Mishingo ye bapirisiti ne Balevi
1 Yahwe bakadwa Aroni bakati, “Iwe ne bakololo babo ne be ng'umba ya tate babo, mowosenga milandu inowobepo mu bugalo gwakayengemala. Kakale iwe ne bakololo babo mowosenga milandu inowobepo mu nshingo we bupirisiti. 2 Tola bana ba tate babo, ludzi gwa Levi, ludzi gwa tate babo, kuti bashangane namwi, bamubhatshe iwe ne bakololo babo ha mushinga mu nshasha we bushanganilo. 3 Bakubhatshe ubone kuti banothama ne mishingo yose ye nshasha, koga basingasedzele pejo ne zwija zwe bugalo gwayengemala kene ku tjibeso tjinopisigwa zwibhayilo, abangasedzela banowofa kose namwi. 4 Bashangane namwi, kakale bashinge mu nshasha we bushanganilo, mu mishingo yose ye nshasha, ngono kusibe ne mmwe upoga ungasedzela pejo namwi. 5 Ngono imwi mowotjengeta mishingo ye bugalo gwakayengemala ne mishingo ye tjibeso tjinopisigwa zwibhayilo, kuti kusibe ne bushongola gwangu kakale mu bathu be Iziraela. 6 Bona, ndimi ndatola bana ba tate babo Balevi mu bathu be Iziraela, mabapiwa, bepiwa Yahwe, kushinga nshingo we nshasha we bushanganilo. 7 Ngono iwe ne bakololo babo ndimwi munowoshinga bupirisiti gwenyu pa tjibeso tjinopisigwa zwibhayilo mukati kwe tjisitilo. Ndomupa bupirisiti ili tjipo, ngono mmwe upoga unowogwisa kuthama nshingo iwoyu abulawe.”
Gobe le bapirisiti
8 Yahwe bakadwa Aroni bakati, “Bona, ndakupa tjimwe ne tjimwe tjasala mu zwipo zwandathamigwa. Zwithu zose zwakayengemala zwe bathu be Iziraela, ndakupa izo kube gobe lilo ne bakololo babo nge kusingapele. 9 Zwinowobe zwizo mu zwithu zwakayengemala kwazo ndi yezwi, zwipo zwisapisiwa mu tjibeso, zwipo zwabo zose, kungadwa kuli tjipo tje mathunde ne tjibhayilo tje tjibi kene ne tjibhayilo tje nlandu, zose izwezwi nge zwizo ne bana babo. 10 Zwithu izwezwi uzwijile mu bugalo gwakayengemala, zwijiwe nge balume koga, kowobe kwakayengemala ku kuli.
11 “Itjetjibo nge tjitjo: ntezho mmwe ne mmwe Baiziraela wabakadusa bendipa nge uwo. Zwipo zose zwinozunguziwa zwe bathu be Iziraela, ndakupa izo, iwe ne bakololo ne bakololokadzi babo nge kusingapele. Mmwe ne mmwe umu ng'umba iyo wakatjenapala ungazwija.
12 “Kose kwakanaka kwe zwitshwa zwe kutanga mu minda, nkumbi we zhambi, mathunde, ne mafuta e mitjelo ye mitoba, zwandinodusigwa nge Baiziraela, ndokupa izo. 13 Zwitshwa zwe minda yabo zwinobidwa kutanga zwabanozhisila Yahwe, zowobe zwizo. Mmwe ne mmwe umu ng'umba iyo wakatjenapala ungazwija.
14 “Tjimwe ne tjimwe tjakapiwa Yahwe mu Iziraela tjowobe tjitjo.
15 “Mbano dzose dze bathu ne zwithuwo zwe kutanga zwabanopa Yahwe, zowobe zwizo, nenguba kwakajalo, mbano ye nthu inowodzutunugwa ne ithuwo tjakazwagwa kutanga tjakatemapala. 16 Themba inodzutunula mbano ye nthu una mwedzi nng'ompela inowobe maloso mashanu e siliva, kuyendidzana nge themba yakabigwa ye bugalo gwakayengemala. 17 Koga mbano dze ng'ombe ne pkhwizi, ne mbudzi, adzitodzutunugwa dzakayengemala. Unyase malopa adzo mu tjibeso tjinopisigwa zwibhayilo, ube upisa mafuta adzo, tjili tjipo tjinopisiwa mu moto kube nnuhwo unozipa kuna Yahwe. 18 Koga nyama yadzo nde iyo, ifuba tje tjipo tjinozunguziwa ne tjidzwa tje luji nde zwizo.
19 “Zwipo zose zwakayengemala zwadusigwa Yahwe nge Baiziraela, ndokupa izo iwe ne bakololo ne bakololokadzi babo nge kusingapele, tjidumano tje mwenyu tjisingapele mbeli kwa Yahwe ne mukuli ne mu zwizekugwana zwizo.”
20 Yahwe bakadwa Aroni bakati, “Autowoamutjila tjimwe kube thaka, kene uli ntuthu we shango yabo usitongo upiwa. Imi Yahwe ndimi gobe lilo ne thaka iyo mu bathu be Iziraela.”
Gobe le Balevi
21 Yahwe bakati, “Balevi ndabapa zose zwe bugumi kube thaka yabo mu Iziraela, ili mbuyilo yabo mu nshingo wabo mu nshasha we bushanganilo. 22 Ngono bamwe bathu be Iziraela basitongo sedzela pejo ne nshasha we bushanganilo, bangadwa bakazwithamila tjibi bebe befa. 23 Balevi bashinge nshingo we nshasha we bushanganilo, ube mu mathudzi abo. Ube nlayo nge kusingapele ne ku zwizekugwana zwenyu. Ngono abatowobe nge thaka mu bathu be Iziraela. 24 Ngobe ndapa Balevi tje bugumi kube thaka yabo, tjadusiwa nge Baiziraela ili tjipo betjiyisa kuna Yahwe. Ndizo ndabadwa nditi abatowobe nge thaka mu bathu be Iziraela.”
Tje bugumi tje Balevi
25 Yahwe bakadwa Mushe bakati, 26 Idwa Balevi uti, “Muti muamutjila tje bugumi mu Baiziraela tjakatogwa ndi Yahwe mu bali, bemupa kube thaka, mube mudusa tje bugumi mutjili mutjiyisa kuna Yahwe. 27 Ngono tjipo tjenyu tjowofananyiwa ne tjipo tjadusiwa nge nlimi mu mathunde a shokogwa ne nkumbi we zhambi ntshwa. 28 Namwibo makafanila dusa muyisa kuna Yahwe, mutjidusa muna tje bugumi tjamaamutjila mu bathu be Iziraela. Makafanila kupa Aroni mpirisiti tjipo tjili tjipo tja Yahwe. 29 Mu zwipo zose zwamapiwa, muyise tjipo tjimwe ne tjimwe tja Yahwe tjakanaka kupinda zwimwe, tjakayengemala. 30 Kakale ubadwe uti, ‘Muti madusa tjakanaka kupinda zwimwe, zwasala zwibe zwe Balevi koga se nlimi angabiga kwasala shule kwe kudusa tjipo tjitje mathunde ashokogwa ne nkumbi we zhambi ntshwa. 31 Ngono zwasala, iwe ne be nsha uwo mungazwijila pamwe ne pamwe, ngobe uli mbhayilo wenyu wamakashingila mu nshasha we bushanganilo. 32 Amutowobe ne nlandu ngoja zwasala, ha madusila Yahwe zwakanaka kupinda zwimwe. Koga musitongo temapadza zwithu zwakayengemala zwe bathu be Iziraela, amungajalo mowofa.’ ”
© Kalanga Bible © Bible Society of Botswana, 2008, 2018.