Shamu inoloba Iziraela
1 Usishathe iwe Iziraela!
Usishongozhele se dzimwe njudzi.
Kana wakafupatila Ndzimu uwo,
unoda mbhayilo we bufukula
pa lutombo gumwe ne gumwe.
2 Lutombo ne maswinilo e nkumbi we zhambi azwingajise bathu,
nkumbi ntshwa unowopela.
3 Abatowogala mu shango ya Yahwe,
Ifureimi unowobgwilila ku Egipiti,
ngono mu Asiriya banowoja zojiwa zwakatemapala.
4 Abatowotebulila Yahwe tjing'o tje nkumbi we zhambi,
naiko zwibhayilo zwabo azwingashathise Yahwe.
Zwibhayilo zwakajali zonga zojiwa zwe tjililo,
bose banozwija banowotemapala.
Zojiwa izwezwi nge zwabo koga,
azwitowongina mu ng'umba ya Yahwe.
5 Mowothamani mu zhuba le mizano yenyu yakabigwa,
nenge mu zhuba le nzano wa Yahwe?
6 Ngoti nenguba bangaleya golomodzo,
Egipiti inowobakubunganya,
ngono Memifisi unowobatshila.
Kungubo tjowomela pabakabiga fumwa yabo ye siliva,
kowomela mihwa mu mishasha yabo.
7 Mazhuba ekulobgwa shamu atjiswika,
mazhuba ekupa mbhayilo wakalingisana atjiswika.
Iziraela inowoziba ikoku!
Nlebesambeli tjilengwe, nlume we meya unopenga
ngekwe jinyo lenyu gulu ne lubengo gwenyu bukulu.
8 Nlebesambeli ntjengeti wa Ifureimi
etjengetela Ndzimu,
koga matati e nteyi mu zila dzidze dzose
ne lubengo gumu ng'umba ye Ndzimu uwe.
9 Bakanyungila mu mbipo
se mu mazhuba e Gibiya.
Ndzimu banowokumbula bubi gwabo
ngono bakabalobela zwibi zwabo.
10 Iziraela ndakati ndiyiwana,
yakabe inga nzhambi we tjilambanyika.
Ndakati ndibona bobatategulu benyu,
angandinobona phaya dzabidwa kutanga mu mpaya
nge tjibaka tjadzo kutanga.
Koga bakati beswika pana Bhaale we Pheori,
bakazwipa mu ndzimu ihwoyu we ifano unobhatisa shoni
bakasala be shimika saikoku kuthu kwabakada.
11 Gudzo la Ifureimi lowowuluka se nyuni,
akutowobe ne kutshibama kene kuzwisenga.
12 Nenguba bangalela bana,
ndowobulaya kukasiite wasala.
Yee mme wee bapalala,
ha ndibafupatila!
13 Ndakabona Ifureimi efanana ne Tire,
akadzwagwa mu magalo akanaka.
Koga Ifureimi banowozwalila bana babo
kubulawa.
14 Yahwe, mubape,
mowobapani kene?
Mubapeni zwibumbilo zwinowosheta,
ne mazhamu asina gwamu.
Yahwe banosumikilisa Iziraela
15 Bubi gwabo gose gwakatangisa ku Giligala,
ndiko kwandakatangisa kubabenga ikweno.
Ngoti ngekwe mishingo yabo mibiibi,
ndowobatatila kuzhe kwe ng'umba yangu.
Andingatjabade nge tjimwe tjibaka,
batungamili babo bose bapanduki.
16 Ifureimi wakajiwa ndi pongwe,
midzi yabo yakawoma,
abana mitjelo yabanodusa.
Nenguba betshibama bana,
ndowobabulaya kene bedika zwabo ku bali.
17 Ndzimu wangu unowobalamba,
se basakandihwilila,
banowobe bapalali pakati kwe njudzi.
© Kalanga Bible © Bible Society of Botswana, 2008, 2018.