Ezera 7 - Kalanga Bible (KBTP)

Swika kwa Ezera mu Jerusalema

1 Shule kwe zwithu izwezwi, mu tjibaka tje mbuso wa Atazezasi mambo we Pheshiya, Ezera nkololo wa Seraya ali nkololo wa Azariya, Azariya ali nkololo wa Hilikiya, Hilikiya ali 2 nkololo wa Shalumu, Shalumu ali nkololo wa Zadoki, Zadoki ali nkololo wa Ahitubu, 3 Ahitubu ali nkololo wa Amariya, Amariya ali nkololo wa Meraoti, Meraoti ali 4 nkololo wa Zeraya, Zeraya ali nkololo wa Uzi, Uzi ali nkololo wa Bhuki, Bhuki ali 5 nkololo wa Abishuwa, Abishuwa ali nkololo wa Finihasi, Finihasi ali nkololo wa Eleazari nkololo wa Aroni ntungamili we bapirisiti.

6 Ezera iwoyu wakabe edwa ku Bhabhiloni. Wakabe ali n'diyi, ana luzibo gukulu mu nlayo wa Mushe waakabe aupiwa ndi Yahwe Ndzimu we Iziraela. Mambo bakampa tjimwe ne tjimwe tjaakabe akumbila ngobe Ndzimu wakabe unaye. 7 Bathu bamwe be Baiziraela ne bapirisiti, Balevi, bambi, balisi be mikoba, bashingi be Ng'umba ye Ndzimu bakaswika ku Jerusalema mu gole le kutendeka le mbuso wa Mambo Atazezasi. 8 Ezera wakaswika mu Jerusalema mu mwedzi we bushanu mu gole le kutendeka le mbuso wa mambo. 9 Gwendo kudwa ku Bhabhiloni gwakatangisa mu zhuba le kutanga le mwedzi wekutanga ngono muzhuba le kutanga le mwedzi we bushanu kaswika mu Jerusalema ngoti tjiazha tje Ndzimu tjakabe tjinaye. 10 Ezera wakabe akazwimisila kuzwidiya, ne kusalashule nlayo wa Yahwe ne kuti kakale adiye ndaulo ne sumikiliso dzawo mu itjaba tje Iziraela.

Lukwalo gwa Mambo Atazezasi ekwalila Ezera

11 Oku ntutshi we lukwalo gwakadwa kuna Mambo Atazezasi guli gwa Ezera mpirisiti, n'diyi we nlayo, nlume wakazwidiya zose zwakalingisana ne milayo ya Yahwe ne ndaulo dzabo ku Iziraela:

12 “Atazezasi mambo wa bomambo, kuna Ezera we mpirisiti, n'diyi we nlayo we Ndzimu we kudzimu: Dumiliso.

13 “Ndolaula kuti, bose bathu be Iziraela kene bapirisiti ne Balevi bamu mbuso wangu, banoshaka kuyenda nawe ku Jerusalema ungayenda nabo. 14 Imi ne hadzasha dzangu dzili kutendeka, tokutuma kuti unoshakisisa tjimo ku Jerusalema ne Juda kuti nlayo we Ndzimu uwo, umu maboko awo unosagwa shule. 15 Kakale utole siliva ne golide zwakadusiwa ndi mambo ne hadzasha dzabo bezwidusila Ndzimu we Iziraela iwo unogala mu Jerusalema, 16 utole siliva yose ne golide zwa unowobe wawana mu ntuthu we Bhabhiloni kose ne zwipo zwe moyo ntjena zwe bathu ne bapirisiti zwidusigwa Ng'umba ye Ndzimu wabo mu Jerusalema.

17 “Mari iyawa uwashingise nge njele, utenge mikono ne nyundo ne pkhwizana, kose ne zwinopisiwa nazo, zwipo zwe mathunde ne zwe tjing'o, ngono uzwipise mu tjibeso tjinopisigwa zwibhayilo tje Ng'umba ye Ndzimu wenyu mu Jerusalema. 18 Ungashingisa siliva ne golide ne tjimwe ne tjimwe tjaunobona tjakalulwama, iwe ne bashingidzani nawe, nge kuda kwe Ndzimu wenyu. 19 Uyise zwija zose zwawakapiwa kuti zwishingisiwe mu Ng'umba ye Ndzimu, ku Ndzimu we Jerusalema. 20 Koga zwija zwimwe zwinoshakika zwe Ng'umba ye Ndzimu uwo, zwawakafanila kuishakila, uzwilipe nge mari e dula la mambo.

21 “Ngwenu imi Mambo Atazezasi ndolaula kuti babhati be mari e matula e bushe mu Golombedzo le Yufuratesi bape Ezera we mpirisiti, n'diyi we nlayo we Ndzimu u kudzimu, tjimwe ne tjimwe tjaanomukumbila tjishingwe kwakamusiwa meya. 22 Mumpe kunoswika zwiwulu zwili zwitatu ne mazana ali manna (3 400) e seme dze siliva ne masaka e korong ali mazana manna (400) ne dzilitha dze nkumbi we zhambi dzili zwiwulu zwibili ne mazana ali mabili (2 200) ne dzilitha dze mafuta e ntoba dzili zwiwulu zwibili zwina mazana mabili ne mwenyu nnjinji usina tjilizanyo. 23 Tjimwe ne tjimwe tjakalebgwa nge Ndzimu u kudzimu tjishingwe kwakamusiwa meya, tjishingigwa Ng'umba ye Ndzimu ukudzimu, kusajalo bushongola gowowila mbuso wa mambo ne bagalithaka babe. 24 Kakale muzibe kuti amuna simba le kudusisa bapirisiti, Balevi kene bambi kene balisi be mikoba ne bashingi be Ng'umba ye Ndzimu likhetho ne ndilo ya Nzinda kene mimwiso.

25 “Ngono iwe Ezera mu butjenjedu gwawakapiwa nge Ndzimu, shalula basumikilisi ndizo babone kuti ndulamo inobepo mu bathu bose be golombedzo le Yufuratesi, bose banoziba milayo ye Ndzimu. Ngono udiye mmwe ne mmwe usingaizibe. 26 Ani kene ani usingatobele nlayo we Ndzimu uwo ne nlayo wa mambo wakafanila kuti alobgwe shamu ye lufu kene atatiwe, atolegwe thundu kene alongwe mu ng'umba ye busungwa.”

Ezera unokudza Ndzimu

27 Gudzo libe kuna Yahwe, Ndzimu wa bobatategulu bedu, ibo bakakulonga mu moyo wa mambo kuti Ng'umba ya Yahwe itetiwe mu Jerusalema nge zila iyeyi. 28 Ibo bakapitshila ludo gwabo kundili mbeli kwa mambo ne hadzasha dzidze. Ngekuti tjiazha tja Yahwe Ndzimu wangu tjakabe tjinami, ndakasimisa moyo akubunganya balume be batungamili mu Iziraela kuti bayende nami.