Kufuluka 29 - Kalanga Bible (KBTP)

Kuzhodziwa kwa Aroni ne bakololo babe

1 Yahwe bakadwa Mushe bakati, “Etji nditjo tjaunowothama kubali kubayengemadza kuti bandishingile bali bapirisiti: Utole nkong'wana ne nyundo dzili mbili, dzose dzibe dzisina bulema. 2 Utole tjiwunga tjisina mbidzo tjakavangiwa nge mafuta ne makhekhe asina mbidzo akavangiwa nge mafuta ne makokisi akatshambigwa akawala akazhodziwa mafuta asina mbidzo. Uzwithame nge bgwisa gwakanathiwa. 3 Uzwilonge mu seme ing'ompela, uzwizhise, uzhise ne nkong'wana ne nyundo mbili.

4 “Uzhise Aroni ne bakololo babe pa nkoba we nshasha we bushanganilo ubangudze nge vula. 5 Utole zwiambalo, uambadze Aroni hazu yakusi ne tjiambalo tjinongina kusi kwe efodi, uambadze efodi ube ubiga tjiambalo tje pa ifuba ube unsunga nge ntjili wakanakisiwa we efodi wakalukwa nge bunyambi.Efodi ne tjiala 6 Uambadze tjiala mu nsholo ube usungilila tjileitana tjakayengemala pezhugwi kwe tjiala. 7 Ube utola mafuta e kuzhodza uadile mu nsholo uwe unzhodze.

8 “Uzhise bakololo ba Aroni ubaambadze hazu, 9 Usunge Aroni ne bakololo babe nge mimwandabula kakale ubaambadze zwialana. Ndiko nshingo we bupirisiti unowobe wabo nge kusingapele. Ndiyo zila yaunowotjwaya Aroni ne bakololo babe ndiyo iyeyi.

10 “Uzhise nkono mbeli kwe nshasha we bushanganilo. Aroni ne bakololo babe babige maboko abo pezhugwi kwe nsholo wawo 11 ngono iwe ubulayile nkono iwoyo pana Yahwe pa nkoba we nshasha we bushanganilo. 12 Utole mamwe e malopa e nkono uazhodze mu nyanga dze tjibeso tjinopisigwa zwibhayilo nge tjinyala tjitjo, malopa asala uatebulile pasi kwe tjibeso tjinopisigwa zwibhayilo. 13 Utole mafuta wose akaangila zwimukati ne theswi ye tjilopa ne so mbili ne mafuta amu dzili uapise mu tjibeso tjinopisigwa zwibhayilo. 14 Koga nyama ye nkono ne ganda ne nswane wayo uzwipisile kuzhe kwe bukotokelo, tjibhayilo tje tjibi.

15 “Utole imwe nyundo, Aroni ne bakololo babe babige maboko abo pa nsholo wayo. 16 Iwe ube ubulaya nyundo iyeyo. Utole malopa ayo uanyase mu tjibeso tjinopisigwa zwibhayilo ne kutjipoteleka. 17 Ipapo ube utemelela nyundo iyeyo ibe zwitibhu tibhu, usuke zwamukati zwayo ne makumbo ayo, kose ikoku ukubige pezhugwi kwe nsholo ne zwitibhu zwimwe. 18 Upise nyundo yose iyeyi mu tjibeso tjinopisigwa zwibhayilo, ikoku tjibhayilo tjinopisiwa tja Yahwe, nnuhwo unozipa, tjibhayilo tjinopisigwa Yahwe.

19 “Utole nyundo imwe, Aroni ne bakololo babe babige maboko abo pa nsholo wayo. 20 Iwe ube ubulaya nyundo iyeyo, mamwe e malopa ayo uazhodze theswi ye zebe ye luji ya Aroni ne mu theswi dze zebe dze luji dze bakololo ba Aroni ne mu zwinyala zwabo zwikulu zwe ku luji zwe maboko ne zwe makumbo, malopa asala uanyase kupoteleka tjibeso tjinopisigwa zwibhayilo. 21 Ipapo utole mamwe e malopa apa tjibeso tjinopisigwa zwibhayilo ne mamwe e mafuta e kuzhodza ube uzwinyasa Aroni ne zwiambalo zwizwe ne bakololo babe ne zwiambalo zwabo, ndizo iye ne zwiambalo zwizwe ne bakololo babe ne zwiambalo zwabo banowobe bayengemala. Unowobe ayengemala ne bakololo babe ne zwiambalo zwabo banowobe bayengemalabo naye.

22 “Utole mafuta e nyundo iyeyi ne bhesu layo lakakola ne mafuta akaangila zwamukati ne theswi ye tjilopa ne so mbili ne mafuta adzo ne tjidzwa tjayo tje ku luji ngoti ngeye kutjwayiwa kwe bapirisiti. 23 Utole tjiwunga ne khekhe zwakavangwa nge mafuta, ne kokisi mu seme ye zwiwunga zwisina mbidzo ipana Yahwe. 24 Kose ikoku ukulonge mu maboko a Aroni ne mu maboko e bakololo babe, bazwizunguze zwibe tjipo tjinozunguziwa pana Yahwe. 25 Ipapo ube uzwitola mu maboko abo uzwipise mu tjibeso tjinopisigwa zwibhayilo ne tjibhayilo tjinopisiwa kuli nnuhwo unozipa kuna Yahwe, ngobe tjibhayilo tjinopisigwa Yahwe.

26 “Utole ifuba tje nyundo tjekuzhodzegwa bupirisiti kwa Aroni utjizunguze tjibe tjibhayilo tjinozunguziwa pana Yahwe, ngono tjibe ntezho uwo.

27 “Ube uyengemadza ifuba tjazunguziwa ne tjidzwa tje ntezho we bapirisiti tjazunguziwa tjinopiwa kudwa mu nyundo ye kutjwayila se ili ya Aroni ne bakololo babe. 28 Ikoku kowogala kuli kwa Aroni ne bakololo babe nge kusingapele uli ntezho we bapirisiti upiwa nge Baiziraela kudwa mu tjibhayilo tjabo tje mbakisano tjibhayilo tjabo bebhayila Yahwe.

29 “Zwiambalo zwa Aroni zwakayengemala zowosalila bakololo babe asinotjinyika, banowozwiambala ha betjwayiwa. 30 Nkololo uwe unowobe abe mpirisiti mu bumo gugwe unowozwiambala mazhuba ali kutendeka ha engina mu nshasha we bushanganilo kushinga mu bugalo gwakayengemala.

31 “Utole nyundo ye kuzhodziwa kwe bapirisiti ubhikile nyama yayo pa bugalo gwakayengemala. 32 Aroni ne bakololo babe bajile nyama iyeyo ye nyundo ne tjiwunga tjisina mbidzo tjimu seme pa nkoba we nshasha we bushanganilo. 33 Baje zwibhayilo zwashingisiwa mu kubadzutunula kubatjwayila bupirisiti ne kubayengemadza, koga mmwe nthu koga unodwa kuzhe asitongo zwija ngoti zwakayengemala 34 Ha kungabe ne nyama ye kutjwayila yasala kene tjiwunga kuswikila tjimuka uyipise, isitongo jiwa ngoti yakayengemala.

35 “Uthamile Aroni ne bakololo babe tjimwe ne tjimwe tjandakudwa mu mazhuba ali kutendeka ubatjwaye sekwa ndakudwa. 36 Mazhuba wose ubhaye nkono ili tjibhayilo tje jinyo tje kudzutunugwa. Uthamilebo tjibhayilo tje tjibi tjibeso tjinopisigwa zwibhayilo kutjitjenapadza. Tjibeso utjizhodze mafuta kutjiyengemadza. 37 Mu mazhuba ali kutendeka uthame tjibeso tjinopisigwa zwibhayilo tje kugadzanya, utjiyengemadze ndizo tjibeso tjinopisigwa zwibhayilo tjowobe tjakayengemala kupindisa, tjimwe ne tjimwe tjinowokutha tjibeso tjinopisigwa zwibhayilo tjowoyengemala.

Zwipo zwe zhuba ne zhuba

(Mbalo 28:1-8)

38 “Zwaunowopa uzwipisa mazhuba wose mu tjibeso tjinopisigwa zwibhayilo usingamise ndiyezwi: Pkhwizana dzili mbili dzina gole ling'ompela. 39 Uyise pkhwizana ing'ompela mangwanana, imwe uyise madekwana. 40 Upe kang'ompela ne pkhwizana ye kutanga bgwisa gwe koroni gwakanathiwa guli tjilizanyo tje efa gwakashanganyiwa ne mafuta e ntoba anolizana zwilizanyo zwinna mu hini ne nkumbi we zhambi unolizana themba ne mafuta kuli tjipo tjinotebuligwa pasi. 41 Pkhwizana imwe uipile madekwana kang'ompela ne tjipo tje mathunde ne tjipo tjinotebuligwa pasi sekwa unothama mangwanana, kube nnuhwo unoshathisa unopisiwa, tjili tjibhayilo kuna Yahwe. 42 Ikoku kube tjibhayilo tje misi yose tjisingame mu zwizekugwana zwenyu tjithamigwa pa nkoba we nshasha we bushanganilo pana Yahwe, ipo pandinowoshangana namwi kulebeleka nawe. 43 Ipapo ndipo pandinowoshangana ne Baiziraela ngono panoyengemadziwa nge tjedza tjangu 44 Ndowoyengemadza nshasha we bushanganilo ne tjibeso tjinopisigwa zwibhayilo, na Aroni ne bakololo babe ndowobayengemadza kundishingila bali bapirisiti. 45 Ngono ndowogala pakati kwe Baiziraela ndibe Ndzimu wabo. 46 Ibo banowoziba kuti ndimi Yahwe Ndzimu wabo wakabadusa mu shango ye Egipiti kuti ndizo ndigale pakati pabo, ndimi Yahwe Ndzimu wabo.