LUKWALO GWE BUNNA
Ntembezelo wa Mushe nlume we Ndzimu
1 She, magala muli bugalo gwedu,
mu zwizekugwana zose.
2 Kwakati matombo asathu kabe yapo, kene kuli iko bumbiwa,
kene musathu mukabumba shango kene lubumbo,
kudwa mu tjibaka tjisingapele kunoti mu tjibaka
tjisingapele mu Ndzimu.
3 Mobgwiliza nthu mu hwuluba,
mube muti, “Bgwililani, imwi bana be bathu!”
4 Makole ali tjiwulu (1 000) mu mesho enyu,
anonga zhuba ling'ompela lipinda.
Kene anonga watji kuli busiku.
5 Motshwailila bathu kutjena, banonga mawoloto,
banonga bushwa gunomela kuli mangwanana,
6 mangwanana gopasula gukabe likulakula,
mu madekwana gotimbama guswaba.
7 Ngobe tolobesiwa nge kugwadzamoyo kwenyu,
totjisiwa nge bushongola gwenyu.
8 Makabiga zwibi zwedu mbeli kwenyu,
zwibi zwedu zwakasumbikika zwimu tjedza tje buso gwenyu.
9 Mazhuba edu wose anopitshiwa mu bushongola gwenyu,
makole edu anopinda se phepo.
10 Mazhuba e bupenyu gwedu makole ali makumi ali kutendeka koga,
kene pamwe ali makumi ali zhanakadzi, ha takasima,
nenguba kwakajalo paphidzo yawo
inobe yabe manyalo koga ne tshiyilo,
anotjimbidza apela, tibe tiwulukila kutjena.
11 Apa ndiani unoziba simba le kugwadzamoyo kwenyu?
Ngobe bushongola gwenyu bukulu,
golizana koga ne sekwa makafanila tjiwa ndiko.
12 Ndizo mutidiye kubala mazhuba edu
kuti pamwe ndizo tiwane moyo we butjenjedu.
13 Shandukani, imwi Yahwe! Apa kowodza kukabe lini kene?
Ibeni ne ngoni mu balanda benyu!
14 Mutigutshe mu mangwanana nge ludo gwenyu gusingazunguzike,
kuti ndizo tibe mu kushatha mazhuba wose.
15 Mutishathise mazhuba anolizana ne amakatigwadzisa,
ne makole ano lizana na iyawa atakabona mbipo.
16 Thamani kuti nshingo wenyu ulakidzike mu balanda benyu,
ne simba lenyu gulu ku bana be balanda benyu.
17 She Ndzimu wedu ngababe naswi,
thamani kuti mishingo ye maboko edu ibhudilile.
Ee, mishingo ye maboko edu ngaibhudilile!
© Kalanga Bible © Bible Society of Botswana, 2008, 2018.