Gudzo le Ziyoni
1 “Pululudza iwe usina mbeleko,
iwe usakatongowana bana,
phutuka nge mpululu, ulakidze kushatha,
iwe usakatobe mu zwibhayo zwe kutshibama.
Ngoti bana be nkadzi wakalashiwa banowobe banji
pana be nkadzi wakalobogwa.”
Koleba Yahwe.
2 Talabudza pawakabaka nshasha uwo,
ube upaphidza nshasha uwo,
usiletje kuthama uijalo, paphidza misungo iyo
ube usimisa mbambo dzidzo.
3 Ngoti unowowanda kuyenda ku luji ne ku lumeshwe,
ludzi gugo gowothuwa njudzi
gukamusa mizi yakathukudzika.
4 Usitje ngoti awutowobhakhwa nge shoni,
usinyale moyo ngoti awutolengudzika.
Unowokangang'wa shoni dze butjetjana gugo,
ne kulengudzika mu butjilikadzi gugo autowokukumbula.
5 Ngoti mbumbi uwo ndiye nlume uwo,
zina lile ndi Yahwe Masimbawose,
Wakayengemala we Iziraela ndiye Ndzutunuli uwo,
unodang'wa Ndzimu we shango yose.
6 Yahwe bakakudana
unga nkadzi wakafuba mu meya,
unga nkadzi we butjetjana alambiwa.
Koleba Ndzimu uwo.
7 “Ndakakusiya tjibaka tjitukununu,
koga nge shungu wulu ndowomukubunganya.
8 Nge kugwadzamoyo tjibaka tjitukununu
ndakakufupatila
koga nge ludo gusingapele ndowokuhwila ngoni.”
Koleba Yahwe, Ndzutunuli uwo.
9 “Ngoti ikoku konga mazhuba a Nuwa kundili,
konga sekwa ndakatuna kuti mikubila ya Nuwa
isitjakube shango kakale,
ndizo ndatuna kuti anditjawokugwadzila moyo
kene kukutjemela.
10 Nenguba matombo angapaladziwa,
ne matuthu akadusiwa,
koga ludo gwangu mu kuli agungapele,
ne tjidumano tjangu tje kunyalala atjingadusiwe.”
Koleba Yahwe ibo banokuhwila ngoni.
11 “Iwe wakadziyidzika, wakatutudziwa nge matutu ukasitongonyaladziwa,
ndowokubaka nge mabgwe akanaka,
thiwa dzidzo ndowodzibaka nge mabgwe mabuya e safire.
12 Thungamakole dzidzo ndowodzinakisa nge mabgwe akanaka,
mikoba iyo ndikaithama nge thakwala,
guma lilo lose nge mabgwe akanaka.
13 Bakololo babo bose banowodiyiwa ndi Yahwe,
ngono banowobuyigwa kukulukulu ne kunyalala kowobe nabo.
14 Unowosimisiwa mu ndulamo,
kutshambilidziwa kowopela, ngoti awutowotja.
Autowotja ngoti tjinotjisa
atjitowosedzela pejo nawe.
15 Ha mmwe angakutanga,
kowobe kusingadwe mundili.
Iye kene ali ani ungakumukila
unowowa nge kuko.
16 “Bonani, ndimi ndakabumba nthuli
unothutidza masimbe kabe,
ebe ethula tjibhayano kushinga nshingo watjo.
Kakale ndimi ndakabumba nkolomodzi kutjinya.
17 Akuna thumo linothamigwa kukubhaya linowowatshika,
unowokunda ndebo imwe ne imwe inobhayana nawe mu kusumikilisiwa.
Iyeyi ndiyo thaka ye balanda ba Yahwe
ne kulandugwa nlandu ndimi.”
Koleba Yahwe.
© Kalanga Bible © Bible Society of Botswana, 2008, 2018.