1 Ndimi Paulo, iye wakadang'wa nge kuda kwe Ndzimu kube ntumwa wa Kirisiti Jesu, ndina ikamu tjedu Sositenesi.
2 Ku gubungano le Ndzimu limu Korinta, kuna ibabo bakayengemadziwa muna Kirisiti Jesu, bakadang'wa kube bayengemali, naibo bose kumwe ne kumwe banodana zina la She wedu Jesu Kirisiti, iye She wabo ne wedu nditi: 3 Ngoni ne kunyalala kunodwa ku Ndzimu Tate bedu na She Jesu Kirisiti ngakube namwi.
Makombolelo anodwa kuna Kirisiti
4 Ndoboka Ndzimu misi yose nge kwenyu ngekwe ngoni dze Ndzimu dzamakapiwa muna Kirisiti Jesu, 5 mu tjimwe ne tjimwe mu kufumisiwa mu nli mu zwithu zose, mu ndebeleko yenyu yose ne luzibo gwenyu gose. 6 Koga se butendeki gwedu ngekwa Kirisiti gwakazhadzisika mu muli, 7 kuti musishete kene tjili tjipi tjipo tje meya, ha mutjakalindila nge nyota ne moyo unopisa kuboneka kwa She wedu Jesu Kirisiti. 8 Ndiye unowomusimisa kunoti ku bupelo, kuti musibe ne nlandu mu zhuba la She wedu Jesu Kirisiti. 9 Ndzimu unogalikabgwe ndiwo wakamudana kube ne shangano ne Nkololo wawo Jesu Kirisiti, She wedu.
Kuthubukana mu gubungano
10 Nge zina la She wedu Jesu Kirisiti ndomukumbila mose zwikamu, kuti mube ne kudumana muna tjamunoleba kuti kusibe ne kuthubukana, mushangane mu nkumbulo mube ne moyo nng'ompela. 11 Ngobe ndakabikigwa ne bensha waka Kilowe kuti kuna zhoba pakati kwenyu. 12 Ndodwa kuti, mmwe ne mmwe unoti “Imi ndiwa Paulo,” kene “Imi ndiwa Apolosi,” kene “Imi ndiwa Kefasi,” kene “Imi ndiwa Kirisiti.” 13 Apa Kirisiti wakathubukana kene? Apa Paulo ndiye wakabambuligwa imwi kene? Kene makadubikiwa mu zina la Paulo?
14 Ndoboka kuti akuna wenyu wandakadubika kuzhe kwa Kirisipo na Gayo. 15 Ndizo akuna ungati makadubikiwa mu zina langu, 16 bamwe kakale bandakadubika nge be nsha wa Sitifani. Kuzhe kwabo, anditoziba kuti kene kuna wandakadubika. 17 Ngobe Kirisiti aazondituma kudubika, koga wakandituma kusumikila ndebo mbuya. Anditolebeleka se ntjenjedu, ngobe tjileyanyo tja Kirisiti tjingadwa tjishayisiwa masimba atjo.
Kirisiti simba kakale butjenjedu gwe Ndzimu
18 Ndebo ye tjileyanyo bulengwe kuna ibabo banoloba, koga ku tili iswi banotjidziwa i simba le Ndzimu. 19 Ngobe kwakakwagwa kukayi,
“Ndowolobesa butjenjedu gwe bakatjenjela,
ne luzibo gwe banoziba ndowogulasha.”
20 Apa ungayi ntjenjedu kene? Apa ungayi n'diyi we nlayo? Apa ungayi nyanyayidzi we misi ino kene? Apa Ndzimu auzothama kuti butjenjedu gwe shango ino gube bulengwe kene?
21 Ngobe mu butjenjedu gwe Ndzimu, shango aizoziba Ndzimu nge butjenjedu gwayo, ndizo Ndzimu wakada kuti utjidze ibabo banogalamoyo nge bulengwe gwe tjatinosumikila. 22 Bajuta banoshaka zwilakidzo, Bagiriki ibo banoshaka butjenjedu. 23 Koga iswi tosumikila Kirisiti wakabambugwa, tjikuthi ku Bajuta kakale bulengwe kuna Bezwitjaba, 24 Koga kuna ibabo bakadang'wa, Bajuta kene Bagiriki, Kirisiti ndiye simba le Ndzimu ne butjenjedu gwe Ndzimu. 25 Ngobe bulengwe gwe Ndzimu gopinda butjenjedu gwe nthu ne kushaya masimba kwe Ndzimu kopinda matatabuko e nthu.
26 Zwikamu, kumbulani tjamakabe muli itjo ha mudang'wa, ate bali banjinji benyu bakabe bebong'wa nge shango bali bathu bakatjenjela, ate banjinji bakabe bana masimba, ate banjinji bakabe bazwaligwa mu misha ipezhugwi. 27 Koga Ndzimu wakashalula tjinotogwa kuti bulengwe mu shango kubhatisa batjenjedu shoni nditjo, Ndzimu wakashalula zwisakasima kubhatisa shoni bana matatabuko. 28 Ndzimu wakashalula zwithu zwipasi, zwinolingigwa pasi nge shango ne zwithu zwinoyi ate zwe tjimwe kutobosa zwithu zwiyapo. 29 Oku kwakathamigwa kuti kushete nthu unozwiloba ifuba mbeli kwe Ndzimu. 30 Ndzimu wakamuthama bang'ompela na Kirisiti Jesu, iye Ndzimu wawakathama kube butjenjedu gwedu, ukanthama kube ndulamo yedu ne buyengemali gwedu ne sununguko yedu. 31 Ndizo wali kwakakwagwa kuyi,
“Iye unozwiloba ifuba
ngaazwilobe ifuba ngekwa She.”
© Kalanga Bible © Bible Society of Botswana, 2008, 2018.