Kuyengemala kwe zwipo
1 Ngono Yahwe bakadwa Mushe bakati, 2 “Budza Aroni ne bakololo babe kuti batete zwipo zwakayengemala zwe bathu be Iziraela zwabanondidusila, kuti ndizo basitemapadze zina langu lakayengemala, ndimi Yahwe. 3 Ha mmwe we ludzi gugo kuyenda nge zwizekugwana zwizo zose esedzela pa zwipo zwakayengemala, zwinodusigwa Yahwe nge bathu be Iziraela akatemapala, ngaathubugwe adwe pandilipo, ndimi Yahwe.
4 “Kusitongoita mmwe we ludzi gwa Aroni ungati egwala bugwele gwe mapele kene tjigwele kaja tjimwe tje zwakayengemala kudzina etjenapadziwa. Ungakutha tjimwe tjakatemapala nge kukuthana ne bafi kene ne nlume alasha mbewu ye bulume, 5 kene ha akuthana ne tjimwe tje zwitjili zwinokambayila kene nthu wakatemapala, 6 nthu wakajalo wakutha tjakatemapala, unowotemapala kuswikila zhuba lingina ngono asitongoja tjimwe tje zwakayengemala kuzhe kwe angula mbili. 7 Ha zhuba langina unowobe atjenapala, ngono shule kwa ipapo ungaja zojiwa zwakayengemala, ngoti zojiwa zwizwe. 8 Tjazwifila kene tjabulawa nge tjibandana asitjije kuzwitemapadza nditjo, ndimi Yahwe.
9 “Bapirisiti balondolodze nlayo wangu, kusajalo, banowosenga tjibi bakafa ha baulengudza, ndimi Yahwe unobayengemadza.
10 “Zojiwa zwakayengemala zojiwa nge be ng'umba ye bupirisiti koga, azwitojiwa nge ntaya kene nlanda we mpirisiti. 11 Koga nlanda wakatengwa nge mari kene wakazwaligwa mu nsha we mpirisiti ungazwija. 12 Ha nkololokadzi we mpirisiti alobogwa nge nlume usi mpirisiti asitongoja zojiwa zwe zwipo zwakayengemala. 13 Koga ha nkololokadzi we mpirisiti ali tjilikadzi kene akapalaligwa nge nsha kakale asina mwana, egala mu nsha wa tate babe, semu butjetjana gugwe, ungaja zojiwa zwa tate babe. Kusibe ne unodwa kuzhe kwe bupirisiti ungazwija.
14 “Ha nthu angaja zojiwa zwe tjipo tjakayengemala asakafanila, apaphe pezhugwi kwe themba yatjo nge kung'ompela mu bushanu gwe themba yatjo, abe epa mpirisiti tjipo tjakayengemala. 15 Bapirisiti basitongolengudza zwipo zwakayengemala zwe bathu be Iziraela, zwabadusila Yahwe, 16 ngoletja bathu beja zojiwa zwakayengemala kube kuzhisa mu bali tjibi ne nlandu ngoti batemapadza zwipo zwakayengemala, ndimi Yahwe unoyengemadza zwipo.”
17 Ngono Yahwe bakadwa Mushe bakati, 18 “Lebeleka na Aroni ne bakololo babe ne bathu bose be Iziraela uti, ‘Ha mmwe webe ng'umba ye Iziraela kene ntaya umu Iziraela eyisa tjipo tjili tjipo tje kutuna kene tjili tjipo tje moyo ntjena tjipiwa Yahwe se tjibhayilo tjinopisiwa, 19 kuti tjiamutjigwe ngatjibe tjili tjilume tjisina bulema, kungabe ng'ombe kene pkhwizi kene mbudzi. 20 Usitongo dusa tjimwe tjina bulema, ngobe atjingaamutjigwe mu bumo gugo. 21 Ngono ha kuna unodusila Yahwe tjibhayilo tje mbakisano tje tjipo tje kutuna kene tje tjipo tje moyo ntjena, kudwa mu ng'ombe kene mu ngubi, kuti tjiamutjigwe ngatjibe tjili tjibuyanana tjisina bulema mutjili. 22 Zwithuwo zwina bupofu kene zwakavunika, kene zwinoshudza, kene zwina malonda, kene zwakagugumuka mibili zwisitongodusigwa Yahwe kene kuthamiwa tjipo tjinopisiwa mu moto mu tjibeso tjinopisigwa zwibhayilo kupiwa Yahwe. 23 Nkong'wana kene pkhwizana ina bulema gwe kupindana kwe ndungululo ingadusigwa tjibhayilo tje tjipo tje moyo ntjena, koga aingadusigwe tjibhayilo tje tjipo tje kutuna kwe nthu. 24 Ithuwo tjakazwimba kene tjakakatshigwa kene tjasunugwa, tjisitongodusigwa Yahwe kene kutjithama tjibhayilo mu shango yenyu.
25 “ ‘Zwithuwo zwatogwa mu bataya zwisitongodusiwa kube zojiwa zwe Ndzimu wenyu. Zwithuwo zwina bulema nge kusunugwa kwazo, azwingaamutjigwe mu bumo gwenyu.’ ”
26 Ngono Yahwe bakadwa Mushe bati, 27 “Phulu, kene pkhwizana kene mbudzana yazwagwa igale mazhuba ali kutendeka na mayi, ndiko kwainoti kudwa mu zhuba le buzhanakadzi, ikaamutjilika kuti ingadusiwa ikathamwa tjipo tjinopisiwa mu moto tjipisigwa Yahwe. 28 Musitongo bulaya ng'ombe kene pkhwizi ne mwana wayo mu zhuba ling'ompela. 29 Ha muyisa tjibhayilo tje mboko kuna Yahwe mutjiyisile kuti muamutjigwe. 30 Tjijiwe zhuba ilelo, kusibe ne tjimwe tjatjo tjingasala kuswikila tjimuka, ndimi Yahwe.
31 “Ndizo mulondolodze milayo yangu kakale muithame, ndimi Yahwe. 32 Ngono musitongo lengudza zina langu lakayengemala, koga ndowoyengemadziwa pakati kwe bathu be Iziraela, ndimi Yahwe unomuyengemadza, 33 wakamudusa mu shango ye Egipiti kube Ndzimu wenyu, ndimi Yahwe.”
© Kalanga Bible © Bible Society of Botswana, 2008, 2018.