Mu Ikoniyo
1 Ku Ikoniyo Paulo na Bhanabhasi bakangina mu ng'umba ye mitembezelo ye Bajuta. Ikoko bakalebeleka nge zila yakati bathu banjinji be Tjijuta ne Bezwitjaba bakagalamoyo. 2 Koga ibabo Bajuta bakalamba kugalamoyo bakadzonga Bezwitjaba bakathama kuti bashandukile zwikamu. 3 Ndizo Paulo na Bhanabhasi bakapitsha tjibaka tjilefu ikoko, belebelekela She bakasimamoyo, iye wakalakidza dama lile le ngoni nge kuthama zwilakidzo ne makaabadzo ndibo. 4 Bathu be nzi bakabe bakathubukana, bamwe bakama ne Bajuta bamwe ne batumwa ba Jesu.
5 Kwakabe kuna kulangana pakati kwe Bajuta nenge Bezwitjaba kang'ompela ne batungamili babo, kubadziyidza nenge kubakikithidza nge mabgwe. 6 Koga bakaziba nge kwako ndizo bakatizhila ku mizi ye Lisitira ne Debhe mu Likaoniya ne mituthu yakapoteleka ipapo. 7 Ikoko bakasumikila Ndebo mbuya.
Mu Lisitira ne Debhe
8 Mu Lisitira, kwakabe kuna mmwe nlume wakabe ali gele pasi asingatubule shingisa makumbo awe. Wakabe azwagwa ali tjilema kakale kasitongo yenda. 9 Wakahwilila Paulo elebeleka. Paulo kanlingisisa, kabona kuti una kugalamoyo kupodziwa, 10 ngono kadanila pezhugwi, kati, “Ima nge makumbo.” Kamadzuka ngono kayenda. 11 Mbunga ukati ubona Paulo tjaathama, ukamimila nge lulimi gwe Tjilikaoniya uti, “Midzimu yadelukila ku tili ili mu mbumbiko ye bathu!” 12 Bhanabhasi bakantumila beti Zeusi , ngono Paulo bakantumila beti Hemesi, ngobe ali iye tjilebeleki tjikulu. 13 Mpirisiti wa Zeusi, we ng'umba yaanonamatigwa muili iyo yakabe ili kuzhe kwe nzi, kazhisa mikono ne maluba ku mikoba ye nzi, ngobe iye ne mbunga bakabe beshaka kubabhayila zwibhayilo.
14 Koga kukati batumwa, Bhanabhasi na Paulo behwa ikoku, bakapalula zwiambalo zwabo, ngono bakatizhila ku mbunga bemimila beti; 15 “Bathu, ini muthama ikoku? Naswi ti bathu banonga imwi. Tomuzhisila ndebo mbuya, timubudza kuti shandukani mu midzimu ye manyepkhwa, mushandukile ku Ndzimu unotjila iwo wakathama kudzimu ne shango ne gungwa na kose ku muali magalo iyawa. 16 Mu misi yakapinda wakaletja tjaba dzose kuthama tjakabe tjibashathisa. 17 Koga auzozwisiya usina butendeki. Wakalakidza nzhazho nge kumupa vula kudwa kudzimu ne zwijo mu misi yazo, unogutsha mimoyo yenyu nge zojiwa ne shatho.” 18 Ne baleba matama iyawa zwabo bakasimigwa nge kumisa mbunga kubabhayila zwibhayilo.
19 Bajuta bakazha ikoko bedwa ku Antiyoki ne ku Ikoniyo, ngono bakayita kuti bathu badumane nabo. Bakakikithidza Paulo nge mabgwe, ngono bakankakatila kuzhe kwe nzi bekumbula kuti wafa. 20 Koga kukati shule kwe bagalimoyo bankubunganila, kamuka, ngono kabgwilila mu nzi. Tjimuka iye na Bhanabhasi bakayenda ku Debhe.
Kubgwilila ku Antiyoki mu Siriya
21 Bakati basumikila ndebo mbuya mu nzi iwoyo, bakashandula bathu banjinji kube badiyiwa. Ipapo bakabgwilila ku Lisitira ne ku Ikoniyo ne ku Antiyoki 22 besimisa zwilopa bagalimoyo bebakulumbidza kudwilila mu kugalamoyo, beti, “Ngodziyidziwa kanjinji towongina mu bushe gwe Ndzimu.” 23 Paulo na Bhanabhasi bakabashalulila bakulu mu gubungano limwe ne limwe, ngono bakatembezela bazwinyima zojiwa, ndizo bakalonga mu maboko a She iye wabakagalamoyo munli.
24 Bakayenda bakapalama Pisidiya bakangina mu Pamufiliya. 25 Kukati basumikila dama mu Pega bakadelukila ku Ataliya. 26 Kudwa mu Ataliya bakabgwilila ku Antiyoki nge gungwa, iko kwabakabe babigiwa mu ngoni dze Ndzimu ngekwe nshingo wabakabe bapedza.
27 Bakati beswika ikoko, bakakubunganya gubungano, ngono bakabika kose Ndzimu kwawakabe washinga ndibo nenge sekwa wakazhulila Bezwitjaba nkoba we kugalamoyo. 28 Ngono bakagala tjibaka tjilefu ikoko ne badiyiwa.
© Kalanga Bible © Bible Society of Botswana, 2008, 2018.