katemapadza Tofeti imu nkuku we Nkololo wa Hinomi, kuti kushete iye unopisa nkololo kene nkololokadzi uwe se tjibhayilo kuna Moleki. 11 Kadusa mbizi dzakabe dzapiwa zhuba ndi bomambo be Juda dzakabe dzili pa nkoba unoyenda ku ng'umba ya Yahwe, dzakabe dzili pa lubazhe gu pa ng'umba ye ntungamili unodang'wa Nathanimeleki. Josiya kapisa koloyi dze ngwa dzakabe dzapiwa zhuba. 12 Kaligila pasi zwibeso zwakabe zwathamiwa na bomambo be Juda zwilipezhugwi kwe denga le ng'umbana itjapezhugwi ya Ahazi ne zwibeso zwakabe zwa thamiwa na Manase mu mabazhe mabili e Ng'umba ya Yahwe, kalashila mavinga azo mu nkuku we Kidironi. 13 Mambo katemapadza magalo akatuthumala akabe ali tjeku bhezhuba kwe Jerusalema ku bunandzwa gwe Duthu le Jinyo, ilo Solomoni mambo we Iziraela akabe alibakila Ashitoreti ndzimukadzi we Basidoni na Kemoshi ndzimu unoshimika we Moabu na Moleki ndzimu unoshimika we Baamoni. 14 Josiya kapkhwanya mabgwe e thiwa, katema mapango e Ashera ngono kazhadza bugalo gwazo nge mafupa e bathu.

15 Tjibeso tjinopisigwa zwibhayilo tjakabe tjili ku Bhetele tje magalo akatuthumala akathamiwa ndi Jeroboamu nkololo wa Nebati iye wakathamisa Iziraela tjibi, tjibeso itjetjo tjinopisigwa zwibhayilo ne magalo akatuthumala kazwikolomodza. Kapisa magalo akatuthumala katjikwiya tjikasala tjili hwuluba, kapisa mapango e Ashera. 16 Ngono Josiya wakati elinga kabona zwikumbu zwakabe zwili mu dombo, katuma bathu kudusa mafupa muzwili kaapisa mu tjibeso tjinopisigwa zwibhayilo kuti tjitemapale, kuyendidzana nge dama la Yahwe lakalebgwa nge nlume we Ndzimu, iye wakalebelambeli zwithu izwezwi. 17 Ipapo mambo kabhuzwa kati, “Ibgwe le ikumbu leni landinobona?” Balume be nzi nkulu bakadabila beti, “Ikumbu tje nlume we Ndzimu wakadwa ku Juda, wakaleba zwithu izwezwi zwa wakashinga ngekwe tjibeso tjinopisigwa zwibhayilo tje Bhetele.” 18 Ngono kabe eti, “Mutjiletje, kushete unowodziyidza mafupa awe.” Ndizo bakaletja mafupa awe ne e balebesambeli bakadwa ku Samariya. 19 Josiya kadusa ng'umba dzose dzinonamatigwa dze magalo akatuthumala dzakabedzili mu mizi mikulu ye Samariya, dzakabe dzabakiwa ndi bomambo be Iziraela kulonga Yahwe bushongola, kazwikolomodza sekwa akathama ku Bhetele. 20 Josiya kabulayila bapirisiti bose be magalo akatuthumala e zwibhayilo pezhugwi kwe zwibeso, kapisila mafupa e bathu muzwili. Kabgwilila ku Jerusalema.

Nzano wekupinda pezhugwi

(2 Zwiyitikalo 35:1-19)

21 Mambo kadwa bathu bose kati, “Londolodzelani Yahwe Ndzimu wenyu Nzano we Kupinda pezhugwi sekwa kakwagwa mu Lukwalo igogo gwe Tjidumano.” 22 Ngoti akuna Nzano we Kupinda pezhugwi wakatongo londolodziwa kudwa tjose mu mazhuba e basumikilisi bakabe bakatungamila Iziraela kene mu mazhuba a bomambo be Iziraela kene bomambo be Juda, 23 koga mu gole le bugumi lina ali zhanakadzi le mbuso wa Mambo Josiya, kukathamigwa Yahwe Nzano we Kupinda pezhugwi mu Jerusalema.

Zwithu zwimwe zwakashandugwa na Josiya

24 Josiya kalobesa bakabe belebeleka ne midzimu ne baloyi ne zwifano zwe midzimu ye ng'umba ne midzimu yakabezhiwa ne zwithu zose zwinoshimisa zwakabe zwiwang'wa mu Juda ne Jerusalema, kuli kushingikadza matama e nlayo akakwagwa mu lukwalo gwakawang'wa ndi Hilikiya we mpirisiti mu Ng'umba ya Yahwe. 25 Akuna mambo wakatongo bepo unofanana naye mbeli kukwe, wakashandukila kuna Yahwe nge moyo uwe wose nenge meya dzidze dzose nenge simba lile lose, kuyendidzana ne nlayo wose wa Mushe na shule kukwe akuna wakatongo bepo unofanana naye. 26 Nenguba kwakajalo, Yahwe abazobuza kupisika kwe bushongola gwabo, gwakabe gupisikila Juda ngekwa zose zwakathamiwa na Manase ku balonga bushongola. 27 Ndizo Yahwe bakati, “Ndowodusa Juda mu mesho angu sekwa ndakadusa Iziraela, ndowolasha nzi nkulu we Jerusalema ne ng'umba ya ndakati, ‘Zina langu lowogala ko.’ ”

Bhelelo le mbuso wa Josiya

(2 Zwiyitikalo 35:20—36:1)

28 Mimwe mishingo ya Josiya na zose zwaakathama zwakakwagwa mu lukwalo gwe zwiyitikalo gwa bomambo be Juda. 29 Mu mazhuba a Josiya, Faro Neko mambo we Egipiti kayenda ku Gwizi gwe Yufuratesi ku bhatsha mambo we Asiriya. Mambo Josiya kayenda kunonshanganidza mu ngwa, Faro Neko kambona ngono kambulaya ku Megido. 30 Ngono balanda ba Josiya bakasenga itumbu tjitje mu koloyi ye ngwa kudwa ku Megido betjiyisa ku Jerusalema, ngono bakambiganyila mu ikumbu tjitje. Bathu be shango bakatola Jehoahazi nkololo wa Josiya bakanzhodza bakambiga mambo mu bumo gwa tate babe.

Jehoahazi mambo we Juda

(2 Zwiyitikalo 36:2-4)

31 Jehoahazi wakabe ana makole ali makumi mabili ana matatu (23) etangisa kubusa ngono wakabusa mimwedzi mitatu mu Jerusalema. Zina la mmeyabe liyi Hamutali nkololokadzi wa Jeremiya we Libina. 32 Kathama mbipo mu mesho a Yahwe sekwa kathama botate babe. 33 Faro Neko kanlonga mu busungwa ku Ribila mu shango ye Hamati kuti asibuse mu Jerusalema, kabigila shango tjielo tjekulipa talenta dzili zana (100) dze siliva ne talenta ye golide. 34 Ngono Faro Neko kabiga Eliyakimu nkololo wa Josiya kube mambo mu bumo gwa tate babe Josiya, kashandula zina lile kandana Jehoyakimu. Koga katola Jehoahazi kansengela ku Egipiti kwaakafila ko.

Mambo Jehoyakimu we Juda

(2 Zwiyitikalo 36:5-8)

35 Jehoyakimu kapa Faro Neko siliva ne golide, wakabe edusisa bathu be shango likhetho, ebadusisa siliva ne golide kuyendidzana na sekwa banobe balingisisiwa, kuti zwipiwe Faro Neko. 36 Jehoyakimu wakatangisa kubusa ana makole ali makumi mabili ana mashanu (25), kabusa makole ali gumi lina gole mu Jerusalema. Zina la mmeyabe liyi Zebida nkololokadzi wa Pedaiya bedwa ku Ruma. 37 Ngono kathama mbipo mu mesho a Yahwe, sekwa kathama botate babe.