1 Ndoshaka kuti muzibe kuti ndomushingila kuli kungapani, kose neba ku Laodikeya na bose basathu bakabona tjiso tjangu, 2 kuti mimoyo yabo ikulumbidzike se bakabhatana mu ludo, kuti ndizo babe ne fumwa ye kuhwisisa nge buzhalo kakale babe ne luzibo gwe masazibgwe e Ndzimu, Kirisiti nge kukwe, 3 munli kwakasumbikwa matula e butjenjedu ne luzibo.
4 Ndomubudza ikoku kuti ndizo kushaye wamutjengela nge ndebeleko ye bupitipiti. 5 Ngobe nenguba ndisipo pamuli nge kwangu, ndi namwi mu meya, ngono ndoshatha kubona sekwa muli gedzikane kakale ne nge kugalamoyo kwenyu kwakasima muna Kirisiti.
Butjilo guzhele muna Kirisiti
6 Ndizoke, sekwa makaamutjila Kirisiti Jesu ali She, tjililani munli, 7 makadzikigwa munli kakale makabakwa munli, mukasimisiwa mu kugalamoyo sekwa makadiyiwa, muboka nge buzhalo.
8 Muyele njele kuti kushete wamutapa nge ndebeleko dze butjenjedu gwe bathu guzhele butjengedzi, gunodwa mu zwilenje zwe bathu, zwinodwa mu meya inolaula lubumbo igogu, ngono zwisingadwe muna Kirisiti. 9 Mbumbiko yose ye Ndzimu nge buzhalo igele mu mbili wa Kirisiti. 10 Ndizo mu kubhatana na Kirisiti makapiwa butjilo nge buzhalo, iye nsholo we ndaulo yose ne simba lose.
11 Munli makathumbigwa kusi nge buthumbi gunothamiwa nge bathu, koga nge buthumbi gunothamiwa ndi Kirisiti, gunodwa kusunungugwa kwenyu mu mbumbiko ye nyama. 12 Mu kudubikiwa makabiganyiwa na Kirisiti kakale mukamusiwa naye nge kugalamoyo kwamunako mu simba le Ndzimu, iwo wakammusa mu bafi. 13 Ngono imwi makatongobe makafa nge matjinyo enyu ne mukusathumbigwa kwe mibili yenyu. Ndzimu wakamuthama batjili mose na Kirisiti, shule kwe kutizwiibhatigwa zwibi zwedu zose.
14 Wakabukusha nkwalo we milandu yedu ne milayo inosunga kaidusa tjose nge kuikothomela mu tjileyanyo. 15 Ndzimu wakakunda babusi ne balauli, wakabadusila patjena nge kubakunda muna Kirisiti.
16 Ndizo musidumile ani kene ani kuti amutilike nlandu ngekwe zojiwa ne zwing'o ne misi ye mizano kose ne Nzano we Mwedzi ntshwa kene zhuba le Sabata. 17 Ezwi mitutshi ye zwithu zwinozha, ngono koga lebeswa lowang'wa muna Kirisiti. 18 Musitongo letjedzela ani kene ani kamuthama kuti mudume zwidiyo zwe manyepkhwa zwe kunamata batumwa be kudzimu ngoti kungathama kuti musiwane mbhayilo wenyu. Nthu unodiya saikoku wakabiga masimba awe kudiya nge zwaanobona zwe manyepkhwa, unozwikudza nge mikumbulo iyeyo yaanozwibumbila, koga nge lebeswa aana tjaangazwikudza natjo, 19 asakabhatilila muna Kirisiti, iye nsholo iwo unobhatshanya mbili nge tshinga kakale mbili unotjidziwa nge nsholo, ndizo mbili unokula nge kukula kunodwa ku Ndzimu.
Kufa ne kutjila na Kirisiti
20 Ha makafa na Kirisiti, ku meya ye lubumbo, ini mutjila se ungati mutji bathu be shango kene? Ini mulondolodza milayo yayo inoti, 21 “Usibhate etji! Usilabile woku! Usikuthe hwokuje?” 22 Milayo yose iyeyi yakalingisana nge zwithu zwinotjimbidza kupela ha zwishingisiwa; milayo inothamiwa nge bathu kakale ikadiyiwa nge bathu. 23 Milayo iyeyi inolingika se butjenjedu nge kuzwibigila milawana ye bululwami kuzwiyisa pasi kunozwithamigwa ne nge kuhwisa mbili zogwadza kwakapindilila ili zila ye kunamata Ndzimu; ngono azwitobhatsha nthu mu njemulo mbi dzakapindilila dze mbili.
© Kalanga Bible © Bible Society of Botswana, 2008, 2018.