1 Iwe nzi nkulu we babhayani, kubunganya babhayani babo
ngoti takombiwa nge ngwa,
banowoloba mbusi we Iziraela
mu lushaya nge lukombo.
Mbusi unodwa mu Bhetelehema
2 Koga iwe Bhetelehema Efurati,
iwe mmwe we batukununu pakati kwe misha ya Juta,
mukuli kowondidwila mmwe
unowobe mbusi mu Iziraela,
kutangisa kukwe kodwa ntolo,
kudwa mu misi ya ntolotolo.
3 Ndizo wali Yahwe banowobasiya
kuswikila tjibaka tjinowoti umu zwibhayo katshibama,
ipapo bana ba mmeyabe bakasala
banowobuya kushangana ne Baiziraela.
4 Ngono unowomilika kafudza ngubi iye
mu simba la Yahwe,
nge bukulu gwe zina la Yahwe Ndzimu uwe.
Ngono dzowotjila dzakasununguka, ipapo bukulu gugwe
gowoswika ku phelelo dze shango.
5 Ngono unowobe kunyalala kwabo.
Kusununguka ne shamu
Asiriya ha ithukila mu shango yedu,
bebe betshamba bepalama mbako dze matizhilo edu,
towobamusila balisi bali kutendeka kubhayana nabo,
ne batungamili bali zhanakadzi.
6 Banowobusa shango ye Asiriya nge thumo,
shango ya Nimirodi nge thumo.
Unowoti sunungula mu Baasiriya
pabanowobe bethukila mu shango yedu,
betshamba bengina mu migathu yedu.
7 Ipapo malimbelimbe a Jakubo anowobe
pakati kwe bathu banjinji
se khawa inodwa kuna Yahwe
se masusu e vula mu bushwa,
zwisingamilile nthu,
kene kulindila bathu.
8 Malimbelimbe a Jakubo anowobe pakati kwe njudzi
pakati kwe bathu banjinji,
se shumba pakati kwe phuka dze ishaka,
se shumbana pakati kwe ngubi dze pkhwizi
ha idzipalama inomwandawula ikamwawulanya,
ngono kusina ungadzigwila.
9 Tjiazha tjitjo tjowokunda zwita zwizo,
ngono zwita zwizo zose zowolobesiwa.
10 Yahwe bakati, “Mu zhuba ilelo,
ndowobulaya mbizi dzenyu pakati kwenyu
ndibe ndikolomodza koloyi dzenyu dze ngwa.
11 Ndowokolomodza mizi mikulu ye shango yenyu
ndibe ndiliga mbako dzose dzenyu dzakasima.
12 Ndowolobesa buloyi gwenyu
amutjowobe mungalowa.
13 Ndowophkwanya zwifano zwenyu zwakabezhiwa
ne zwe phanda,
amutjowobe mutjathigamila
mishingo ye maboko enyu.
14 Ndowoshomola midzimu yenyu inoyi Ashera
ndiyidusa pakati kwenyu,
ndibe ndikolomodza mizi yenyu mikulu.
15 Ndowobgwilizila njudzi dzisakandihwa
nge bushongola ndakagwadzamoyo.”
© Kalanga Bible © Bible Society of Botswana, 2008, 2018.