Tjifaniso tje balimi mu nnda we mizhambi
(Matewu 21:33-46Luke 20:9-19)1 Jesu katangisa kulebeleka nabo nge zwifaniso eti, “Mmwe nlume wakati kathama nnda we mizhambi, kaushoshela, katsha gomba linokobolegwa zhambi pakati kwawo, kabaka thungamakole muuli, kawusayidza bamwe balimi, ngono iye kayenda ku imwe shango. 2 Kwakati tjabe tjibaka tje zhambi, katuma nlanda uwe kuti anontolela dzimwe zhambi dzadwa mu nnda we mizhambi. 3 Bakatola nlanda bakanloba, bakanshandusa akalembedza maboko. 4 Mweni we nnda kapapha katuma mmwe nlanda, ngono na iyebo bakaswika bakamphobola mu nsholo, bakanthama zwithu zwinobhatisa shoni. 5 Kabuya katumila mmwe nlanda kakale, bakaswika bembulaya, bakathama beijalo mu bamwe banjinji bakatumwa shule kukwe bakabaloba, bamwe bakababulaya. 6 Ngono wakabe atjisaligwa nge nkololo uwe waakabe eda kwazo. Gwe bupelo katuma iye, ezwidwa eti, ‘Banowoteta nkololo wangu.’ 7 Koga balimi ibabo be nnda bakalebeleka tje kwabo bakati, ‘Oyu ndiye n'gali we thaka, ngatimbulayeni, kuti ndizo thaka ibe yedu.’ 8 Bakambhata, bakambulaya, bakanlashila kuzhe kwe nnda we mizhambi.
9 “Mweni we nnda unowothama eyitini kene? Unowobuya kawolobesa balimi ibabo, ngono unowosayidza nnda iwoyo we mizhambi kuna bapoga. 10 Amuzobala matama amu hwalo dze Ndzimu anoti,
“ ‘Bgwe lakalambiwa nge babaki,
ndilo lakabe bgwe linotambunudza mbako;
11 ikoku kwakayitiwa ndi She,
ngono kotjenamisa mu mesho edu?’ ”
12 Batungamili be Bajuta bakashaka zila yabangansunga ndiyo, ngobe bakabe babona kuti unodwa ibo, koga bakatja mbunga we bathu. Ndizo bakansiya bakayenda.
Jesu unobhuzwiwa ngekwe kulipa lukhetho
(Matewu 22:15-22Luke 20:20-26)13 Batungamili be Bajuta bakantumila Bafarasi bamwe ne batobeli* ba Herode kuti bambhatshile mu ndebo dzidze. 14 Bakazha bakan'dwa bakati, “N'diyi, toziba kuti muna malebeswa, amuna hanya kuti nthu ndiani, nge kuti amutolinga mamo e bathu, koga nge malebeswa modiya zila ye Ndzimu. Apa kwakafanila kuti tilipe lukhetho kuna Kaisara kene tisilipe?”
15 Tigulipe kene tisigulipe? Koga Jesu kaziba butjengedzi gwabo, ngono kabadwa kati, “Apa ini mundilika kene? Zhisani ngeno loso ling'ompela ndibone.”
16 Ngono bakalizhisa. Kabadwa kati, “Ifano tjaani itjetji ne zina nge laani?” Bakanshandula bakati, “Nge zwa Kaisara.”
17 Jesu kabadwa kati, “Ipani Kaisara zwithu zwa Kaisara, mupe Ndzimu zwithu zwe Ndzimu.” Bakankaabalila.
Bhuzo ngekwe kumuka kwe bafi
(Matewu 22:23-33Luke 20:27-40)18 Basadusi, ibo bathu bakabe beti akutomukiwa mu bafi, bakazha kuna Jesu. Ngono bakambhuzwa bakati, 19 “N'diyi, Mushe wakatikwalila eti, ‘Ha nlume angafa esiya nkadzi asina bana, nnung'una we nfi wakafanila n'galathaka, kuti anthamile bana.’ 20 Kwakabe kuna bamwe balume bakazwagwa bali kutendeka, bali bana be nthu. Hwola katola nkadzi, ngono kafa ensiya asina mwana. 21 Nnung'una uwe kan'galathaka, ngono na iyebo kafa asina mwana naye ne we butatubo katobela. 22 Bose bali kutendeka bakasheta mwana wabasiya. Bhelelo nkadzi kafabo. 23 Mu kumuka kwe bafi, unowobe nkadzi waupi? Nge kuti bose bali kutendeka bakabe bakanlobola.”
24 Jesu kati ku bali, “Apa kusaziba hwalo kene simba le Ndzimu kwenyu ate iko kunomulasha kene? 25 Nge kuti ha bemuka mu bafi abatolobola, kakale abatolobogwa, koga banowobe benga batumwa be kudzimu. 26 Koga ngekwe kumuka kwe bafi, apa amuzobala kene mu lukwalo gwa Mushe panolebgwa ngekwe denje, kuti Ndzimu wakadwa Mushe ukati, ‘Ndimi Ndzimu wa Abhurahama, ndimi Ndzimu wa Isaki, ndimi Ndzimu wa Jakubo kene?’ 27 Ate Ndzimu we bafi, koga Ndzimu we batjili. Mose moleyanya.”
Ngekwe nlayo nkulu
(Matewu 22:34-40Luke 10:25-28)28 Mmwe we Badiyi be nlayo kati esedzela pejo, kabahwa benyanyayidzana, ngono kati ehwa kuti Jesu wadabila zubuyanana, kambhuzwa kati, “Ndiupi nlayo nkulu pa mimwe?”
29 Jesu kadabila kati, “Nlayo nkulu pa mimwe ndi hwoyu, ‘Hwililani imwi Baiziraela, She Ndzimu wedu, She bang'ompela. 30 Ida She Ndzimu uwo nge moyo uwo wose nenge meya iyo yose nenge nkumbulo uwo wose nenge masimba awo wose.’ 31 Nlayo nkulu kutobeledza ndihwoyu, ‘Ida mmwe nthu sekwa unozwida.’ Akuna mmwe nlayo unopinda iyeyi.”
32 N'diyi we nlayo kadwa Jesu kati, “Molebesa tjose, N'diyi. Malebesa kuti Ndzimu nng'ompela, ngono akuna mmwe Ndzimu kuzhe kwa iwo woga. 33 Ngono kuti tiwude nge moyo wose nenge njalakang'wa dzose nenge masimba wose nenge kuda mmwe nthu sekwa unozwida, ikoku kopinda zwipo zose zwinopisiwa ne zwimwe zwibhayilo.”
34 Jesu kati ehwa N'diyi we nlayo an'dabila nge butjenjedu, kan'dwa kati, “Aute uli kule kule ne bushe gwe Ndzimu.”
Kudwa ipapo akuna mmwe wakatongo shaka kumbhuzwa bhuzo kene ili yakatini.
Bhuzo ngekwe Mesiya
(Matewu 22:41-46Luke 20:41-44)35 Jesu kati ediya mu Ng'umba ye Ndzimu kati, “Ini badiyi be nlayo beti Mesiya nkololo wa Dafite kene? 36 Dafite nge kukwe wakati elaugwa nge Meya yakayengemala, kalebeleka kati,
“ ‘She bakati kuna She wangu,
gala ku luboko gwangu gwe luji
kudzina ndibiga zwita zwizo pasi kwe makumbo awo.’
37 “Apa Dafite ungati en'dana eti ‘She,’ ungabe nkololo uwe tjini kene?”
Bunjinji gwe bathu bakabe bakanhwilila gukashathisiwa nge ndebo iye.
Jesu unolaya bathu ngekwe badiyi be nlayo
(Matewu 23:1-36Luke 20:45-47)38 Mu zwidiyo zwizwe wakalebeleka eti, “Muzwitjengete mu badiyi be nlayo, banoda kuambala hazu ndefu ndefu ne kulezwiwa ku matengeselo. 39 Banoda magalo mabuyanana mu ng'umba ye ntembezelo ne kuda bugalo gwe mamo ha kuli mu mizano ye zojiwa. 40 Banotjebela tjilikadzi, bezwiyedza bathu bakalulwama nge mitembezelo yabo milefu. Shamu yabo inowobe hwulu.”
Tjipo tjakadusiwa nge tjilikadzi
(Luke 21:1-4)
41 Jesu kagala kulingisana ne panodusigwa zwipo zwe mari, kalingilila bathu banjinji belonga mari abo panolongwa zwipo mu Ng'umba ye Ndzimu. Bafumi banjinji bakalonga mari manjinji. 42 Kukazha nshayi we tjilikadzi kalonga mari mabili e themba tukununu tjose. 43 Ipapo Jesu kadana badiyiwa babe kabadwa kati, “Ndolebesa nditi, iyeyi tjilikadzi isina tjayo, yadusa kupinda bose. 44 Bamwe bawungunula mu fumwa yabo, koga iye nenguba ali nshayi, wadusa kose kwaanako mu butjilo gugwe.”
© Kalanga Bible © Bible Society of Botswana, 2008, 2018.