Baamoni banokundiwa
1 Kwakati Adonizedeki mambo we Jerusalema ehwa kuti Joshuwa wakatola kakale wakakolomodza nzi we Ai, kabulaya ne mambo wawo, kakale wakathamila nzi we Ai tjaakatongo thama ne nzi we Jerikho ne mambo wawo ne kuti Bagibiyoni bakathama tjidumano tje mbakiso ne Baiziraela kakale bogala nabo, 2 kadziyidzika kwazo, ngobe Gibiyoni wakabe uli nzi nkulu se mmwe we mizi ye bumambo. Wakabe uli nkulu kupinda nzi we Ai, wakabe una babhayani bakasima. 3 Ndizo Adonizedeki mambo we Jerusalema kayisa mima kuna Hohamu mambo we Heburoni ne kuna Piramu mambo we Jarimuti ne kuna Jafiya mambo we Lakhishi ne kuna Dibiri mambo we Egiloni, kabadwa eti, 4 “Izhani mu ndibhatshe kunginilila nzi we Gibiyoni, ngobe bakathama tjidumano tje mbakiso na Joshuwa ne Baiziraela.”
5 Ndizo bomambo bashanu be Baamori, mambo we Jerusalema ne mambo we Heburoni ne mambo we Jarimuti ne mambo we Lakhishi ne mambo we Egiloni bakashanganya babhayani babo ngono bakayenda bakanonginilila nzi we Gibiyoni.
6 Bathu be Gibiyoni bakayisa dama kuna Joshuwa ku bukotokelo gwe Giligala beti, “Musifupatile balanda benyu. Izhani tjinyolotjo muwotitjidza! Izhani mutibhatshe ngobe bomambo be Baamori banogala mu shango ye matombo bazwishanganya kuti bawotinginilila.”
7 Ndizo Joshuwa ne babhayani babe bose balume be ngwa bakasima bakatathilila ku Giligala. 8 Ngono Yahwe bakadwa Joshuwa beti, “Usitongobatja, ngobe ndowothama kuti ubakunde, akuna ndodwa ne nng'ompela unowoma mbeli kuko.”
Yahwe banobhatsha Baiziraela
9 Kwakati shule kwe gwendo gwakatola busiku gose kudwa mu Giligala, Joshuwa kaswika ebawila batjakazwikangang'wa. 10 Yahwe bakathama kuti babhayani be Baamori bawumane nge lutjo mbeli kwe Baiziraela, ngono bakabulaya nge bunji gusi bushoma ku Gibiyoni. Baiziraela bakabatatamila bali mu zila inotathila ku Bhetihoroni bakabhata be babulaya kudzina beswika mu nzi we Azeka newe Makeda. 11 Ngono bakati bakabhata bali mu zila inodelukila ku Bhetihoroni kunoswika ku Azeka betizha babhayani be Baiziraela, Yahwe bakaligila tjivulamabgwe tjikulu mubali ngono bunji gwabo gukabulawa nge tjivulamabgwe kupinda bakabulawa nge thumo ne Baiziraela.
12 Ngono kwakati zhuba Yahwe labakathama kuti Baamori bakundiwe ne Baiziraela, Joshuwa kalebeleka na Yahwe mbeli kwe Baiziraela kati,
“Zhuba ngalime, lime mu Gibiyoni,
mwedzi iwo usingine pa nkuku we Aijaloni.”
13 Ndizo zhuba likama ne mwedzi ukamabo kuswikilila Baiziraela bazwigwila mu zwita zwabo, koga sekwa kwakakwagwa mu Lukwalo gwa Jashari. Zhuba lakama pakati kwe zhuzhugwi likasimile masikati wose. 14 Akuthu kukabe ne zhuba linofanana na ilelo mukutangisa kene na ngwenu kose, zhuba la Yahwe labakateedza nthu. Tjoselele Yahwe bakagwila Baiziraela!
15 Kudwa ipapo Joshuwa ne Baiziraela bose bakabgwilila ku bukotokelo ku Giligala.
Joshuwa unosunga bomambo bali bashanu
16 Ngono kwakati babhayani be Baamori betizha babhayani be Baiziraela bomambo be Baamori bali bashanu ibo bakatizha bakanobgwata ku guwu le Makeda. 17 Babhayani ba Joshuwa bakandwa beti, “Bomambo bashanu bawang'wa bakabgwata mu guwu le Makeda.” 18 Ngono Joshuwa kabadwa kati, “Kunguludzilani mabgwe makulu ku nkoba we guwu ilelo ngono mubige balume kuti balinde ipapo. 19 Koga imwi musitole tjibaka tjoseko, londani zwita zwenyu muzwisale shule, musitongo baletja bakanoswika ku mizi yabo, Yahwe Ndzimu wenyu banowothama kuti mu bakunde.” 20 Kwakati Joshuwa ne Baiziraela basino balobesa bose, nenguba malimbelimbe mashomanana akabe atizhila ku matizhilo abo, 21 babhayani bakabgwilila zwibuya kuna Joshuwa ku bukotokelo ku Makeda, kwakashaya ndodwa nge nthu nng'ompela wakaleba tjimwe tji biibi ngekwe bathu be Iziraela.
22 Ngono Joshuwa kalebeleka kati, “Zhulani nkoba we guwu ngono muzhise bomambo ibabo bashanu bamu guwu kundili.” 23 Ngono bakathama saikoku, bakazhisa bomambo ibabo bashanu ku nli, kwakabe kuli mambo we Jerusalema ne mambo we Heburoni ne mambo we Jarimuti ne mambo we Lakhishi ne mambo we Egiloni. 24 Bakati bedusa bomambo ibabo, Joshuwa kadwa balume bose be Iziraela ne batungamili be babhayani bakabe banaye ku ngwa eti, “Izhani ngeno mu tshambe bomambo ibaba mu mitshibha.” Bakazha ngono bakatshamba bomambo mitshibha. 25 Joshuwa kabadwa kati. “Musitje kene ili kutemeka mafupa, simani mube ne tjilopa, ngobe itjetji nditjo Yahwe tjabanowothama mu zwita zwamunowogwa nazo.” 26 Ipapo Joshuwa kabulaya bomambo ibabo kabalembeledza mu miti mishanu, ngono bakasiyiwa bakalembeleka mu miti iyeyo kuswikilila madekwana.
27 Ngono kwakati zhuba lomila Joshuwa kadusa ndaulo kuti bomambo ibaba basunungugwe mu miti ngono balashigwe mu guwu labakabe bakabgwata mulili, kudwapo lizhaligwe nge mabgwe makulukulu, mabgwe iyawo ayapo na nasi.
Joshuwa unotola mizi ye Baamoni
28 Kwakati mu zhuba ilelo, Joshuwa katapa nzi we Makeda ngono kabulaya mambo we Makeda ne mmwe ne mmwe unogala mu nzi iwoyo, kukasala kusina ndodwa nge limbelimbe ling'ompela. Wakathama mambo we Makeda koga sekwa akathama mambo we Jerikho.
29 Kudwa mu nzi we Makeda Joshuwa ne Baiziraela bakalinga ku nzi we Libina ba kaunginilila. 30 Yahwe bakathama kuti Baiziraela bakunde ngono bakatapa nzi we Libina ne mambo wawo. Bakabulaya mmwe ne mmwe wakabe ali mu nzi nge thumo kukasheta ne limbelimbe ling'ompela lakasala. Wakathamila mambo wawokoga sekwa akathama mambo we Jerikho.
31 Kudwa ipapo Joshuwa ne Baiziraela bose bakamilika mu nzi we Libina bakalinga ku Lakhishi, ngono bakaswika bakaukomba bakaunginilila. 32 Yahwe bakathama kuti mu zhuba linotobela Lakhishi ikundiwe. Bathu bose bakabe bali mu nzi bakabulawa nge thumo koga sekwa kwakashingikalila nzi we Libina.
33 Kwakati kutjakajalo Horamu mambo we nzi we Gezeri kazha kuwobhatsha nzi we Lakhishi koga Joshuwa ka nkunda iye ne babhayani babe kukasheta ndodwa ne limbelimbe ling'ompela lakasala.
34 Kudwapo Joshuwa ne Baiziraela bose bakamilika mu Lakhishi bakalinga ku Egiloni, bakakomba nzi we Egiloni bakaunginilila, 35 ngono bakatapa nzi we Egiloni mu zhuba ilelo zwalo. Bakabulaya mmwe ne mmwe nge thumo koga sekwa bakathama nge nzi we Lakhishi.
36 Joshuwa ne Baiziraela bakadwapo bemilika mu nzi we Egiloni belinga ku nzi we Heburoni ngono bakanounginilila. 37 Bakatapa nzi we Heburoni, bakabulaya mmwe ne mmwe muuli kose ne mambo wawo nge thumo kose ne mizana yayo. Bakasiya kusina ndodwa ne limbelimbe koga sekwa bakathama ku nzi we Egiloni, bakalobesa mmwe ne mmwe muuli.
38 Joshuwa ne Baiziraela bakashanduka bakanonginilila nzi we Dibiri. 39 Bakatapa nzi nkulu na mambo wawo ne mizana yawo bakababulaya bose nge thumo. Bakalobesa mmwe ne mmwe bakasiya kusina ndodwa ne limbelimbe. Bakathama nzi we Dibiri koga sekwa bakathama nzi we Libina ne mambo wawo koga sekwa bakathama ku nzi we Heburoni.
40 Ndizo Joshuwa kakunda ntuthu wose ne shango ye matombo neye Negebu ne shango yakawila ikunobhuda zhuba ne imu thobo dze matombo akunomila zhuba kose na bomambo badzo, akuna waakasiya, koga sekwa Yahwe Ndzimu we Iziraela bakabe baleba. 41 Joshuwa wakabakunda kudwa tjose ku Kadeshibhareneya kunoti ku Gaza ne shango yose ye Gosheni kunoti ku Gibiyoni. 42 Mu tjibaka itjetji Joshuwa wakakunda bomambo ibaba ne mituthu yabo. Wakatubula kuthama saikoku ngobe Yahwe Ndzimu we Iziraela wakabe ugwila Iziraela.
43 Joshuwa wakabgwilila ne Baiziraela bose ku bukotokelo ku Giligala.
© Kalanga Bible © Bible Society of Botswana, 2008, 2018.