Bhatsha shodzi kwa Rahabu
1 Kwakati bathu be Iziraela bali ku Shitimu, Joshuwa nkololo wa Nuni katuma shodzi mbili mu ikohwa eti, “Endani munoshola shango, tjikulu bukulu kwazo nzi nkulu Jerikho.” Ngono bakamilika bakayenda. Bakaswika pa ng'umba ye fukula imwe, zina layo kuyi Rahabu ngono bakaizela gwe hwope. 2 Ngono kukanotjetiwa kuna mambo we Jerikho kuyi, “Bamwe balume be Baiziraela bazha busiku ngeno kuwoshola shango.” 3 Ndizo mambo we Jerikho katumila dama kuna Rahabu eti, “Zhisa balume ibabo bamu ng'umba iyo, ngobe bazha kuwoshola shango yose koga.”
4 Ngono Rahabu wakabe atola balume ibabo babili kabasumbika, ngono kati “Malebeswa, balume ibaba bazha kundili, koga andizobe ndiziba kwababe bedwa. 5 Ngono kwati kwabhata, nkoba we nzi nkulu wabe pejo ngo zhaligwa bakabe bebhuda beyenda, mubalonde tjinyolotjo pamwe swiyo mungababhata batji mu zila.” 6 Koga Rahabu wakabe atola balume ibabo abasumbika mu denga le ng'umba akabafumika nge mashanga. 7 Ndizo batumwa ba mambo bakabhuda bakatobela shodzi bali mu zila inoyenda ku gwizi gwe Jorodani kunoti pa zila painotjuluka gwizi gwe Jorodani, kwakati koga batumwa ba mambo basinobhuda, nkoba we nzi nkulu ukazhaligwa.
Tjidumano tja Rahabu ne Baiziraela
8 Shodzi dzakati dzisathu dzikanoyisa mafupa ku beni, Rahabu kayenda kunodzilezwa ku denga 9 ngono kaswika edzidwa eti, “Ndoziba kuti Yahwe bamupa shango iyeyi ne kuti kakale kutja kukulu kwatiwila, tose bagali be shango iyeyi totetema nge lutjo nge kwenyu. 10 Takahwa Yahwe sekwa bakathama Gungwa Shaba kuti lipkhwe kuthama kuti ndizo mutubule tjuluka tjibaka tjamakabe mudwa ku Egipiti ne tjamakathama kuna bomambo be Baamori baku bhezhuba kwe Jorodani Sihoni na Ogi ibo bamakabulaya. 11 Takati tihwa nge kwako, tikapaluka mimoyo, mmwe ne mmwe kapelegwa nge simba nge kwenyu ngobe Yahwe Ndzimu wenyu ndibo Ndzimu we kudzimu ne shango. 12 Ndizo ngwenu tjitunani na Yahwe kuti se ndamuthamila lubu namwi mowothamila nsha wangu lubu. Mundipe tjilakidzo kuti ndizo ndigalebgwe, 13 mundigadzebgwe kuti mowoletja mme na tate ne hazwadzi dzangu ne bana badzo bakatjila. Mutitjidze!”
14 Shodzi dzakashandula Rahabu dziti, “Tobiga misholo yedu mu zwitsha! Ha iwe usingake ukaleba nja wedu pano towokuthamila lubu ha Yahwe betipa shango iyeyi.”
15 Ndizo Rahabu kabaletja bakadeluka nge ntjili bebhuda nge fesitere le ng'umba ngobe ng'umba iye yakabe yakabakigwa mu guma le nzi nkulu. 16 Rahabu kadwa shodzi kati, “Endilani ku matombo kuti ndizo batumwa ba mambo basitongomubona. Mubgwate ikoko mazhuba matatu kudza bebuya ndizo shule kwa ipapo mungayenda zwenyu zila dzenyu.”
17 Shodzi dzikan'dwa dzikati, “Kutuna kwatatuna akutowobe tjisungo mutili 18 kuzhe kwe kuti tingati tinginilila nzi nkulu tikawana wakasungila nsungo nshaba mu fesitere le ng'umba ileli lawatidusa ndilo ne kuzhe kwe kuti ube watola mmeyabo na tate babo ne hazwadzi dzidzo ne be nsha uwo bose wabakubunganyila mu ng'umba iyo. 19 Ha mmwe wenyu angabhudila zwe kuzhe kwe ng'umba iyo kabe enoshangana ne hwubadzi ngono kafa, nge kukwe, iswi towobe tisina nlandu. Koga mmwe ne mmwe unawe mu ng'umba ha anga kubala kafa lopa lile lishakiwe mutile.” 20 Koga ha ungadza ukaleba nja wedu pano iswi towobe tasununguka mu kutuna kwawatithama kuti titune. 21 Ngono Rahabu akadabila eti, “Ngakushingikale sekwa munoleba.” Ndizo kawonekana nabo ngono bakayenda. Rahabu kabe esungilila nsungo nshaba mu fesitere le ng'umba.
22 Shodzi dzikamilika dzikayenda ku matombo ngono dzikanobgwatako kwe mazhuba ali matatu. Batumwa ba mambo bakadzishaka kuyenda ne zila ngono bakadzisheta. Ndizo bakabgwilila basadzibona.
23 Balume babili be shodzi bakadwapo bedelukila matombo bakalinga ku gwizi gwe Jorodani ngono bakagutjuluka. Bakaswika bebikila Joshuwa nkololo wa Nuni tjimwe ne tjimwe tjakabashingikalila. 24 Bakadwa Joshuwa bakati, “Nge malebeswa Yahwe batipa shango iyeyi yose, bathu bose banotetema nge lutjo nge kwedu.”