Jesu unopodza nlume una mapele
(Mako 1:40-45Luke 5:12-16)1 Jesu wakati edeluka mu dombo, mibunga mikulu ye bathu ikantobela. 2 Ngono kukazha mmwe nlume egwala mapele, kazha kathigama mbeli kukwe kati, “She, ha muda, mungandipodza.”
3 Jesu katambunudza luboko gugwe kankutha kati kunli, “Ndoda. Pola!” Tjinyolotjo kapola. 4 Ipapo Jesu kati kunli, “Ubone kuti akuna waunobudza ikoku. Koga yenda uzwilakidze ku mpirisiti, uduse tjipo tjakalebgwa ndi Mushe, ili ndakidzo mubali.”
Kugalamoyo kwe nlauli we babhayani
(Luke 7:1-10)5 Jesu wakati engina mu Kapenaume, nlauli we babhayani bali zana kazha kunli ekumbila 6 eti, “She, nlanda wangu ulele ku nzi aatokuyenda, unogwala kwazo.”
7 Jesu kati kunli, “Ndowozha awompodza.”
8 Nlauli we babhayani bali zana kadabila kati, “She andizolizanila kuti mungangina mu ng'umba yangu. Lebani dama koga, ngono nlanda wangu unowopola. 9 Ngobe ndi nthu upasi kwe nlayo, ndina babhayani pasi kwangu. Ndoti kuna hwoyu, ‘Yenda!’ kayenda, ati kuna hwouje, ‘Izha!’ kazha. Ndoti ku nlanda wangu, ‘Shinga woku!’ kakushinga.”
10 Jesu kati ehwa ikoku katjenama kwazo, ngono kati kuna bakabe bakantobela, “Ndolebesa tjose, andithu abona nthu ne nng'ompela mu Iziraela una bugalimoyo bukulu zwingapa. 11 Ndoti kumuli, banjinji banowozha bedwa ku bhezhuba neku golombedzo, ngono banowogala pa tafuli na Abhurahama na Isaki na Jakubo mu bushe gwe kudzimu. 12 Koga bana be bushe banowolashigwa kuzhe mu zhalima, ngono kowobe ne tjililo tjikulu kwazo ne kulobana kwe meno nge kuhwa zogwadza kwazo.” 13 Ipapo Jesu kati ku nlauli we babhayani, “Yenda! Ngakukushingikalile koga sekwa wagalamoyo kuti kowojalo.”
Ndizo nlanda uwe wakapola nge tjibaka itjetjo.
Jesu unopodza bunji
(Mako 1:29-34Luke 4:38-41)14 Jesu kati engina mu nzi wa Pita, kabona mmezwale ba Pita bali lele bakabhakhwa nge luzhazhamo. 15 Kabhata luboko gwabo, luzhazhamo gukabhuda mubali, bakamilika bakampa tjinojiwa.
16 Madekwana iyawo bathu bakazhisa kunli bathu banjinji bakabe bakabhakhwa nge meya mibi, ngono kadusa meya nge dama, kapodza bose banogwala. 17 Oku kwakathama kuti kushingikale matama akalebgwa nge nlebesambeli Isaya eti, “Wakatola buworoworo gwedu kasenga njigwele dzedu.”
Kutobela Jesu
(Luke 9:57-62)18 Jesu kati ebona mbunga nkulu we bathu wakampoteleka, kabe eti kutjulukigwe seli kwe gungwa. 19 Ipapo N'diyi we nlayo kazha kunli kati, “N'diyi, ndowomutobela kumwe ne kumwe kwamunoyenda.”
20 Jesu kan'dabila kati, “Phungubgwe dzina madzete ne nyuni dzinowuluka dzina mashaka, koga iye Nkololo we Nthu aana paanobiga nsholo uwe.”
21 Mmwe kakale we badiyiwa babe kati kunli, “She mundiletje ndinobiganya tate bangu kutanga.”
22 Koga Jesu kan'dwa kati, “Unditobele, letja bafi babiganye bafi babo.”
Jesu unonyaladza dutu
(Mako 4:35-41Luke 8:22-25)23 Jesu kati engina mu n'goro, badiyiwa babe bakantobela. 24 Ipapo kukamuka dutu gulu mu gungwa, mapundu e vula kangina mu n'goro. Koga Jesu wakabe akaizela. 25 Badiyiwa bakammusa bakati, “She, mutitjidze tonyungila mu vula!”
26 Kabadabila kati, “Bathu be bugalimoyo butukununu ndimwi! Motjisiwa ngeni?” Ipapo kamilika katjemela phepo ne gungwa, ngono kukabe ne kunyalala kukulu.
27 Balume ibabo bakakaabala kwazo, bakati, “Nthu wakatini iwoyu unohwiligwa nge phepo nenge gungwa dumbu?”
Jesu unopodza balume babili
(Mako 5:1-20Luke 8:26-39)28 Jesu wakati eswika seli mu ntuthu unoyi Gerasa, balume babili bakabhakhwa nge meya mibi bakanshanganidza bedwa ku zwikumbu. Bakabe bana bushongola kwakabe kusina ungapinda nge zila iyeyo. 29 Ngono bakamimila beti, “Unoshakani mutili kene Nkololo we Ndzimu? Apa wazha kuwotihwisa zogwadza tjibaka tjisathu tjikaswika kene?”
30 Hwotji njinji dzakabe dzifula thambgwana kudwa pabali. 31 Meya mbi ikakumbila Jesu iti, “Ha utidusa, utitatile mu hwotji idzedzi.”
32 Kati ku ili, “Yendani!” Ndizo ikabhuda ikanongina mu hwotji, ngono, danga lose le hwotji likapadzamuka likatizha nge phili yakakunguluka. Danga lose ilelo le hwotji likawila mu gungwa likafila mu vula.
33 Bathu bakabe bakalisa hwotji bakatizhila ku nzi, bakanoleba kose ne tjaka shingikalila balume bakabe bakabhakhwa nge meya mibi. 34 Ipapo nzi wose ukakulumuka kunoshanganidza Jesu. Bakati bembona bakankumbila kuti abhude mu ntuthu wabo.
© Kalanga Bible © Bible Society of Botswana, 2008, 2018.