Mishingo ye bagalimoyo
1 Usitjemele nthuntana nge bushongola, koga unkulumbidze se unokulumbidza tate babo, ubhate balume batjetjana pakuli se banung'una babo, 2 bakadzi bahwola ubatole sa bomme yabo, bakadzi batjetjana pakuli, ibo se hazwadzi dzidzo nge bubuyanana gwakapelela.
3 Teta nge kwakafanila tjilikadzi dzinosheta dumbu. 4 Koga ha tjilikadzi ina bana kene bana be bana, bakafanila kuti bazwidiye kutanga kuti balakidze bakanyi kwabo zila yekunamata ne kutenda bazwadzi babo, ngobe ikoku koshathisa Ndzimu. 5 Tjilikadzi inodziyila dumbu ngono ili yoga koga, inogalabgwe mu Ndzimu, idwilila mbeli siku ne sikati kutembezela ne kukumbila bhatsho ku Ndzimu; 6 Koga tjilikadzi inotjilila nzipo yakafa nenguba itjila. 7 Ubabudze ikoku, kuti kusibe ne wabo unobong'wa nlandu. 8 Ha mmwe asingatjengete hama dzidze, kwazo kwazo be nsha uwe, wazwilandula kugalamoyo kakale mbiimbi kupinda nthu usingagalemoyo.
9 Kushete tjilikadzi yakwalisiwa kuzhe kwe ina makole anopinda makumi matathatu nenge kuti ibe yakalobogwa kang'ompela, 10 kakale izibgwa zubuyanana nge mishingo iye yakalulwama, inonga kulela bana nge fanilo ne kuamutjila bezi, kakale yakazwimisila kuzwiyisa pasi kungudza makumbo e bayengemali, ba mu manikano ne kuzwipa mu mishingo yose yakanaka.
11 Usitongo kwalisa tjilikadzi tjetjana, ngobe njemulo dzadzo dzingadzikulila mu kuzwipa kwabo muna Kirisiti, dzikashaka kulobogwa, 12 ndizo dzikazwiwanisa nlandu dzikalobgwa nge Ndzimu, ngobe dzisalondolodza tjadzakazwimisila itjo kutanga. 13 Kuzhe kwa ikoko dzozwiwolobedza kutjinya tjibaka nge kutendeleka mu mizi ngono adzitobe dzitjinya tjibaka koga, dzoyenda dzileba shaya dzakanginikana ne zwisi zwadzo dzileba zwadzisakafanila leba. 14 Ndizo ndokulumbidza tjilikadzi tjetjana kuti dzilobogwe, dzibe ne bana, dziyendise misha yadzo ne kusapa tjita tjibaka kutitjinya mazina. 15 Ngobe dzimwe dzakalashika dzikatobela Satani. 16 Ha mmwe nkadzi unobe ali n'galimoyo ana makamu e tjilikadzi mu nzi uwe, wakafanila kubabhatsha asingaletje gubungano kulemegwa ndibo kuti ndizo gubungano libhatshe ibabo banodziyila kupinda.
17 Bakulu banotungamila gubungano zubuyanana, bakafanigwa nge kulipiwa kabili, kwazo kwazo ibabo banoshinga kwazo mu kusumikila nenge kudiya. 18 Ngobe hwalo dzoti, “Usisunge ng'ombe nlomo ha ishokola mathunde.” Kakale “Nshingi wakafanigwa nge ndipo iye.” 19 Usiamutjile kubong'wa nlandu kwe nkulu we gubungano kuzhe kwekwazhisiwa batendeki babili kene batatu. 20 Ibabo banodwilila ngotjinya ubatjemele mbeli kwe bathu, kuti ndizo bamwebo batjenjele.
21 Ndokulaya mbeli kwe Ndzimu na Kirisiti Jesu ne batumwa be kudzimu bakayengemala kulondolodza milayo iyeyi kuzhe kwe kumila mmwe, kakale kusathama tjimwe nge kushalaula. 22 Usilibilidzile kubiga bathu maboko kene kube ne gobe mu tjibi tjemmwe. Gala uli mbuyanana.
23 Using'we vula koga, ung'webo nkumbi we zhambi ntukununu kubhatsha kushinga kwe ntumbu uwo se ugala ugwala koga wali.
24 Zwibi zwe bamwe bathu zwipatjena, kakale zotungamilila kunosumikilisiwa kubatangila, koga zwibi zwe bamwe bathu zobong'wa shule. 25 Sa ikoko mishingo mibuya ipatjena, na iyeyo isipatjena aingagale yakasumbikala.
© Kalanga Bible © Bible Society of Botswana, 2008, 2018.