Mu Malita
1 Tikati tatjila tabe mu phili tikaziba kuti tjigwizi itjetjo tjodang'wa kuyi Malita. 2 Bathu banogala mutjili bakabe ne buthu mutili gusakawolobeleka. Bakabesa moto, ngono bakatiamutjila, ngobe vula yakabe ina, ngono kupota. 3 Paulo kakubunganya fukatigwa le hwunyana, ngono kati edzilonga mu moto nyoka ikabhuda mudzili ngopisa kwe moto, ikazwipombedza mu luboko gugwe. 4 Kukati bagali be tjigwizi bebona nyoka yakalembeleka mu luboko gugwe, bakalebeleka tje kwabo beti, “Nlume iwoyu wakafanila ali mbulayi; ngobe nenguba atjila mu gungwa, ndulamo aitoduma kuti atjile.” 5 Koga Paulo kashashamulila nyoka mu moto, ikabe isanhwisa zogwadza. 6 Bathu bakabe beti pamwe unowozwimba kene kawa kafa, koga kukati balinda tjibaka tjilefu bakabona kusina tjimwe tjipoga tjanshingikalila, bakashandula mikumbulo yabo, ngono bakati ndzimu!
7 Kwakabe kuna minda pejo ili ya Pabhuliyo, nkulu we tjigwizi. Wakatiamutjila katibhata nge buthu mazhuba matatu. 8 Tate babe bakabe begwala bali lele begwala bugwele gwe luzhazhamo ne ntumbu we mashaba. Paulo kangina kubabona ngono kati atembezela kabiga maboko pezhugwi kwabo kabapodza. 9 Kukati ikoku kwashingikala bose be bagwele mu tjigwizi bakazha, ngono bakapodziwa. 10 Bakatikudza nge zila njinji, ngono tikati tazwilulwamisila kuyenda nge gungwa, bakatipa zwatinosheta.
Kudwa mu Malita kunoti Roma
11 Shule kwe mimwedzi mitatu tikayenda nge gungwa tili mu ikepe tjakabe tjapitshila mbaba mu tjigwizi itjetjo. Tjakabe tjili ikepe tje Alekizanda tjina ifano tje midzimu ye “Mabili Kasito na Polukisi.” 12 Takama pa Sirakusi tikagalapo mazhuba matatu. 13 Kudwa ikoko tikayenda nge ikepe, ngono tikanoswika ku Regiyo. Tjimuka phepo ye burwa ikazha, mu zhuba linotobela tikaswika ku Puteoli. 14 Ikoko takawana zwimwe zwikamu zwakatikumbila kupitsha tshipi ing'ompela nazo. Ipapoke tikayenda ku Roma. 15 Zwikamu ikoko zwakahwa kuti tozha. Ndizo zwakayenda kunoti ku Lubazhe gwe Apiyo ne ku Ng'umba thatu dze Bayendi. Ndizo Paulo kati ebona zwikamu kakulumbidzika kaboka Ndzimu.
Mu Roma
16 Takati tiswika ku Roma, Paulo kadumigwa kugala ega, ana mbhayani kuntjengeta.
17 Shule kwe mazhuba matatu kakubunganya batungamili be Bajuta. Bakati bakubungana Paulo kati ku bali, “Zwikamu zwangu, nenguba kusina tjandakatjinya ku bathu ba kanyi kwedu kene kunyanyayidzana ne mipanga yabo batategulu bedu, ndakasungwa mu Jerusalema ayisiwa ku Baroma. 18 Bakati bandibhuzwisisa, ngono bakayemula kundisunungula, ngobe ndakabe ndisina nlandu wakalizana lufu. 19 Koga Bajuta bakati belamba, akombeledzeka kuti ndipindile kuna Kaisara kusi kuti ndina tjimwe tjandinotjeta bathu ba kanyi kwangu nditjo. 20 Ngekwa ikoku ndakumbila kumubona kulebeleka namwi. Ndakasungwa nge ketani iyeyi ngekwe kugalabgwe kwe Iziraela.”
21 Bakadabila beti, “Atizowana hwalo dzinodwa ku Judiya nge kuko kakale akuna ikamu tjakadwa ikoko tjakabika kene tjikaleba tjimwe tjakabipa nge kuko. 22 Koga toshaka kuhwa kuti nkumbulo uwo ini, ngobe toziba kuti bathu kumwe ne kumwe banolebeleka kunyanyayidzana ne bhiko ileli.”
23 Bakati babigila Paulo zhuba bakazha bali banji ku bugalo gwaakabe egala. Kudwa mangwanana kunoti madekwana, wakatjenesa kaleba ku bali bushe gwe Ndzimu, ngono kagwisa kubagadzamoyo ngekwa Jesu kudwa mu nlayo wa Mushe ne mu hwalo dze balebesambeli. 24 Bamwe bakagalamoyo tjaanoleba koga bamwe bakasigalemoyo. 25 Bakanyanyayidzana tje kwabo, ngono bakatangisa kuyenda Paulo asinoleba ndebo inoti: “Meya yakayengemala yakaleba malebeswa kuna bobatategulu benyu payakati ndi Isaya nlebesambeli,
26 “ ‘Yenda ku bathu ibaba uti:
Nge lebeswa mowohwa koga mukasihwisise,
kakale nge lebeswa mowobona koga mukasibonesese,
27 ngobe moyo ye bathu ibaba mikukutu;
zebe dzabo dzakati tshi,
mesho abo akavululata.
Bangadwa bebona nge mesho abo,
bakahwa nge zebe dzabo
bakapedzisisa nge mimoyo yabo
bakashanduka
ndizo abapodza.’
28 “Ndizo zibani kuti jidzo ileli le Ndzimu lakazhisigwa Bezwitjaba, ngono banowohwilila!” [29 Kukati aleba ikoku, Bajuta bakayenda bekakabadzana tje kwabo.]
30 Makole mabili wose azhele Paulo kagala ipapo mu ng'umba yaakabe ezwilipila, kaamutjila bose bakabe bezha kuwombona, 31 esumikila bushe gwe Ndzimu kakale ediya ngekwa She Jesu Kirisiti akashaladuka kusina tjinondzibilidza.
© Kalanga Bible © Bible Society of Botswana, 2008, 2018.