Mbhatshi we Iziraela
1 Nyalalani munditeedze, imwi shango dzimu tjekelo dze gungwa,
bathu ngabamusidzile matatabuko abo,
ngabasedzele ngono balebeleke,
ngatishanganeni pa lubazhe panosumikilisigwa.
2 Ndiani wakaweba nkundi kudwa ku bhezhuba,
endana nge ndulamo kuwoshinga nshingo uwe?
Banolonga zwitjaba mu maboko awe,
bakatebamisa bomambo pasi kukwe.
Unobatemela pasi nge bukanu gugwe bakanga hwuluba,
unobapaladza nge dati lile bakanga bunye guwulusiwa nge phepo.
3 Unotatana nabo koga edwilila kusina tjinodziidza,
ali mu zila yaasakatongo tshamba.
4 Ndiani kene wakakuthama ikoku?
Ndiani wakasika njudzi kudwa mu kutangisa?
Imi Yahwe ndimi ndakabe ndilipo mu kutangisa,
ne ku bupelo ndowobe we bupelo.
5 Shango dzimu tjekelo dze gungwa dzakabona dzikatja,
phelelo dze shango dzakatetema,
dzakasedzela pejo dzikazha.
6 Imwe ne imwe inobhatsha mbakidzani wayo,
ikadwa ikamu tjayo ikati,
“Sima.”
7 Mbezhi unokulumbidza nthuli we golide,
unobuyapidza nge hamuli unokulumbidza unokatshakatsha kupa mbumbiko eti,
“Kwakanaka.” Banobhatshanya ifano nge zwipikiri
kuti tjisitongo zunguzika.
8 Koga iwe Iziraela, nlanda wangu,
iwe Jakubo wandakashalula,
ludzi gwa Abhurahama nzwalani wangu.
9 Ndakakutola ku phelelo dze shango,
ndakakudana kudwa mu midzibo ikule
nditi, “Iwe unlanda wangu,
ndakakushalula, andizokulashila kutjena.”
10 Usitje ngoti imi ndinawe,
usitemeke mafupa ngoti ndi Ndzimu uwo.
Ndowokusimisa, ndowokubhatsha.
Ndowokutabila nge luboko gwangu gwakalulwama gwe luji.
11 Bona, bose bakakugwadzila moyo
banowobhakhwa nge shoni bakashushubala.
Banogwa nawe,
abatowobe tjimwe ngono banowoloba.
12 Unowobashaka ibabo banogwisana nawe,
koga awutowobawana,
ibabo banogwa nawe
abatowonga tjimwe.
13 Ngoti imi Yahwe Ndzimu uwo
ndakakubhata nge luboko gwe luji.
Ndimi ndinokudwa nditi, “Usitje,
ndowokubhatsha,”
14 Usitje iwe gonye Jakubo,
imwi balume be Iziraela,
ngoti imi ndowomubhatsha.
Koleba Yahwe.
Ndzutunuli wenyu, Wakayengemala we Iziraela.
15 Bonani, ndowomuthama tjileyi tjinoshokola,
tjitshwa tjina meno anopitsha.
Mowoshokola matombo mukaapkhwanya,
matuthu iwo moasiya enga bunye.
16 Mowobawulusa ngono phepo ikabasengela kutjena,
dutu ilo lowobapaladza.
Ngono ipapo mowoshatha muna Yahwe,
muna Wakayengemala we Iziraela mowokudza.
17 Bashayi ne banosheta ha beshaka vula,
koga vula kusina,
ngono bawoma nge nyota,
imi Yahwe ndowobadabila.
Imi Ndzimu we Iziraela andingabalashe.
18 Ndowothama njizi pezhugwi kwe shongwe dzipa lubala,
ne misenya ye vula mu mikuku.
Ndowothama dziba le vula mu tjilambanyika
ne mu shango yakawoma kowobe ne misenya ye vula.
19 Mu tjilambanyika ndowomedza misida
ne miwunga ne miritile ne mitoba,
mu tjilambanyika ndowomedza misipuri,
ne mitjetjeni ne miti ye payini,
20 kuti bathu babone bazibe,
bakumbule bahwisise,
kuti luboko gwa Yahwe gwakakuthama ikoku,
kuti Wakayengemala we Iziraela wakakubumba.
21 Yahwe bakati, “Bikani ndebo yenyu,
lebani tjamunong'ong'ola ngekwatjo.”
Kojalo mambo wa Jakubo.
22 Zhisani zwifano zwenyu zwitibudze
tjinowoshingikala.
Mutibudze kuti zwe kutanga kushingikala ndi zwipi,
ndizo tizwikumbule,
ngono tizibe bheledzo lazo,
kene mutibudze zwinozha.
23 Mutibudze tjinowoshingikala kudwa ipapano,
kuyita kuti tizibe kuti mu midzimu,
thamani tjakanaka kene tjakabipa,
kuyita kuti tipaluke moyo titje.
24 Bonani, nge malebeswa amutemuli tjimwe,
ne tjamungashinga akuna,
ha alipo ungamushalula unoshimika.
25 Ndakadzonga mmwe ku bunandzwa, ngono unozha
edwa kunobhuda zhuba unowodana zina langu.
Unotshamba babusi se unotshamba vu,
se mbumbi esinyanga ntapkhwi.
26 Ndiani wakakuleba kudwa mu kutangisa, kuita kuti tizibe,
ndiani wakakuleba kusathu kukabepo, kuita kuti titi, “Unolebesa.”
Akuna wakakuleba, akuna wakakuzibisa,
akuna wakahwa matama enyu.
27 Ndimi we kutanga kukuzibisa Ziyoni,
ndakamilidza hwi abudza Jerusalema ndebo mbuya.
28 Koga ha ndilinga akuna ne ng'ompela,
pakati kwabo akuna nkumbuludzi
ungati ha ndibhuzwa kandidabila.
29 Bonani, bose koga abateli tjimwe,
akuna tjabangathama.
Midzimu yabo ye zwifano aiteli tjimwe.
© Kalanga Bible © Bible Society of Botswana, 2008, 2018.