Nsholo we shathu unoangama
1 Badiyiwana be balebesambeli bakadwa Elisha bakati, “Bona, pathu patigele tili pasi kwe ndaulo iyo pakamanikana mutili. 2 Ngatiyendeni ku Jorodani mmwe ne mmwe wedu ateme bhango, ngono tizwibakigwe pathu patingagala ikoko.” Ngono kadabila eti, “Yendani.” 3 Ipapo mmwe wabo kati, “Tokumbila muyende ne balanda benyu.” Ngono kadabila eti, “Ndowoyenda.” 4 Ndizo kayenda nabo. Ngono bakati beswika ku Jorodani bakatema miti. 5 Koga kwakati mmwe wabo atjatema nti, nsholo we shathu lile ukawila mu vula, ngono kalila eti, “Tetshi wangu wee, labelaadzimiwa.” 6 Ipapo nlume we Ndzimu kabe eti, “Lawila poni?” Wakati enlakidza pathu palawila, Elisha kavuna ikuni katjilashila ipapo ngono butale gukaangama. 7 Ngono kati, “Uguduse.” Ndizo katambunudza luboko gugwe kagutola.
Babhayani be Siriya banokundiwa
8 Kwakati mambo we Siriya ali mu ngwa ne Iziraela, kalangana ne balanda babe kati, “Bukotokelo gwangu gowobe kwakati ne kwakati.” 9 Koga nlume we Ndzimu katumila dama kuna mambo we Iziraela eti, “Uyele njele kuti autopinda pathu ipapo, ngoti Basiriya banodelukila ko.” 10 Ngono mambo we Iziraela katuma nthu kunoshola pathu pa abudziwa nge nlume we Ndzimu, wakabe egala enkumbuludza ngekwa ikoku ndizo kazwitjidza ikoko kusi kang'ompela kene kabili.
11 Moyo wa mambo we Siriya wakadziyidzika kwazo ngekwa ikoku, ngono kadana balanda babe kabadwa kati, “Apa amungandilakidze kuti umile na mambo we Iziraela pakati kwedu ndiyani kene?” 12 Mmwe we balanda babe kati, “Akuna mu tili, tetshi wangu, mambo wangu, ndi Elisha nlebesambeli umu Iziraela unobudza mambo we Iziraela matama a munoleba mu ng'umba yenyu ye bulalo.” 13 Ngono mambo kabadwa kati, “Yendani munobona kuti uponi, ndizo nditume bathu ndimbhate.” Ngono kadwiwa kuyi, “Bona, umu Dotani.” 14 Ndizo katumila mbizi ne koloyi dze ngwa kose ne ngwa hwulu, ngono bakaswika kuli busiku bakakomba nzi nkulu.
15 Kwakati nlanda we nlume we Ndzimu a binduka ngono kabhudila kuzhe, bona, ngwa ne mbizi ne koloyi dze ngwa dzikabe dzakakomba nzi nkulu. Ngono nlanda kati, “Tetshi wangu wee, towothama tjini kene?” 16 Ngono nlebesambeli kati, “Usitje, ngobe ibaba banaswi, banji pana ibabo banabo.” 17 Ipapo Elisha katembezela eti, “Yahwe zhulani mesho awe kuti abone.” Ndizo Yahwe bakazhula mesho e nzhuzha ngono kalinga kabona dombo lili zhele mbizi ne koloyi dze ngwa dze moto dzakapoteleka Elisha. 18 Ngono kwakati Basiriya bedelukila pasi kunli, Elisha katembezela kuna Yahwe eti, “Lobani bathu ibaba nge bupofu.” Ndizo bakabaloba nge bupofu kuyendidzana nge ntembezelo wa Elisha.
19 Ngono Elisha kabadwa kati, “Iyeyi zila ateiyo, naiko ne nzi nkulu auteuli iwo, mundisale shule ngono ndowomuyisa ku nlume wamunoshaka.” Kabatungamilila ku Samariya. 20 Tjinyolotjo bakati bengina mu Samariya, Elisha kati, “Yahwe zhulani mesho e balume ibaba kuti babone.” Ndizo Yahwe bakazhula mesho abo bakabona ngono bakazwibona balipakati kwe Samariya. 21 Kwakati mambo we Iziraela ebabona, kabhuzwa Elisha kati, “Tate apa ndibabulaye kene? Apa ndibabulaye?” 22 Ngono kadabila eti, “Usibabulaye, apa ungabulaya bawatapa nge thumo nenge nsebe kene? Biga zojiwa ne vula mbeli kwabo kuti baje bang'we ngono babgwilile kuna tetshi wabo.” 23 Ndizo kabathamila nzano nkulu ngono bakati baja bang'wa kabaletja, ngono bakayenda kuna tetshi wabo. Ngono Basiriya bakamisa ku nginilila shango ye Iziraela.
Samariya inokombiwa nge ngwa
24 Kwakati shule Bhenihadadi mambo we Siriya kalulwamisa ngwa iye yose ngono katathila kanokomba Samariya. 25 Ngono kwakabe kuna bhamba gulu mu Samariya, bakayikomba kwe tjibaka tjilefu kukadza kukatengesiwa nsholo we donki nge shekele dze siliva dzili makumi ali zhanakadzi (80) ne kung'ompela mu bunna kwe nswani we njiba kuli shekele dze siliva dzili shanu. 26 Kwakati mambo we Iziraela eyenda pezhugwi kwe guma, nkadzi kalilila kunli eti, “Mundibhatshe, tetshi wangu, imwi mambo.” 27 Ngono mambo kashandula eti, “Ha Yahwe basingakubhatshe, imi ndowotola ngayi bhatsho kene? Ku lutombo kene kunoswinigwa nkumbi?” 28 Ngono mambo kambhuzwa eti, “Kwatini?” Nkadzi kashandula eti, “Nkadzi iwoyu wakandidwa eti, ‘Zhisa nkololo uwo tije nasi ngono mangwana towoja nkololo wangu.’ 29 Ndizo takabhika nkololo wangu tikaja, ngono kwakati tjimuka ndi ndwa nditi, ‘Zhisa nkololo uwo tije’, ngono kasumbika nkololo uwe.” 30 Kwakati mambo ehwa matama e nkadzi iwoyu, kapalula zwiambalo zwizwe, wakati atjayenda pezhugwi kwe guma bathu bakalinga ngono bakabona akaambala saka kusi mu mbili uwe. 31 Ngono kati, “Ndzimu ngabandilobe ndife ha zhuba linganomila nsholo wa Elisha nkololo wa Shafati utjimile munli nasi.” 32 Elisha wakabe aligele mu ng'umba iye ne sholotjena dziligele naye. Mambo bakatuma ntumwa ngono wakati asathu kaswika, Elisha kadwa sholotjena kati, “Apa mobona kuti mbulayi watuma nthu kundithubula nsholo kene? Bonani, ha ntumwa ezha munzhalilile kuzhe musunde tjizhalilo. Apa ate nsindo we makumbo a tetshi uwe shule kukwe kene?” 33 Ngono wakati atjalebeleka nabo, mambo kadelukila kunli kati, “Mbatsha idzedzi dzodwa kuna Yahwe. Ndowobe nditjamilililani Yahwe kene?”
© Kalanga Bible © Bible Society of Botswana, 2008, 2018.