1 Bomambo 1 - Kalanga Bible (KBTP)

Mambo Dafite mu misi ye kukwegula kukwe

1 Ngwenu Mambo Dafite kabe akwegula kwazo abe ne makole manjinji. Nenguba balanda babe bakabe benfukidza nge ngubo wakabe asinga dziye. 2 Ndizo balanda babe bakan'dwa bakati, “Mambo tetshi wedu ngabashakigwe mwanadi, ungagala nabo kube ntjengeti wabo. Abe elala pa ifuba tja tetshi wedu mambo, kuti badziigwe.” 3 Ipapo kukanoshakwa mwanadi mbuya mu ntuthu wose we Iziraela, ngono kukawang'wa Abishagi we Nshunami kazhisiwa kuna mambo. 4 Wakabe ali mwanadi mbuya kwazo, ngono kabe ntjengeti wa mambo, kakale enshinga, koga mambo kasitongo walilana naye.

Adonija unobanga bushe

5 Ipapo Adonija nkololo wa Hagiti kazwikudza kati, “Ndowobe mambo,” ngono kalulwamisa koloyi dze ngwa ne batathi be mbizi ne balume bali makumi mashanu (50) banolabuka mbeli kukwe. 6 Tate babe abazotongoti nge tjimwe tjibaka bakanshongola nge kuntjemela beti, “Ini uthama uijali?” Wakabe ali nlume wakanaka kwazo, akazwagwa ali thobeledzi ya Abusalomu. 7 Kalangana na Joabu nkololo wa Zeruya na Abiathari we mpirisiti bakadumilana na Adonija bakambhatsha. 8 Koga Zadoki we mpirisiti na Bhenaya nkololo wa Jehoyada na Nathani we nlebesambeli na Shimeyi na Rei ne babhayani ba Dafite bakabe basimile na Adonija.

9 Mu limwe le mazhuba iyawo Adonija kabhaya pkhwizi ne mikong'wana ne zwikondolo zwakakodziwa pa bgwe linoyi Zohelethi, pejo ne nsenya we Enerogele. Kakoka bana ba tate babe bose, bakololo ba Mambo Dafite ne hadzasha dzose dze Juda. 10 Koga kasikoke Nathani we nlebesambeli kene Bhenaya kene balindi kene Solomoni mwana wa tate babe.

Solomoni unobigwa mambo

11 Ndizo Nathani kabhuzwa mme ba Solomoni Bathisheba eti, “Apa makahwa kuti Adonija nkololo wa Hagiti wakazwibiga mambo, ngono mambo tetshi wedu Dafite basingazibe nge kwako kene? 12 Ngono ngwenu, imani ndimukumbuludze, kuti muzwitjidze tjini imwi ne nkololo wenyu Solomoni. 13 Yendani tjinyolotjo kuna Mambo Dafite ngono mumbhuzwe muti, ‘Apa tetshi wangu mambo, amuzotuna pa nlandakadzi wenyu, muti, “Solomoni unowobusa endigala thaka, unowogala pa tjigalo tjangu tje bushe” kene? Kwashingikala tjini kuti Adonija abe mambo kene?’ 14 Mowoti mutjalebeleka na mambo, ndibe ndizha shule kwenyu namibo, ndowozhadzisa matama enyu.”

15 Ndizo Bhatisheba kanongina kuna mambo mu ng'umba iye ye bulalo. Dafite wakabe atjikwegula kwazo, eshingwa ndi Abishagi we Nshunami. 16 Bhatisheba kathigama kuna mambo, ngono mambo kambhuzwa kati, “Unoshakani?” 17 Bhatisheba kadwa mambo kati, “Tetshi wangu, makatuna na Yahwe Ndzimu wenyu ku nlandakadzi wenyu muti, ‘Solomoni nkololo uwo unowobusa endigala thaka, unowogala pa tjigalo tjangu tje bushe.’ 18 Ngono ngwenu, bonani, Adonija wabe mambo, nenguba imwi tetshi wangu musingazibe tjimwe nge kwako. 19 Wabhaya zwibhayilo zwe ng'ombe ne zwikondolo zwakakodziwa ne pkhwizi njinji, ebuya ekoka bakololo ba mambo bose na Abiathari we mpirisiti na Joabu nlauli we babhayani koga aazokoka nlanda wenyu Solomoni. 20 Ngono ngwenu, tetshi wangu mambo, Baiziraela bose bakamutilika mesho, kuti mubabudze kuti ndiani unowogala pa tjigalo tje bushe tja tetshi wangu mambo ebagala thaka. 21 Kuzhe kwe kujalo, kowoti koga tetshi wangu mambo bafa, tawosala imi ne nkololo wangu Solomoni titogwa se bana nlandu.”

22 Kukati Bhatisheba atjalebeleka na mambo, Nathani we nlebesambeli kabe engina. 23 Mambo kabudziwa kuti nlebesambeli Nathani wazha. Ngono kati engina kathigama mbeli kwa mambo. 24 Nathani kabhuzwa mambo kati, “Tetshi wangu mambo, apa makati, ‘Adonija unowobusa endigala thaka, ebuya egala mu tjigalo tjangu tje bushe kene?’ 25 Ngoti wayenda nasi, wanothama zwibhayilo zwe ng'ombe ne zwikondolo zwakakodziwa ne pkhwizi njinji, wakoka bakololo bose ba mambo, Joabu nlauli we babhayani na Abiathari we mpirisiti ngono bonani, banoja, banong'wa mbeli kukwe, bebuya beti, ‘Mambo Adonija Ndzimu umupaphidzile mazhuba!’ 26 Koga imi nlanda wenyu na Zadoki we mpirisiti na Bhenaya nkololo wa Jehoyada ne nlanda wenyu Solomoni atizokokiwa. 27 Kene zwithu izwezwi makazwibudziwa tetshi wangu mambo, mukadumana nazo, mube musumbikila balanda benyu kuti ndiyani wakafanila gala mu tjigalo tja tetshi wangu mambo ebagala thaka?”

28 Ipapo Mambo Dafite kadabila eti, “Undidanile Bhatisheba.” Ndizo kazha kama mbeli kwa mambo. 29 Ngono mambo katuna kati, “Ndotuna na Yahwe banotjila, ibo bakadzutunula meya yangu mu manikano dzose. 30 Koga sekwa ndakatuna pakuli na Yahwe, Ndzimu we Iziraela nditi, ‘Solomoni nkololo uwo unowondigala thaka mu bushe, unowogala pa tjigalo tje bushe mu bumo gwangu, tjoselele ndowothama ndiyijalo nasi.’ ”

31 Ndizo Bhatisheba kathigama mbeli kwa mambo kati, “Dzene tetshi wangu Mambo Dafite bangatjila nge kusingapele!”

32 Mambo Dafite kabe eti, “Mundidanile Zadoki we mpirisiti na Nathani we nlebesambeli na Bhenaya nkololo wa Jehoyada.” Ipapo bakazha mbeli kwa mambo. 33 Ngono mambo kabadwa kati, “Tolani balanda ba tetshi wenyu, munotathisa Solomoni nkololo wangu moulo yangu, muzhe naye ku Gihoni. 34 Ngono Zadoki we mpirisiti na Nathani we nlebesambeli, banzhodze kube mambo we Iziraela, babe belidza lunyanga, bemimila beti, ‘Ndzimu umupaphidzile mazhuba Mambo Solomoni!’ 35 Mube munsala shule, abe ezha ewogala pa tjigalo tjangu tje bushe ngoti unowobe mambo mu bumo gwangu, ndakanshalula kube mbusi we Iziraela ne Juda.”

36 Ipapo Bhenaya nkololo wa Jehoyada kadabila mambo eti, “Ngakujalo! Dzene Yahwe Ndzimu wa tetshi wangu mambo bangajalo. 37 Yahwe sekwa bagala bali mile na tetshi wangu Mambo Dafite na Solomoni bame naye, bapaphe tjilumbi tje bushe gugwe kupinda tje gwa tetshi wangu Mambo Dafite.”

38 Ndizo Zadoki we mpirisiti na Nathani we nlebesambeli na Bhenaya nkololo wa Jehoyada ne Bakhereti ne Bapeleti bakayenda bakanotathisa Solomoni moulo ya Mambo Dafite bakazha naye ku Gihoni. 39 Ipapo Zadoki katola lunyanga gwe mafuta mu nshasha kazhodza Solomoni. Ndizo bakalidza lunyanga ngono bathu bose bakamimila bakati, “Ndzimu ukupaphidzile mazhuba Mambo Solomoni!” 40 Ngono bathu bose bakansala shule, belidza nyele bakashatha bepululudza mipululu mikulu ngono shango ikatengenyeka nge nsindo wabo.

41 Kwakati Adonija ne bakokiwa baakabe anabo bepedza nzano bakahwa nsindo iwoyo. Ngono kukati Joabu ehwa nsindo we lunyanga kabhuzwa kati, “Zhoba ingapa mu nzi nkulu inodwani kene?” 42 Wakati atjalebeleka, bonani, Jonatani nkololo wa Abiathari we mpirisiti kaswika, ngono Adonija kabe eti, “Ngina ngoti ndiwe nthu una lebeswa, wakafanila utizhisila thawu dzakanaka.” 43 Jonatani kadabila Adonija eti, “Ndodwa, tetshi wedu Mambo Dafite wabiga Solomoni mambo. 44 Ngono watuma Zadoki we mpirisiti na Nathani we nlebesambeli na Bhenaya nkololo wa Jehoyada ne Bakhereti ne Bapeleti, bantathisa moulo ya mambo. 45 Zadoki we mpirisiti na Nathani we nlebesambeli banzhodza mafuta kube mambo ku Gihoni. Kudwa ipapo bebe betathila pezhugwi mu nzi nkulu bakashatha nge mipululu isimishoma, ndiyo zhoba yamutjadwa pahwa. 46 Solomoni ugele pa tjigalo tje bushe. 47 Pezhugwi kwa ikoko, balanda ba mambo bakudza tetshi wedu Mambo Dafite beti, ‘Tshene Ndzimu wenyu ungathama zina la Solomoni kube ne tjilumbi kupinda lenyu ne tjigalo tjitje tje bushe tjikakulila tjenyu.’ Ngono Mambo Dafite bakakotamisa nsholo bakanamata bali pa thobo dzabo. 48 Ngono mambo bakatembezela beti, ‘Ngakukudziwe Yahwe Ndzimu we Iziraela, wapa mmwe we bana bangu kundigala thaka pa tjigalo tjangu tje bushe nasi, ndikuzwibonegwa nge mesho angu.’ ” 49 Ndizo bakokiwa bose ba Adonija bakatetema ngotja, bakamilika bakapalala, mmwe ne mmwe etola zila iye. 50 Ngono Adonija katja Solomoni, kamilika kanozwibhatilila nge nyanga dze tjibeso tjinopisigwa zwibhayilo. 51 Kukabudziwa Solomoni kuyi, “Bonani, Adonija unomutja ngono wakazwibhatilila nge nyanga dze tjibeso tjinopisigwa zwibhayilo kati, ‘Ndokumbila kuti mambo atune kutanga kuti aatowobulaya nlanda uwe nge thumo.’ ” 52 Ngono Solomoni kashandula eti, “Ha angazwilakidza ali nthu una lebeswa, akuna vudzi lile linowowila pasi, koga akungawang'wa mbipo munli, unowofa.” 53 Ndizo Solomoni katuma bathu kunodelusa Adonija mu tjibeso tjinopisigwa zwibhayilo. Ngono kazha kathigama mbeli kwa Mambo Solomoni, ngono Solomoni kandwa kati, “Yenda ku nsha uwo.”