1 Ndimi Paulo ntumwa wa Kirisiti Jesu nge ndayo ye Ndzimu Ntjidzi wedu na Kirisiti Jesu, iye kugalabgwe kwedu.
2 Kuna Timoti nkololo wangu tjose mu bugalimoyo:
Ngoni ne mahwilo zogwadza ne kunyalala kunodwa ku Ndzimu Tate na Kirisiti Jesu She wedu ngakube nawe.
Kutjenjedziwa mu zwidiyo zwe manyepkhwa
3 Sekwa ndakakukulumbidza ndiyenda ku Makedoniya, gala ku Efeso, kuti ndizo udwe bamwe bathu kuti basidiye zwidiyo zwipoga, 4 kene kuzwipa mu ngano ne mazina e lutshinga gwa bobatategulu asingapele. Oku kozhisa kunyanyayidzana mu bumo gwe nshingo we Ndzimu, iwo unozha nge kugalamoyo. 5 Mazwimisilo e ndayo iyeyi ludo, igo gunodwa mu moyo mbuyanana ne njalakang'wa mbuyanana ne kugalamoyo kwe malebeswa. 6 Bamwe bakabhuda muna izwezwi, ngono bakalashika nge kushandukila ku ndebo dzisina nshingo. 7 Banoyemula kube badiyi be nlayo koga abatoziba tjabanoleba nanga naizo zwabanoti i lebeswa dumbu.
8 Toziba kuti nlayo wakanaka, ha nthu eushingisa zubuyanana, 9 eziba kakale kuti nlayo auzothamigwa bathu bakalulwama, koga wakathamigwa basingaulondolodze ne basingahwe, basingazibe Ndzimu ne batjinyi, basakayengemala ne basinganamate Ndzimu, ibo banobulaya botate kene bomme yabo, babulayi, 10 phombgwe ne betjilume banowalilana thobo ne banotenga betengesa balanda ne banyepi ne banopa butendeki gwe manyepkhwa ne tjimwe ne tjimwe tjinonyanyayidzana ne zwidiyo zwakatambunuka, 11 zwinodumana ne ndebo mbuya yandakapiwa, ye Ndzimu una gudzo kakale una makombolelo.
Kubokela ngoni dze Ndzimu
12 Ndoboka Kirisiti Jesu She wedu, iye wakandipa matatabuko, ngobe wakandibona ndili unogalikabgwe, ngekundishalulila nshingo uwe. 13 Nenguba ndakatongo ntuka, ndikandziyidza ndikansapula, koga ndakahwigwa ngoni ngobe ndakashinga sa ikoko nge kusaziba nenge kusagalamoyo. 14 Ngono She wakadila ngoni dzidze dzikazhala tupu mundili nge kugalamoyo ne ludo zwimuna Kirisiti Jesu. 15 Ndebo ye lebeswa dumbu yakwako, yakafanila amutjigwa nge buzhalo ndi eyi, Kirisiti Jesu wakazha mu shango kutjidza batjinyi, ibo bandinopinda bose mu butjinyi. 16 Koga ndakahwigwa ngoni, kuti ndizo mundili, imi ntjinyi unopinda bose, Jesu Kirisiti alakidze bumoyonlefu gugwe, tjili tjilakidzilo tja ibabo banowogalamoyo munli, ngono bakawana butjilo gusingapele. 17 Ngwenu ngakube ne kuteta gudzo nge kusingapele kose kuna Mambo tjose, usingafe kakale usingaboneke. Ngakujalo.
18 Timoti nkololo wangu, ndokupa ndayo iyeyi kuyendidzana nge kulebesambeli, kwakalebgwa nge kuko kuti ndizo mukusima kuko mukutobela bulebesambeli igogu, ungagwa ngwa yakanaka, 19 wakabhatilila mu kugalamoyo ne hana mbuyanana. Bamwe bakalamba kuhwilila hana dzabo, ndizo bakatjinya kugalamoyo kwabo, 20 mubali ili Himeneo na Alekizanda, ibo bandakapa Satani kuti bazwidiye kusatuka Ndzimu.
© Kalanga Bible © Bible Society of Botswana, 2008, 2018.