Lumbo gwe ludo
1 Moyo wangu unotebukana nge matama akanaka.
Matama angu ndakaalingisa kuna mambo.
Lulimi gwangu gonga pensele yakalulwamisigwa kukwala.
2 Iwe wakanaka kupinda balume bose,
milomo iyo izhele ludo.
Ndizo Ndzimu wakakukombolela nge kusingapele.
3 Dedelani thumo lenyu imwi muna masimba,
ndumbidzo nge yenyu ne buzinda.
4 Mu buzinda gwenyu kundilani malebeswa
kubakilila ndulamo.
Luboko gwenyu gwe luji ngagumudiye mishingo inotjisa.
5 Misebe yenyu inopitsha
inobhaya mimoyo ye zwita zwa mambo.
Bathu banowila kusi kwenyu.
6 Tjigalo tjenyu tje bushe tjigelile tjose.
Ludozo gwenyu gwe bushe ludozo gwe ndulamo.
7 Moda ndulamo mukabenga bubi.
Ndizo Ndzimu, iwo Ndzimu wenyu,
wakamupa tjibombo pezhugwi kwe balizani namwi
nge kumuzhodza mafuta e kushatha.
8 Hazu dzenyu dzonuhwilila mira ne gonde ne khasiya.
Mu mbako dze bushe dzakabakwa nge nyanga dze zhowu
kolila zwilidzo zwe misungo zwinomushathisa.
9 Bakololokadzi ba bomambo
bapakati kwe bakadzi banolumbidziwa,
ku luboko gugo gwe luji kumile Nfumakadzi
akaambala golide ye Ofi.
10 Ihwa, iwe nkololokadzi, kumbula uzhule zebe,
kangang'wa bakanyi kwenyu ne be nsha wa tate babo.
11 Mambo banowoshathisiwa nge bubuya gugo.
Se bali she uwo, ubatete.
12 Bathu be Tire banowoshaka ludo gugo nge zwipo,
bafumi kupindisa.
13 Fumwa dzose ngosiyana kwadzo.
Nkololokadzi wa mambo umu ng'umba iye
akaambala hazu dzakalukiwa nge golide.
14 Unowotungamiligwa kuna mambo
akaambala hazu dzina mibalabala,
epelekwa nge baanadi.
Na ibobo banowozhisiwa kumuli.
15 Banopululudza bakashatha bakatungamigwa
bengina mu ng'umba ye bushe ya mambo.
16 Mu bumo gwa bobatategulu benyu
kowobe ne bakololo benyu,
mowobathama bakabe boshe mu shango.
17 Ndowothama kuti zina lenyu likudziwe mu zwizekugwana zose.
Ndizo njudzi dzowomukudza nge kusingapele.
© Kalanga Bible © Bible Society of Botswana, 2008, 2018.