Lumbo gwe kukudza
1 Mambo banoshathila masimba enyu Yahwe
banoshatha kwazo nge bhatsho yenyu!
2 Makabapa yemula dze moyo wabo,
amuzolamba nge tjabakakumbila nge nlomo wabo.
3 Mobaamutjila nge makombolelo anodika,
mobiga tjiala tje golide yakatjena mu nsholo wabo.
4 Bakakumbila butjilo mukabapa igo,
mukabapa mazhuba manjinji nge kusingapele.
5 Bhatsho yamakabapa yakabazhisila gudzo gulu,
makabapa bubuya ne tjilumbi.
6 Ee, ndimwi makathama kuti
bakombolegwe nge kusingapele,
mobashathisa nge kubeyapo kwenyu misi yose.
7 Mambo banogalabgwe muna Yahwe,
nge ludo gusingazunguzike
gwe Upezhugwi zhugwi abangazunguziwe.
8 Tjiazha tjenyu tjowobhata zwita zwenyu zose,
tjiazha tjenyu tje luji tjowobawana banomubenga.
9 Mowobathama bibi le moto,
nsi wabanowoboneka.
Yahwe banowobalobesa nge bushongola gwabo,
ngono moto unowobaja.
10 Mowolobesa ludzi gwabo mu shango,
ne bana babo mowobalobesa
pakati kwe bakololo be bathu.
11 Ha belangana tjakabipa nge kwenyu,
ha be bumba nkumbulo wakabipa, abatowotubula.
12 Banowomutizha,
ha mubatendeka nge misebe enyu.
13 Kudziwani Yahwe nge masimba enyu!
Towomba tikakudza masimba enyu.
© Kalanga Bible © Bible Society of Botswana, 2008, 2018.