Kutapiwa kwe Bhokisi le Tjidumano
1 Ngono dama la Samuele likazibgwa mu Iziraela yose. Ngono Baiziraela bakabhuda kunobhayana ne Bafilisitiya bakakubunganila ku Ebheneza, Bafilisitiya bakakubunganila ku Afeke. 2 Bafilisitiya bakalulwamisila babhayani babo kugwa ne Baiziraela, kukati ngwa ikula, Baiziraela bakakundiwa ne Bafilisitiya, bakabulaya balume bangabe zwiwulu zwili zwinna (4 000) mu magwilo. 3 Kwakati babhayani beswika ku bukotokelo, batungamili be Iziraela bakabhuzwana bakati, “Apa ini tjathama nasi kuti Yahwe batilonge mu maboko e Bafilisitiya kuti batikunde kene? Ngatiyendeni tinotola Bhokisi le Tjidumano tja Yahwe ku Shilo, kuti ndizo Yahwe bazhe babe pakati kwedu batitjidze mu simba le tjita tjedu.” 4 Ndizo kukatumwa balume ku Shilo, ngono bakanobuya ne Bhokisi le Tjidumano tja Yahwe Masimbawose, ibo bagele pakati kwe kherubhu. Bakololo ba Eli Hofuni na Finihasi, bakabe bali ipapobo ne Bhokisi le Tjidumano tje Ndzimu.
5 Kwakati Bhokisi le Tjidumano tja Yahwe liswika mu bukotokelo, Baiziraela bose bakamimila nge nsindo usinshoma, shango ikaduma. 6 Kwakati Bafilisitiya behwa zhoba ye mima, bakabhuzwana bakati, “Mima iyeyi ingapa nge yeni mu bukotokelo gwe Bahebheru kene?” Bakati basinoziba kuti Bhokisi le Tjidumano tja Yahwe lazha mu bushanganilo, 7 Bafilisitiya bakapaluka moyo, ngobe bakati, “Ndzimu wazha mu bushanganilo.” Bakadwilila beti, “Yee mme wee, tapalala! Tjinga kwatakazwagwa akuthu kukashingikala kwakajali. 8 Yee mme wee tapalala! Apa ndiani ungatigwila mu simba le midzimu iyeyi yakasima zwingapa kene? Ndiyo midzimu yakabulaya Baegipiti nge mbatsha dzakasiyana siyana mu tjilambanyika. 9 Ibeni nge tjilopa Bafilisitiya, mubhayane se balume, musitongodwa mube balanda be Bahebheru, sekwa bagala bali balanda benyu. Mubhayane se balume.” 10 Ndizo Bafilisitiya bakabhayana, Baiziraela bakakundiwa, bakatizha, mmwe ne mmwe katizhila ku nzi uwe. Kwakafiwa kukulu kwazo, Iziraela yakalashikigwa nge babhayani be makumbo bali zwiwulu zwili makumi matatu (30 000). 11 Bhokisi le Tjidumano tje Ndzimu likatapiwa, bakololo ba Eli Hofuni na Finihasi bakafa nge bubili.
Lufu gwa Eli
12 Nlume we Nbhenjamini kalabuka kudwa ku magwilo, kanolala aswika ku Shilo, akazwipalulila zwiambalo, azwidila mavu mu nsholo. 13 Kwakati eswika, Eli wakabe aligele pa tjigalo tjitje pa zila akalinga zila, ngobe wakabe akadziyidzika ngekwe Bhokisi le Tjidumano tje Ndzimu. Ngono nlume iwoyo kati eswika mu nzi, kati eandamisa thawu, nzi wose ukadila guwo. 14 Kwakati Eli ehwa guwo, kabhuzwa kati, “Yeli guwo lingapa ngeleni kene?” Ipapo nlume iwoyo kazha tjinyolotjo, kabudza Eli. 15 Eli wakabe atjikwegula makole awe abe makumi ali zhanalume lina makole ali zhanakadzi (98) mesho awe atjipofupala asingatjabone. 16 Nlume iwoyu wakadwa Eli kati, “Ndimi ndadwa ku ngwa, ndatizha ku ngwa nasi.”
Eli kabhuzwa kati, “Apa kutjani koga ikweno nkololo wangu?”
17 Ntuli we thawu kashandula eti, “Baiziraela bakundiwa nge Bafilisitiya, ngono kwabe ne kufa kukulu kwazo kwe babhayani, nenge bakololo benyu Hofuni na Finihasi bafabo. Bhokisi le Tjidumano tje Ndzimu nailobo latapiwa.” 18 Wakati eleba ngekwe Bhokisi le Tjidumano tje Ndzimu, Eli kakudubhuka mu tjigalo tjitje kanowa nge itiko pa hwunde ne nkoba, ngono kavunika ntshibha kafa, ngobe wakabe akakwegula kakale ana mbili. Eli wakabe ana makole ali makumi manna (40) ali ntungamili we Iziraela.
Lufu gwe nkadzi wa Finihasi
19 Nlongo wa Eli nkadzi wa Finihasi, wakabe atjikuligwa abe pejo ngotshibama. Wakati ehwa thawu dze kuti Bhokisi le Tjidumano tje Ndzimu lakatapiwa ne kuti tezwale babe ne nlume uwe bafa, ipapo koga kangina mu zwibhayo ngono zwibhayo zwikankulila katshibama, 20 koga wakabe atjipelegwa abe pejo ngofa, batshibamisi bakandwa bakati, “Usitje, ngobe wawana mwana we tjilume.” Koga kasibadabile nenguba kuli kube ne hanya. 21 Katumila mbisana zina linoyi Ikabhodi, edwa kuti, “Gudzo lafuluka mu Iziraela,” ngekuti Bhokisi le Tjidumano tje Ndzimu lakabe latapiwa nenge kwe lufu gwa tezwale babe ne nlume uwe. 22 Kabe eti, “Gudzo lafuluka mu Iziraela, ngobe Bhokisi le Tjidumano tje Ndzimu latapiwa.”
© Kalanga Bible © Bible Society of Botswana, 2008, 2018.