Nsungo unolizanya
1 Ndakati ndimilidza mesho abona nlume akabhata nsungo unolizanya. 2 Ngono Ambhuzwa ati, “Unoyenda ngayi?” Kashandula kati, “Kunolizanya Jerusalema, kubona kuti ingabe bulefu gungapani ne kuti ingabe ne bupabi gungapani.” 3 Ngono ntumwa we Kudzimu wabe elebeleka nami kasedzela mbeli ngono kukazha mmwe ntumwa kuwon'shangamidza, 4 kandwa kati, “Labuka! Kadwe nzhuzha iwowuje uti, ‘Jerusalema inowogagwa se nzi usina makuma, inowozhala bathu basi bashoma ne ng'ombe dzisishoma muuli. 5 Ngobe imi nge kwangu ndowobe guma le moto kubakilila, ngono unowobe tjedza mukati kwawo.’ ”
Koleba Yahwe.6 “Tizhani! Tizhani! Tizhani ikoko imwi baku shango ye bunandzwa.”
Koleba Yahwe.“Ngoti ndakamupaladza se phepo nna dze zhuzhugwi.”
Koleba Yahwe.7 “Tizhani kaa Ziyoni! Imwi munogala ne bakololokadzi be Bhabhiloni. 8 Ngobe Yahwe Masimbawose bakati, Ngotjengeta gudzo labo banditumila ku zwitjaba zwakamutapa, ngoti iye unomunginilila unobe abhata shanga ye zhisho lile. 9 Bonani ndimi ndinowomugwila, ngono banowotapiwa ndi ibabo bakabe bali balanda babo. Ipapo mowoziba kuti Yahwe Masimbawose ndibo bandituma.
Magalo e Ndzimu
10 “Imba kaa iwe nkololokadzi we Ziyoni, bona ndobuya ngono ndowogala pakati kwenyu.”
Koleba Yahwe.11 Ngono zwitjaba zwinjinji zowobhatana na Yahwe mu zhuba ilelo ngono banowobe bathu bangu ngono nami ndowogala pakati kwenyu, ndizo mowoziba kuti Yahwe Masimbawose bandituma ku muli. 12 Ngono Yahwe banowotola Juda kube gwamu labo mu shango yakayengemala ngono ndoshalula Jerusalema kakale. 13 Muti hwu, mmwe ne mmwe wenyu mbeli kwa Yahwe, ngobe bamilika mu magalo abo akayengemala.
© Kalanga Bible © Bible Society of Botswana, 2008, 2018.