Mushe unokulumbidza Iziraela kuhwa
1 Ndizo ngwenu wali iwe Iziraela, yela njele milayo yandinokudiya uyishinge kuti ndizo utjile kuti ungine utole shango iyeyi yaunopiwa ndi Yahwe Ndzimu wa botate babo. 2 Musitongo paphidza dama landamudwa kene kudusa tjimwe mulili kuyita kuti ndizo mulondolodze milayo ya Yahwe Ndzimu wenyu yandinomudwa. 3 Mesho enyu akabona tjakashingwa ndi Yahwe ku Bhaalepheori. Yahwe Ndzimu wenyu bakalobesa balume bose bakabe betobela Bhaale we Pheori, 4 koga imwi bakabhatilila kwazo muna Yahwe Ndzimu wenyu mose motjila nasi.
5 Bonani, ndakamudiya milayo sekwa ndakadwiwa ndi Yahwe Ndzimu wangu kuti muyilondolodze mu shango yamunongina kuyitola kube yenyu. 6 Muyilondolodze muishinge, ngoti inowobe butjenjendu gwenyu ne kuhwisisa mu bathu ibo banowoti behwa milayo yose iyeyi bakati, “Nge malebeswa ludzi igogu bukulukulu bathu bakatjenjela banohwisisa.” 7 Ndigupi ludzi bukulu guyapo guna ndzimu upejo nago sa Yahwe Ndzimu bali pejo naswi tjibaka ne tjibaka ha tibadana? 8 Ngono ndigupi ludzi bukulu guyapo guna milayo yakayengemala sa iyeyi milayo yose yandabiga mbeli kwenyu nasi?
9 Yelani njele koga mulondolodze meya yenyu nge njele kuti musitongokangang'wa zwithu zwakabong'wa nge mesho enyu ngono zwidwa zwibhuda mu mimoyo yenyu mazhuba wose e butjilo gwenyu. Muyidiye bana benyu ne bana be bana benyu. 10 Mu zhuba lamakabe mulimile mbeli kwa Yahwe Ndzimu wenyu ku Horebu, Yahwe bakati kundili, “Kubunganyila bathu ku ndili kuti bahwe matama angu ndizo bazwidiye kunditja mazhuba wose abanotjila mu shango nekuti bakafanila kuadiya bana babo sayikoko” 11 Ngono makazha mukama mu hwunde ye dombo, dombo ilo lithuta moto kunoti kudzimu, kuna makole matematema ne zhalima lakatizwititi. 12 Ipapo Yahwe bakalebeleka namwi kudwa pakati kwe moto, makahwa nsindo we matama koga mukasibone tjimwe, kwakabe kuna hwi koga. 13 Ngono bakamubudza tjidumano tjabo tjabakamudwa kuti mutjithame, kudwa mu milayo ili gumi ngono bakaikwala mu zwileiti zwe mabgwe zwibili. 14 Ngono Yahwe bakandidwa nge tjibaka itjetjo kuti ndimudiye milayo kuti muyishinge mu shango yamunoyenda kuyili kuithuwa.
15 Ndizo wali muzwiyele njele kwazo. Semusakabona tjimwe mu zhuba lakati Yahwe bakalebeleka namwi ku Horebu kudwa pakati kwe moto, 16 muyele njele musitongo zwibhata bunyetjenyetje mube muzwithamila ndzimu wakabezhiwa mu mbumbiko ye tjimwe tjilume kene tjikadzi, 17 kene tjinofanana ne tjibandana tjimu shango kene nyuni ina mapapilo inowuluka mu phepo 18 kene tjimwe tjinokambayila pasi kene ifano tje hwobe imu vula imu shango. 19 Mube ne njele musitongo dwa mu milidza mesho enyu mulinga zhuzhugwi, muti mubona zhuba ne mwedzi ne nyenyedzi nakose ku pezhugwi kube kumuwonga mube munamata zwithu izwezo muzwishingila, zwithu Yahwe Ndzimu wenyu zwabakapa bathu bose bapasi kwe zhuzhugwi. 20 Koga Yahwe bakamutola bakamudusa mu bhuba le moto, bemudusa mu Egipiti kube bathu bawo sekwakuli iko nasi. 21 Koga Yahwe bakandigwadzila moyo nge kwenyu ngono bakatuna kuti anditowotjuluka Jorodani kakale anditowongina mu shango mbuya yamunopiwa ndi Yahwe Ndzimu wenyu kuithuwa. 22 Ngoti ndakafanila ndifile mu shango iyeyi, andizofanila kuambuka Jorodani, koga imwe mowotjuluka munotola shango iyeyi mbuya. 23 Muzwiyele njele musitongo dwa mukangang'wa tjidumano tja Yahwe Ndzimu wenyu tjabakathama namwi mube muthama ndzimu wakabezhiwa mu ifano tje tjimwe tjithu tjamakadzibigwa ndi Yahwe Ndzimu wenyu. 24 Kana Yahwe Ndzimu moto unopisa, Ndzimu una fupa.
25 Ha mawana bana mube mube ne zwizekugwana ngono mube makwegula mu shango iyeyo, ha muthama zwakaleyana nge kuthama midzimu ye zwifano yakabezhiwa mu ifano tje tjimwe tjithu koga, nge kuthama mbipo mu mesho a Yahwe Ndzimu wenyu, ngojalo mubathumula kubagwadzisa moyo, 26 ndodana kudzimu ne shango kutendeka ngekwenyu mu zhuba ileli kuti mowoloba tjinyolotjo mushango iyeyi yamunoyenda kuyili seli kwe Jorodani kuithuwa amutowotjila tjibaka tjilefu muili, koga mowolobesiwa muili. 27 Yahwe banowomupaladzila pakati mu zwitjaba ngono mowosala muli bashomanana pakati kwe njudzi kwamunowotatigwa ndi Yahwe. 28 Ngono ikoko mowoshingila midzimu ye lukuni neye bgwe, yakathamiwa nge maboko e nthu, isingabone isingahwe, isingaje kene kuli kutunila. 29 Koga kudwa ikoko mowoshaka Yahwe Ndzimu wenyu ngono mowobawana ha mubashaka nge mimoyo yenyu yose nenge meya yenyu yose. 30 Mowoti muli mu buyendasi, zwithu izwezwi zwimuwila mu mazhuba ambeli, mowoshandukila kuna Yahwe Ndzimu wenyu mukahwa hwi labo, 31 ngoti Yahwe Ndzimu wenyu Ndzimu una ngoni, abangamulashe kene kuli kumulobesa kene kukangang'wa tjidumano tjabakatuna kuna botate benyu.
Yahwe ndibo Ndzimu
32 Bhuzwani ngwenu ngekwe mazhuba akapinda, musathu mukabepo, kudwa mu zhuba Ndzimu lawakasika nthu mu shango, mubhuzwe kudwa ku lubizho gumwe kwe kudzimu, kunoti ku gumwe, kene tjimwe tjithu tjikulu saitjetji tjakatongo shingikala, kene kwakatongo hwika tjimwe ngekwatjo. 33 Apa kuna bathu bakatongo hwa hwi le ndzimu ulebeleka kudwa pakati kwe moto samwi sekwa mahwa ngono mutjatjila kene? 34 Kene apa kuna mmwe Ndzimu wakatongo gwisa kuyenda kunozwitolegwa ludzi gwe bathu pakati kwe gumwe ludzi nge ndiko, nge zwilakidzo, nge matjenamiso, nge ngwa, nge tjiazha tjakasima ne luboko gwakatambunuka nenge kutjisa kukulukulu kuyendidzana na kose Yahwe Ndzimu wenyu kwabakamuthamila mu Egipiti makalinga kene? 35 Imwi makalakidziwa ikoku kuyita kuti muzibe kuti Yahwe ndibo Ndzimu, akuna mmwe kuzhe kwabo. 36 Bakathama kuti muhwe hwi labo lidwa kudzimu kuti bamutjemele. Mu shango bakathama kuti mubone moto wabo nkulu ngono makahwa hwi labo lidwa mu moto. 37 Ngono ngekuti bakada bobatategulu benyu ngono bakashalula bana babo ngono bakamudusa mu Egipiti bali pakati kwenyu nge simba labo gulu, 38 betata njudzi hwulu dzakasima kumupinda mbeli kwenyu, kumuzhisa mukati, kumupa shango yadzo kuti ibe thaka yenyu sekwa kuliyiko mu zhuba lino. 39 Ndizo zibani muna ileli zhuba ngono mukulonge mu moyo wenyu, kuti Yahwe ndibo Ndzimu pezhugwi kudzimu na pasi mu shango, akuna mmwe. 40 Ndizo wali mowolondolodza milayo ne milawana yabo iyo yandinomupa mu zhuba ileli kuti kumuyendile zubuyanana ne bana benyu banozha shule kwenyu nekuti mazhuba enyu abe malefu mu shango yamunopiwa ndi Yahwe Ndzimu wenyu nge kusingapele.
Mizi mikulu ye matizhilo ku bhezhuba kwe Jorodani
41 Ipapo Mushe kashalula mizi mikulu mitatu ku bhezhuba seli kwe Jorodani 42 kuti nthu wabulaya nthu atizhileko, wabulaya mbakidzani naye asina mazwimisilo atizhile kuyili, wabulaya waasakatongo bengana naye mu misi yakapinda, ngono nge kutizhila kummwe we mizi mikulu iyeyi azwitjidze. 43 Mizi iyeyo ndieyi, Bhezera mu tjilambanyika tje shango yakatuthumala kutizhile Barubheni neku Ramoti mu Giliyadi kutizhile Bagadi, ku Golani mu Bhashani kutizhile Bamanase.
Zibiso ye kupiwa kwe nlayo we Ndzimu
44 Iwoyu nlayo wakati Mushe kawupa Baiziraela, 45 izwezwi butendeki ne milayo Mushe yaakabudza Baiziraela pabakadwa mu Egipiti 46 bali seli kwe Jorodani mu nkuku kulingisana ne Bhetipeori mu shango ya Sihoni mambo we Baamori wakabe egala ku Heshibhoni. Wakabe akundiwa ndi Mushe ne Baiziraela pabakabhuda mu Egipiti. 47 Bakatola shango iye ne shango ya Ogi mambo we Bhashani, bomambo babili be Baamori bakabe begala ku bhezhuba seli kwe Jorodani. 48 Shango iyeyi yakabe itangisa pa Aroeri mu phili dze lukoba gwe Arinoni kuyenda bukule kunoti ku Dombo le Siriyoni (kodwa Hemoni), 49 kang'ompela ne Araba yose ku ndzibo uku bhezhuba kwe Jorodani kuyenda bukule kunoti ku Gungwa le Araba pasi kwe Dombo le Pisiga.