Ndzimu unogadzabgwe kugwila bathu bawo
1 Ngono ngwenu yetji nditjo tjinolebgwa ndi Yahwe,
ibo bakakubumba iwe Jakubo,
ibo bakakuthama iwe Iziraela bakati,
“Usitje, ngoti ndakakudzutunula,
ndakakudana nge zina, iwe uwangu.
2 Unowoti upalama vula, ndowobe nawe,
kene utjuluka njizi adzitowokusenga.
Ha upalama moto awutowokupisa,
mithuto yawo ayitowokupisa.
3 Ngoti ndimi Yahwe, Ndzimu uwo,
ndi Wakayengemala we Iziraela, Ntjidzi uwo.
Ndodusa Egipiti se tjidzutunulo tjitjo,
ne Etopiya ne Seba ndobatenganya nawe.
4 Se udika kundili kakale ukudziwa,
kakale ndikuda,
ndodusa bathu mu tjimo tjitjo,
ndokutenganya ne zwitjaba kuti utjile.
5 Usitje, ngoti ndinawe,
ndowodusa bana babo kudwa ku bhezhuba,
ndowobakubunganya
ne kudwa ku golombedzo.
6 Ku bunandzwa ndowoti,
‘Ubazhise.’ Burwa ndowogudwa ati,
Usibabhatilile. Zhisani bakololo bangu kudwa kule,
ne bakololokadzi kudwa ku ndzibo we shango.
7 Mmwe ne mmwe wandakadana nge zina,
wandakabumbila gudzo langu,
wandakabumba kakale athama.”
8 Zhisani bathu ibaba bana mesho basingabone,
bana zebe koga abatohwa.
9 Kubunganyani zwitjaba zose,
bathu ngabakubungane.
Ndiupi mu bali wakaleba ikoku,
katibudza kutji kale zwithu zwe kutanga?
Ngabazhise batendeki babo kutendeka kuti banolebesa,
kuti bamwe bahwe bati, “Ku malebeswa.”
10 Imwi mu batendeki bangu,
kojalo Yahwe ne nlanda wangu wandakashalula,
kuti muzibe mugalemoyo mu ndili ne kuhwisisa kuti ndi iye.
Akuna ndzimu mmwe wakatongo bepo mbeli kwangu,
naiko akuna unowobepo shule kwangu.
11 Imi, ndimi Yahwe,
kuzhe kwangu imi akuna ntjidzi.
12 Ndakakuleba kusathu kukabepo atjidza azibisa
pakabe kusina ndzimu we butaya pakati kwenyu,
kakale mu batendeki bangu,
koleba Yahwe.
13 Ndi Ndzimu ne kuyenda mbeli ndowogala ndili iwo.
Akuna ungasunungula umu maboko angu,
tjandinothama akuna ungatjibgwiliza shule.
Pudzumuka mu Bhabhiloni
14 Yahwe banolebeleka,
ibo Ndzutunuli wenyu, ibo Wakayengemala we Iziraela bakati,
“Ndowotuma ngwa kunobhayana ne Bhabhiloni nge kwenyu,
ndowovuna panda dze mikoba,
Bakhaladiya mima yabo inowobe ye tjililo.
15 Ndimi Yahwe, ndi wenyu Wakayengemala,
mbumbi we Iziraela, mambo wenyu.”
16 Yahwe banolebeleka,
ibo banozhula zila mu gungwa,
banozhula zijana mu vula dzina masimba,
17 ibo banokunda koloyi dze ngwa ne mbizi,
ngwa ne babhayani, banowila pasi,
bakasitongo muka kakale,
kobe kwapela ku bali,
bakanga luvone gwadzimiwa.
18 “Musialakane zwithu zwe kutanga,
kene kukumbula zwithu zwa ntolo.
19 Bonani, ndabe pejo ngothama tjithu tjitshwa,
ngono tjoshingikala kale,
amutotjibona kene?
Ndowozhula zila mu tjilambanyika
ne njizi mu shango yakawoma.
20 Phuka dze shango dzowondikudza,
phungubgwe ne fukumudzi,
ngoti ndodzipa vula mu tjilambanyika,
ne njizi mu shango yakawoma,
kupa bathu bangu, bashalugwa bangu, vula kungwa.
21 Bathu bandakazwibumbigwa,
kuita kuti bandikudze.
22 “Koga amuzondidana, iwe Jakubo,
koga ndakamunyadza, iwe Iziraela.
23 Amuzondizhisila pkhwizi dze zwibhayilo zwinopisiwa,
kene kuli kundikudza nge zwipo zwenyu.
Andizomulemesela nge zwipo zwe mathunde,
kene kumunyadza nge motsha.
24 Amuzotongo nditengela pkhwe inozipa nge mari,
kene mukandigutsha nge mafuta e zwipo zwenyu.
Koga makandikhiga ntolo we zwibi zwenyu,
makandinyadza nge milandu yenyu.
25 Imi, ndimi tshumula matjinyo enyu nge kwangu,
kakale andingakumbule zwibi zwenyu.
26 Ngati yendeni ku lubazhe,
munondilakidza nlandu wangu.
Bikani ndebo yenyu,
ndizo mutendekegwe kuti makatambunuka.
27 Tate benyu be kutanga bakatjinya,
balebelekeli benyu bakandipandukila.
28 Ndizo wali ndolingila pasi
batungamili be bugalo gwakayengemala,
ngono ndowothama kuti Jakubo akolomodziwe,
Iziraela unowosapugwa.
© Kalanga Bible © Bible Society of Botswana, 2008, 2018.