Kukundiwa kwa Gogo
1 “Iwe nkololo we nthu lebelambeli ngekwa Gogo uti She Yahwe bakati, ‘Bona ndobhayana nawe iwe Gogo mbusi we Mesheki ne Tubali. 2 Ndowokutendebudza akutakulila mbeli, akudusa kule ku bunandzwa akuisa kubhayana ne matombo e Iziraela. 3 Ipapo ndowoloba dati lilo mu tjiazha tjitjo tje lumeshwe athama misebe iyo kuti iwe mu tjiazha tjitjo tje luji. 4 Unowowa pezhugwi kwe matombo e Iziraela, iwe ne ngwa iyo yose ne njudzi dzinawe. Ndowokupa njudzi dzose dze nyuni ne zwibandana kube zojiwa zwazo. 5 Unowowila mu shango yakazhuka patjena, ngobe imi She Yahwe ndaleba. 6 Ndowobhatidza moto mu Magogi ne muna ibabo banogala zubuyanana mu shango dzakaitjekeledza, ngono banowoziba kuti ndimi Yahwe.
7 “ ‘Ndowothama zina langu lakayengemala likazibika pakati kwe bathu bangu Baiziraela. Andingaletje zina langu lakayengemala litemapadziwa kakale, ngono njudzi dzowoziba kuti imi Yahwe ndi Wakayengemala we Iziraela. 8 Bona, lozha! Nge malebeswa lowoshingikala, kojalo She Yahwe. Ileli ndilo zhuba landakaleba nge kwalo.
9 “ ‘Ipapo ibabo banogala mu mizi mikulu ye Iziraela banowobhuda bakabesa moto nge zwibhayano, banowozwipisa, zwivikisi zwitukununu ne zwikulu ne matati ne misebe ne swimbo dze ngwa ne makanu. Banozwishingisa se hwuni dze moto makole ali kutendeka. 10 Akutowosheteka kuti bayende banoshaka hwuni ku minda kene ku zwishaka ngoti banowoshingisa zwibhayano se hwuni. Banowotapila ibabo bakabatapila bakatolela ibabo bakabatolela, kojalo She Yahwe.
Mbiganyo ya Gogo
11 “ ‘Muna ilelo zhuba ndowopa Gogo pathu paanowotshigwa mu Iziraela, mu Nkuku we Bayendi kunobhuda zhuba kwe gungwa. Pathu ipapo panowozwimba zila ye bayendi ngoti Gogo ne bunji gugwe gowotshigwa ikoko. Ndizo panowodang'wa kuyi Nkuku wa Hamoni Gogo. 12 Mimwedzi ili kutendeka bathu be Iziraela banowoipitsha be batshila kudusa zwamwi mu shango. 13 Bathu bose be shango banowobatshila, ngono zhuba landinowokudziwa lowobe zhuba le ikumbudzo tjabo, kojalo She Yahwe. 14 Banowoshalula balume banowoyendayenda mu shango shule kwe mimwedzi ili kutendeka beyenda betshila zwitumbu zwe banginilili zwakasala zwakaandama mu shango shule kwe mimwedzi ili kutendeka, ngono ikoku banowokuthama mu mimwedzi ili kutendeka kudusa zwamwi mu shango. 15 Bayendi banoyenda mu shango ha bebona fupa le nthu banobiga tjilakidzo ipapo kuswikila batshili balibona balitshile mu Nkuku wa Hamoni Gogo. 16 Kowobe ne nzi unodang'wa Hamona ipapo. Ndizo banowodusa zwamwi mu shango.’
17 “Ngono iwe nkololo we nthu, She Yahwe bakati, Dana ludzi gumwe ne gumwe gwe nyuni ne zwibandana zwe shango uti, ‘Kubunganani kudwa yeno na yeno mushanganile nzano we tjibhayilo tjandinomululwamisila, nzano nkulu we tjibhayilo pezhugwi kwe matombo e Iziraela ngono mowoja nyama mukang'wa malopa. 18 Mowoja nyama ye balume bakasima, mukang'wa malopa e makulukota e shango seungati nge e nyundo ne pkhwizana ne mbudzi ne mikono, dzose dzili dze Bhashani dzakakodziwa. 19 Mowoja mafuta mukaguta mukang'wa malopa mukalaladza ku nzano we tjibhayilo tjandinomululwamisila. 20 Pa bujilo gwamunowojila mowoja mukaguta nyama ye mbizi ne ye bataswi neye balume bakasima ne babhayani,’ kojalo She Yahwe.
Baiziraela bebgwiliziwa mu shango
21 “Ndowolakidza gudzo langu pakati kwe njudzi, ngono njudzi dzose dzowobona kusumikilisa kwangu ne simba langu mu bali. 22 Bathu be Iziraela banowoziba kuti ndimi Yahwe Ndzimu wabo kudwa mu zhuba ilelo kuyenda mbeli. 23 Ngono njudzi dzowoziba kuti bathu be Iziraela bakati bakatapiwa ngekwe matjinyo abo ngoti bakabe bali mapitipiti kundili. Ndizo abasumbikila buso gwangu ngono abapa zwita zwabo ngono bose bakaligwa nge thumo. 24 Ndakababhata kuyendidzana nge kutemapala kwabo nenge zwibi zwabo, ndizo abasumbikila buso gwangu.
25 “Ndizo wali She Yahwe bakati, ‘Ngwenu ndowobuzila Jakubo makombolelo awe ngono ahwila ngoni bathu bose be Iziraela abe ne fupa ngekwe zina langu lakayengela. 26 Banowokangang'wa shoni dzabo, ne bupitipiti gwabo gose gwabakandithamila pabakabe betjila bakatebama mu shango yabo kusina ungabatjisa. 27 Ndowoti ndababuza kudwa mu njudzi, ndabakubunganya kudwa mu shango dze zwita zwabo ndowolakidza kuyengemala kwangu ndibo mu mesho e njudzi njinji. 28 Ipapo banowoziba kuti ndimi Yahwe Ndzimu wabo, ngoti kene ndibatatila mu butapiwa pakati kwe njudzi, ndowobakubunganyila muna yabo shango, kusina wandinosiya shule. 29 Anditjahwobasumbikila buso gwangu kakale, ngoti ndowotebulila meya yangu mu Bathu be Iziraela, kojalo She Yahwe.’ ”
© Kalanga Bible © Bible Society of Botswana, 2008, 2018.