Kulilila Faro ne Egipiti
1 Mu gole le bugumi lina makole mabili, mu mwedzi we bugumi lina mimwedzi mibili, mu zhuba le kutanga le mwedzi dama la Yahwe lakazha ku ndili liti, 2 “Nkololo we nthu, lilila Faro mambo we Egipiti uti kunli,
“ ‘Unozwitola se shumba pakati kwe njudzi
koga iwe unonga bhukanana mu makungwa,
unodzonga hwobana dzidzo,
unodzonga vula nge makumbo awo,
hwobana dzidzo unodzithama madzongwe.
3 “ ‘Ndizo Yahwe bakati,
“ ‘Nge mbunga we bathu banjinji
ndowokutandila nge gwanga gwangu
ngono banowokukweba nge gwanga gwangu.
4 Ndowokuposela mu shango
akuposela pa lenje.
Ngono ndowoletja nyuni dzose dze phepo dzigala pezhugwi kuko
ne phuka dzose dze shango yose dzikuje dzigute.
5 Ndowopaladzila nyama ye mbili uwo pezhugwi kwe matombo
ngono azhadza mikuku nge itumbu tjitjo.
6 Ndowonyolodza shango nge malopa awo anowunga
kunoti ku matombo
ne munowunga vula kowozhala iwe.
7 Ndowoti ndikudzima, ndowozwimba mazhuzhugwi
atundubadza nyenyedzi,
ndowozwimba zhuba nge gole,
mwedzi naiwo unowoti zwititi.
8 Zwedza zose zwe zhuzhugwi
ndowokuzwitundubadzila
azwimba shango iyo nge zhalima,
kojalo Yahwe.
9 “ ‘Ndowodziyidza moyo ye bathu banjinji
pandinowozhisa kulobesiwa kuko pakati kwe njudzi
mu shango dzausakatongo ziba.
10 Ndowothama kuti bathu banjinji bakukaabalile
bomambo babo banowotetema betja nge kuko
andizunguza thumo langu mbeli kwabo.
Mu zhuba le kuwa kuko
mmwe ne mmwe wabo unowotetema tjibaka tjose
etja ngekwe butjilo gugwe.
11 “ ‘Ngoti She Yahwe bakati,
“ ‘Thumo la mambo we Bhabhiloni
lowobhayana nawe.
12 Ndowothama makoko awo kuti aligwe
nge mathumo e bakasima
bose babo bali njudzi dzakabangalala mu njudzi.
Banowopedza kuzwida kwe Egipiti
ngono makoko ayo wose anowoloba.
13 Ndowobulaya zwithuwo zwayo zose
kudwa pamwe ne pamwe pana vula njinji
ngono akutowobe kutjina gumbo le nthu linowobe litja idzonga
kene thozo ye ng'ombe ingaidzonga.
14 Ipapo ndowoyengemadza vula yabo
ngono athama hwobana dzabo dzikawunga se mafuta,
kojalo She Yahwe.
15 Ndowoti ndithukudza shango ye Egipiti
ne panowobe shango yatolegwa kose kumu ili
ha nditemela pasi bose banogala muili,
ipapo banowoziba kuti ndimi Yahwe.’
16 “Igogu lumbo gwe tjililo, gowombiwa.
Bakadzi be njudzi banowogumba.
Gowombigwa Egipiti ne makoko ayo wose,
kojalo She Yahwe.”
Kulilila Egipiti
17 Mu gole le bugumi lina makole mabili, mu mwedzi we kutanga, mu zhuba le bugumi lina mazhuba mashanu le mwedzi, dama la Yahwe lakazha kundili liti, 18 “Nkololo we nthu lilila makoko e Egipiti ngono ubayise pasi ne Egipiti ne bakololokadzi be njudzi hwulu nge mamo, ku shango pasi pasi naibabo banongina pasi mu gomba.
19 “ ‘Ndiwupi waunopinda nge bubuya kene?
Ngina pasi ulale ne basakathumbigwa.’
20 “Banowowila pakati kwaibabo babulawa nge thumo, thumo lalulwamisiwa, ngaakwebegwe kutjena ne makoko awe.
21 “Kudwa mu ikumbu batungamili bakasima banowolebeleka nge kwe Egipiti beti, ‘Babuya pasi ngono balele ne basakathumbigwa, balele naibabo bakabulawa nge thumo.’
22 “ ‘Asiriya iipapobo ne ngwa yayo yose, zwikumbu zwayo zwakaipoteleka, bose bakabulawa, bose bakaligwa nge thumo. 23 Zwikumbu zwabo zwimukatikati kwe gomba. Bose bakabe betjisa mu shango ye banotjila bakabulawa, bakaligwa nge thumo.
24 “ ‘Elamu iipapobo ne ngwa yayo yose kupoteleka ikumbu tjayo. Bose bakabulawa, bakaligwa nge thumo. Bose bakabe betjisa mu shango ye banotjila bakangina pasi basakathumbigwa mu shango i pasi pasi. Bakasengana ne shoni dzabo naibabo banongina pasi mu gomba. 25 Bakathamila Elamu bulalo pakati kwe bakabulawa ne makoko awe wose akapoteleka ikumbu tjitje. Bose nge basakathumbigwa, bakabulawa nge thumo. Nge kuti kutjisa kwabo kwakabe kwakula mu shango ye banotjila, banosengana ne shoni dzabo naibabo banongina pasi mu gomba, bakabigwa pakati kwe bakabulawa.
26 “ ‘Mesheki na Tubali baipapobo ne makoko abo wose kupoteleka zwikumbu zwabo. Bose nge basakathumba, bakabulawa nge thumo nge kuti bakazhisa kutja mu shango ye banotjila. 27 Apa abatelilele ne bamwe babhayani basakathumbigwa kene, bakangina mu zwikumbu zwabo ne zwibhayano zwe ngwa, ibo bakati mathumo abo bakaasazamidziwa? Shamu inobalobela zwibi zwabo imu mafupa abo, nenguba kutjisa kwe babhayani ibaba kwakati kukaandama nge shango ye banotjila. 28 Ndizo nawebo unowolala wakavunikana pakati kwe basakathumbigwa naibabo bakabulawa nge thumo.
29 “ ‘Edomu iipapobo na bomambo bayo ne makombgwa ayo wose, kusingati tjimwe kuti bakabe bakasima kungapani, bakabigwa naibabo bakabulawa nge thumo. Balele ne basakathumbigwa naibabo banongina pasi mu gomba.
30 “ ‘Makombgwa wose e bunandzwa ne Basidoni baipapobo, bakangina pasi kunobhatisa shoni kuna bakabulawa, balele basakathumbigwa naibabo bakabulawa nge thumo, banosengana ne shoni dzabo naibabo banongina pasi mu gomba.
31 “ ‘Kowoti Faro ne ngwa iye yose be babona unowonyaladzika ngekwe makoko awe wose, Faro ne ngwa iye yose, bakabulawa nge thumo, kojalo She Yahwe. 32 Kana wakazhisa kutja mu shango ye banotjila, ndizo Faro ne makoko awe unowobiganyiwa pakati kwe basakathumbigwa naibabo bakabulawa nge thumo, kojalo She Yahwe.’ ”
© Kalanga Bible © Bible Society of Botswana, 2008, 2018.