Kuthukila kwe Baasiriya
1 Yahwe bakati kundili, “Tola tjikwalilo tjikulu ukwale nge peni uti, ‘Kulibilidza kutapa, Kutolela tjinyolotjo.’ 2 Ngono atola batendeki bangu banogalikamoyo Uriya mpirisiti na Zekariya nkololo wa Jeberekiya.”
3 Ngono angina ku nkadzi wangu we nlebesambeli ngono kazwisenga katshibama mwana we tjiyisana. Yahwe bakandidwa bakati, “Untumile zina uti Maheri Shalali Hashi Bhazi. 4 Ngoti kowoti mbisana ihwoyu asathu kaziba kuti, ‘Tate bangu’ kene ‘Mme bangu,’ fumwa ye Damasiko ne thundu yatapiwa ye Samariya ikasengwa ndi mambo we Asiriya.”
5 Yahwe bakalebeleka nami kakale ngono bakati, 6 “Ngoti bathu ibaba bakalamba vula ye Shiloa inowunga ngotebama, ngono bakashathila Rezini ne nkololo wa Remaliya, 7 ndizo bona, Yahwe banozhisa mikubila yakasima ye Gwizi gwe Yufuratesi. Mambo we Asiriya ne simba lile lose. Gowozhadza hwobana dzago dzose vula ikabuya ikatebukila kuzhe kwe phili dzadzo. 8 Gowowunga gutebukila mu Juda vula ikula kwayinomila nthu pa ntshibha. Gowowunga gukafukidza bupabi gwe shango iyo, iwe Imanuwele.”
9 Ibeni ne nshanganyila imwi bathu, koga mowopaladziwa!
Hwililani imwi be shango dzikule.
Muzwilulwamisileni ngwa, mutemeke mafupa.
Lulwamisilani ngwa mutemeke mafupa!
10 Thamani ndongoloso dzenyu, koga adzingamudwile tjimwe.
Thamani ndongoloso dzenyu, koga akutowomudwila nge tjimwe,
ngoti Ndzimu unaswi.
11 Ngoti Yahwe bakalebeleka nami nge masimba benditjemela beti ndisitongoyenda mu zila ye bathu ibaba, bakati, 12 “Usitongotola tjimwe ne tjimwe bathu ibaba tjabanoti nshanganyila we bupanduki uti nshanganyila, ne tjabanotja usitongolobgwa nge ana. 13 Yahwe Masimbawose ndibo bawakafanila tola bakayengemala, ndibo bawakafanila utje, babe ibo bauna ana nabo. 14 Banowobe bugalo gwakayengemala, ku ng'umba idzedzi mbili dze Iziraela bakabe bgwe linokutha bathu, shongwe inothama kuti bawe. Ku bathu be Jerusalema banowobe silaha ne bhuzhu. 15 Bunji gwabo gowokuthiwa gukawa gukavunika, banoteyiwa bakabhatshigwa.”
16 Sungila butendeki utjwayile nlayo mu badiyiwana bangu. 17 Ndowolindila Yahwe, ibo bakasumbikila nsha wa Jakubo buso gwabo, ngono ndowobagalabgwe. 18 Imi ndipano ne bana bandakapiwa ndi Yahwe. Ti zwilakidzo ne batjenesi mu Iziraela kudwa kuna Yahwe Masimbawose, ibo banogala mu Dombo le Ziyoni.
19 Ha bathu beti bhuzwani ng'anga ne baloyi banonyebezela be mbumburudza, apa bathu abangabhuzwe Ndzimu wabo kene? Apa kungabhuzwiwa bafi ngekwe banotjila kene?
20 Ngakuyendiwe ku nlayo ne ku butendeki. Ha basingalebe tjinoyendidzana ne dama ileli abana tjedza.
21 Banowoyendayenda mu shango bali mu buyendasi bukulu bana zhala, banowoti bafa ne zhala bakagwadza moyo bakalinga pezhugwi bakatuka mambo wabo ne Ndzimu wabo. 22 Banowolinga pasi bakabona buyendasi koga ne zhalima ne tjimo tjinotjisa, ngono banowolashigwa mu zhalima lakati zwititi.
© Kalanga Bible © Bible Society of Botswana, 2008, 2018.