1 Dama lakaamutjigwa nge Nlebesambeli Habakuku.
Ng'ong'olo dza Habakuku
2 Kowotola tjibaka tjingapani Yahwe, ndikumbila bhatsho,
koga imwi musingahwilile?
Ndimimilila kumuli nditi, “Phipiti,”
ngono musingatjidze?
3 Ini muthama kuti ndibone tjisakatambunuka,
ndilinge mbipo kene?
Golomodzo ne phipiti zwimbeli kwangu,
kugwa ne kumukilana ku pamwe ne pamwe.
4 Ndizo wali nlayo wadzinganyidziwa,
kutambunuka akuna pakunobepo.
Ngoti babi banokombeledza balulwami,
ndizo kuti kutambunuka kuleyane.
Dabilo ya Yahwe
5 Linga zwitjaba ubone!
Ngono ukaabale! Udzidzibale!
Ngoti ndowoshinga tjimwe mu mazhuba awo,
tjausingawogalamoyo,
nenguba ungabe watjibudziwa.
6 Ndomilidza Bakhaladiya,
bathu ibabaje banotjisa bana majatu,
banoyenda shango yose
betapa magalo asiabo.
7 Banotjisa kakale banotjika,
banozwithamigwa nlayo nge kwabo,
banolumbidza gudzo labo.
8 Mbizi dzabo dzina lubilo kupinda dindingwe,
banotjisa kupinda phele mu zhalima,
mbizi dzabo dzomatha ha dzinginilila.
Batathi badzo banodwa kule,
banowuluka se dzu lidzamulila kunoja.
9 Banozha bose bezhila phipiti,
bedwilila bakalinga mbeli
bekubunganya batapiwa bangapa nsetje nge bunji.
10 Banokuwelela bomambo,
bakadadila babusi.
Banoseka mizi mikulu yose ye matizhilo yakasima,
bebe bebaka matuluthulu e mavu beitapa.
11 Ipapo bebe bepinda se phepo bedwilila,
bana nlandu, ibo banoti simba labo ndzimu wabo.
Habakuku unong'ong'ola kakale
12 Imwi Yahwe apa amuzobepo kudwa ntolo tjose kene?
Ndzimu wangu, Nyengemali wangu, iswi atitowofa.
Imwi Yahwe makabatjwayila kusumikilisiwa,
Imwi Shongwe makabashalulila kulobgwa shamu.
13 Mesho enyu mabuyanana kwaasakafanila kulinga mbipo,
amungaletjedzele tjisiitjo tjishingikala.
Ini ngono mu letjedzela batjebeli?
Munyelelileni babiibi
belobesa bakalulwama kubapinda saikoku wali?
14 Makathama bathu bakanga hwobe dze gungwa,
bakanga zwibumbiwa zwe gungwa zwisina mbusi.
15 Tjita tjibi tjobakweba bose nge zwiweko,
tjobabhatshila nge gwanga gwatjo,
unowobakubunganya mu dandi lile,
ndizo ebe eshatha eshongozhela.
16 Ndizo wali ebe edusila zwibhayilo gwanga gugwe
ebe episila dandi lile motsha,
ngoti gwanga gugwe go ntjidzila mu ipepkhwe
eguta zojiwa zwinozipa.
17 Apa unowodwilila emola gwanga gugwe,
elobesa zwitjaba asina ngoni tjatjose kene?
© Kalanga Bible © Bible Society of Botswana, 2008, 2018.