Nkadzi we Nshunami unoshanduka
1 Ngwenu Elisha wakabe adwa nkadzi waakabe apodzela mwana eti, “Milika uyende ne bensha uwo ngono munolubila ngobe Yahwe badana bhamba mushango linowokweba kwe makole ali kutendeka.” 2 Ndizo nkadzi kamilika ngono kathama kuyendidzana nge dama le nlume we Ndzimu, nkadzi kayenda ne bensha uwe ngono bakanogala ku shango ye Bafilisitiya kwe makole ali kutendeka. 3 Ngono kwakati kubupelo gwe makole ali kutendeka, nkadzi ebuya edwa kushango ye Bafilisitiya, kayenda kuna mambo kunokumbila ng'umba iye ne shango iye. 4 Mambo bakabe belebeleka na Gehazi nlanda we nlume we Ndzimu beti, “Undibudze zwithu zose zwikulu zwakathamiwa ndi Elisha.” 5 Ngono kwakati Gehazi atjabudza mambo kuti Elisha wakamusa nfi tjini, bonani, nkadzi wakamusigwa nkololo ndi Elisha kangina kuwokumbila ng'umba ne shango iye kuna mambo. Ngono Gehazi kati, “Tetshi wangu, mambo, nkadzi wakhona ndiye iwoyu ne nkololo uwe ndiye iwoyu wakamusiwa ndi Elisha.” 6 Mambo kabhuzwa nkadzi ngekwako, ngono nkadzi kambudza. Ndizo mambo kadusila nkadzi iwoyu mmwe we batungamili, kandwa kati, “Umbgwilizile tjimwe ne tjimwe tjakabe tjilitjitje, kose ne zwakabhuda mu nnda, kudwa muzhuba laakabhuda mu shango kuswikila ngweno.”
Elisha na Mambo Bhenihadadi we Siriya
7 Elisha kayenda ku Damasiko, ngono Bhenihadadi mambo we Siriya wakabe egwala. Ngono mambo bakati bebudziwa kuti, “Nlume we Ndzimu wabuya ipapa,” 8 mambo bakadwa Hazaele bakati, “Tola tjipo uyende unoshangamidza nlume we Ndzimu. Ubhuzwe Yahwe ndiye uti, ‘Apa ndowopola mu bugwele igogu kene?’ ” 9 Ndizo Hazaele kayenda kunonshanganidza ngono katola tjipo tje zwithu zose zwakanaka zwakasiyasiyana zwe Damasiko kuli ntolo we kamela dzili makumi manna (40). Wakati eswika kama mbeli kukwe kati, “Nkololo uwo Bhenihadadi mambo we Siriya wandituma kukuli kati, ‘Apa ndowopola mu bugwele igogu kene?’ ” 10 Elisha kashandula eti, “Yenda unondwa uti, ‘Unowopola tjose,’ koga Yahwe bandilakidza kuti unowofa.” 11 Ngono kamusa nsholo kanlinga kwazo, kudzina Hazaele ebakhwa nge shoni. Nlume we Ndzimu kalila. 12 Ngono Hazaele kabhuzwa eti, “Ini tetshi wangu e lila kene?” Kanshandula eti, “Ngobe ndoziba mbipo yaunowothamila bathu be Iziraela, unowolotesa matizhilo abo, ngono ukabulaya bazhuzha babo nge thumo, upkhwanyila bana babo pasi, upubula mitumbu ye bakadzi babo bakazwisenga.” 13 Ngono Hazaele kabe eti, “Apa nlanda wenyu, tjibgwamatuni tjakajali, ungathama tjithu tjikulu zwingapa tjini kene?” Elisha kadabila eti, “Yahwe bandilakidza kuti unowobe mambo we Siriya.” 14 Ndizo akabhuda pana Elisha ka bgwilila kuna tetshi uwe. Kwakati Bhenihadadi embhuzwa eti, “Elisha wakudwa etini?” Ngono kadabila kati, “Wandidwa kati tjoselele mowopola.” 15 Koga kwakati tjimuka, katola ngubo kaidubika mu vula kaiwala mubuso gwa mambo kuswikila befa. Ndizo Hazaele kan'gala thaka.
Jehoramu mambo we Juda
(2 Zwiyitikalo 21:1-20)16 Mu gole le bumakumi mashanu (50) la Joramu nkololo wa Ahabu mambo we Iziraela, Jehoramu nkololo wa Jehoshafati mambo we Juda katangisa kubusa. 17 Wakatangisa kubusa ana makole ali makumi matatu ana mabili (32), ngono kabusa makole ali zhanakadzi mu Jerusalema. 18 Ngono kayenda mu zila ya bomambo be Iziraela, koga sekwakathama be nsha wa Ahabu, ngobe wakabe alobola nkololokadzi wa Ahabu. Ngono kathama mbipo mbeli kwa Yahwe. 19 Nenguba kwakajalo, ngekwe nlanda wabo Dafite, Yahwe bakasishathile kolomola Juda. Bakabe bagadzabgwe kuti banowobapa luvone iye ne bakololo babe tjatjose. 20 Mu misi ya Jehoramu, Edomu yakapandukila Juda ngono ikazwibigila mambo wayo. 21 Ndizo Joramu kayenda ku Zayiri ne koloyi dzidze dzose dze ngwa, kamuka busiku kakunda Baedomu bakabe bakankomba iye ne balauli babe be koloyi dze ngwa, koga ngwa iye ikatizhila kanyi. 22 Ndizo Edomu yakapandukila Juda kuswikila nasi. Libina ikapandukabo mu tjibaka itjetjo. 23 Ngekwe mimwe mishingo ya Joramu na zose zwaakathama, zwakakwagwa mu Lukwalo gwe Zwiyitikalo zwa Bomambo be Juda. 24 Jehoramu kanonyatutuka na botate babe ngono kabiganyiwa nabo mu Nzi nkulu wa Dafite. Ngono Ahaziya nkololo uwe kan'gala thaka.
Ahaziya mambo we Juda
(2 Zwiyitikalo 22:1-6)25 Mu gole le bugumi lina mabili la Joramu nkololo wa Ahabu mambo we Iziraela, Ahaziya nkololo wa Jehoramu katangisa kubusa. 26 Wakatangisa busa ana makole ali makumi mabili ana mabili (22), ngono kabusa gole mu Jerusalema. Zina la mmeyabe kwakabe kuyi Athaliya ali tjizekugwana tja Omiri mambo we Iziraela. 27 Naiyebo wakayenda muzila ye be nsha wa Ahabu ngono kathama mbipo mu mesho a Yahwe, sekwakathama be nsha wa Ahabu, ngobe wakabe ali nkwasha we be nsha wa Ahabu. 28 Ahaziya wakayenda na Joramu nkololo wa Ahabu kunogwa na Hazaele mambo we Siriya ku Ramotigiliyadi, iko Basiriya kwabakakubadza Joramu. 29 Ngono Mambo Joramu kabgwilila ku Jezerele kuti anolapiwa mbonje dzaakadusiwa nge Basiriya ku Ramotigiliyadi mu ngwa iye na Hazaele mambo we Siriya. Ngono Ahaziya nkololo wa Joramu mambo we Juda kayenda kunoshola Joramu nkololo wa Ahabu mu Jezerele, ngobe wakabe egwala.
© Kalanga Bible © Bible Society of Botswana, 2008, 2018.