1 Dama la Yahwe lakazha kuna Zefaniya nkololo wa Khushi, Khushi ali nkololo wa Gedaliya, Gedaliya ali nkololo wa Amariya, Amariya ali nkololo wa Hezekiya mu misi ya Josiya nkololo wa Amoni mambo we Juda.
Zhuba la Yahwe le kusumikilisa
2 “Ndowolobesa tjoselele tjimwe ne tjimwe
tjimu shango,” koleba Yahwe.
3 “Ndowolobesa nthu ne phuka,
ndowolobesa nyuni dze phepo
ne hwobe dze gungwa.
Babiibi banowobe matuluthulu e malala,
andikolomodza lutshinga gwe nthu mu shango,” koleba Yahwe.
4 “Ndowomilidza luboko gwangu kubhayana ne Juda,
ne kubhayana ne bagali bose be Jerusalema.
Ndowokolomodza limbelimbe la Bhaale mu magalo iyawa,
ne zina le bapirisiti banothigamila midzimu ipoga,
5 ibo banothigamila ku matenga e ng'umba,
benamata zwedza zwe kudzimu,
ibo banonamata kakale betuna na Yahwe,
ili ibo zwabo betuna na Milikomo.
6 Ibabo bakafupatila kutobela Yahwe,
ibo basingashake Yahwe kene kuli kushakisisa nge kwabo.”
7 Unyalale mbeli kwa She Yahwe,
ngobe zhuba la Yahwe lasendela.
Yahwe balulwamisa tjibhayilo,
bayengemadza bakokiwa babo.
8 Ngono mu zhuba le tjibhayilo tja Yahwe,
“Ndowoloba shamu makulukota ne bakololo ba mambo,
na bose banoambala zwiambalo zwe bathu be shango dzipoga.
9 Mu zhuba ilelo ndowoloba banoshudzila ku lutombo,
banozhadza ng'umba dza botetshi babo nge phipiti nenge kutjebela”
10 Yahwe bakati, “Mu zhuba ilelo,
kowohwika tjililo kudwa ku Nkoba we Hwobe,
kowohwika tjililo ku Bugalo gwe Bubili,
ne kukwiyana ku matuthu.
11 Bokolelani imwi bagali be ku matengeselo
ngobe bashabi bose bawobulawa,
bose banoshaba ne siliva banowolobesiwa.
12 Nge tjibaka itjetjo, ndowofunyungudza Jerusalema nge mavone,
Ndowoloba shamu bathu bagedzikane mu zwibi zwabo
ibo banokumbula beti, ‘Yahwe akuna tjabanosothama tjili tjibuya kene tjibiibi.’
13 Fumwa yabo inowotapiwa
ne ng'umba dzabo dzowokolomogwa.
Banobaka ng'umba koga abatowogala mudzili,
banowolima minda dze mizhambi koga abatowong'wa nkumbi we zhambi.”
14 Zhuba gulu la Yahwe lasendela,
labe pejo kakale lozha ngolibilidza!
Tjililo tje zhuba la Yahwe tjowobe tjibhaya pa moyo,
babhayani bakasima banowolila ikoko.
15 Kowobe kuli zhuba le bushongola,
zhuba le mang'oni ne buyendasi,
zhuba lekulobesa ne manikano,
zhuba le zhalima ne zogwadza
zhuba le makole akati zwititi,
16 zhuba le kulila kwe lunyanga ne tjililo tje ngwa
kusumikilisa kowila mizi mikulu ye matizhilo ne thungamakole.
17 Ndowozhisa buyendasi mu bathu,
gunowoti bathu bakayenda bekwebiwa se mapofu
ngoti bakatjinyila Yahwe,
malopa abo anowotebugwa se hwuluba
ne zwitumbu zwabo se ndobe.
18 Akuna siliva kene golide yabo ingabatjidza
mu zhuba le bushongola gwa Yahwe.
Shango yose inowokolomogwa nge moto we bushongola gwabo.
Tjinyolotjo banowozhisa bhelelo muna bose banotjila mu shango.
© Kalanga Bible © Bible Society of Botswana, 2008, 2018.