Tjibi tja Nadabu na Abihu
1 Bakololo ba Aroni Nadabu na Abihu, mmwe ne mmwe wabo wakatola lukambana gunobesela moto, kalonga masimbe anothuta mukati ebe elonga motsha mu guli; ebe eyisa moto usakayengemala kuna Yahwe, basakaulauligwa ndi Yahwe. 2 Tjinyolotjo Yahwe bakadelusa moto ukabapisa bakafila ipapo, mbeli kwa Yahwe. 3 Ipapo Mushe kadwa Aroni kati, “Yahwe bakalebeleka beti, ‘Ndowozwilakidza ndakayengemala kuna banozwisedzedza pejo nami, kakale ndowokudziwa mbeli kwe bathu bose.’ ” Ngono Aroni kanyalala koga.
4 Mushe kadana Mishaele na Elizafani, bakololo ba Uziele batatenini ba Aroni, kabadwa kati, “Sedzelani muduse zwitumbu zwe bana ba batatenini benyu mu bugalo gwakayengemala muzwiyise kuzhe kwe bukotokelo.” 5 Ndizo bakazha bakabasenga nge hazu dzabo bakabadusila kuzhe, sekwaleba Mushe.
6 Mushe kadwa Aroni ne bakololo babe Eleazari na Ithamari kati, “Musitongoletja mavudzi enyu elembeleka musingaakame ne zwiambalo zwenyu musitongozwipalula, amungakuthama muijalo mowofa, kakale Yahwe bangazhalila gubungano lose bushongola. Koga zwikamu zwenyu, ng'umba yose ye Iziraela, ingagala tjililo tje lufu igogu gwabangiwa nge moto wapisiwa ndi Yahwe. 7 Musitongobhuda mudwa pa nkoba we nshasha we bushanganilo, ha mungabhuda mowofa, ngobe makazhodziwa nge mafuta a Yahwe.” Ngono bakathama sekwa badwiwa ndi Mushe.
Milayo ye bapirisiti
8 Ndizo Yahwe bakadwa Aroni bakati, 9 “Musitongong'wa nkumbi we zhambi kene tjing'o tjinolaladzisa, ha mungina mu nshasha we bushanganilo, ha mungathama muijalo mowofa, kube nlayo kuyenda nge zwizekugwana zwenyu zose. 10 Makafanila thubukanya zwakayengemala ne zwisakayengemala ne zwakatemapala ne zwakatjenapala. 11 Wakafanila diya bana be Iziraela milayo yose yabakapiwa ndi Yahwe nge nlomo wa Mushe.”
12 Mushe kadwa Aroni na Eleazari na Ithamari bakololo babe bakabe basala kati, “Tolani tjipo tje mathunde tjakasala mu tjipo tjinopisiwa mu moto tjipisigwa Yahwe, mutjije tjisina mbidzo pa hwunde ne tjibeso tjinopisigwa zwibhayilo, ngobe tjakayengemala kwazo. 13 Mutjijile mu bugalo gwakayengemala, ngobe i gobe lenyu ne bakololo benyu, lakadwa mu tjipo tjinopisiwa mu moto tjipisigwa Yahwe, ndiko sekwa ndakadwiwa ndi Yahwe. 14 Koga ifuba tjakazunguziwa ne tjidzwa tjadusiwa mowozwija iwe ne bakololo babo ne bakololokadzi babo muli mu bugalo gumwe ne gumwe gwakatjenapala. Ngobe makazwipiwa zwili gobe lilo ne gobe le bakololo babo zwidwa mu tjibhayilo tje mbakisano tje bathu be Iziraela. 15 Tjidzwa tjakadusiwa ne ifuba tjakazunguziwa zowozhisiwa ne mafuta anopisiwa nge moto zwibe zwipo zwinopisiwa mu moto zwakazunguziwa mbeli kwa Yahwe, ngono zwibe gobe lilo ne bakololo babo nge kusingapele, Yahwe sekwabakalaula.”
16 Mushe kashakisisa ngekwe mbudzi ye tjibhayilo tje tjibi, ngono bona, yakabe yapisiwa! Mushe kagwadzila moyo bakololo ba Aroni Eleazari na Ithamari bakasala pafa, ebhuzwa eti, 17 “Apa ini musakaja tjibhayilo tje tjibi mu bugalo gwakayengemala kene? Tjakayengemala kwazo kakale matjipiwa kuti muduse nlandu we gubungano kuligadzanya na Yahwe. 18 Bonani, malopa atjo aazozhisiwa mukati kwe bugalo gwakayengemala. Ndizo mabe makafanila kube matjijila mu bugalo gwakayengemala sekwa ndakamudwa.”
19 Ngono Aroni kadabila Mushe eti, “Bonani, bayisa tjibhayilo tje tjibi ne tjibhayilo tjinopisiwa mbeli kwa Yahwe nasi, ngono nenguba kwakajalo, ndawigwa nge zwithu zwakajali! Apa ha ndabe ndakaja tjibhayilo tje tjibi nasi, apa tjobe tjaamutjilika mbeli kwa Yahwe kene?” 20 Kukati Mushe ehwa ikoku, kawila zwilopa.
© Kalanga Bible © Bible Society of Botswana, 2008, 2018.