Zwipo 7 - Kalanga Bible (KBTP)

Tjibhayilo tje nlandu

1 “Oyu ndiwo nlayo we tjibhayilo tje nlandu, tjakayengemala kwazo. 2 Mu bugalo gwabagala bebhayila tjibhayilo tjinopisiwa, babhayilepo tjibhayilo tje nlandu, ngono malopa atjo anyasiwe kupoteleka tjibesotjinopisigwa zwibhayilo. 3 Mafuta wose adusiwe apisigwe mu tjibeso, mafuta e mwise ne lizwizwi, 4 ne so mbili ne mafuta adzo kudwila ku thunji ne lutembe gwe tjilopa gudusigwanyiwe ne so. 5 Mpirisiti azwipisile mu tjibeso tjinopisigwa zwibhayilo tjili tjipo tjinopisiwa mu moto tjipisigwa Yahwe. Etji nditjo tjibhayilo tje nlandu. 6 Mmwe ne mmwe we tjilume mu misha ye bapirisiti ungatjija, tjijigwe mu bugalo gwakayengemala, ngekuti tjakayengemala kwazo.

7 “Tjibhayilo tje nlandu tjonga tjibhayilo tje tjibi, nlayo wazo nng'ompela, mpirisiti unothama gadzano na Yahwe, unowotola nyama yatjo. 8 Mpirisiti unowothamila mmwe ne mmwe tjibhayilo tjinopisiwa azwitolele ganda le tjibhayilo tjinopisiwa. 9 Tjimwe ne tjimwe tjipo tje mathunde tjakagotjegwa mu oveni na kose kwakagotjiwa nge pani kene nge thiwa, zowobe zwe mpirisiti wayisa tjipo. 10 Tjipo tjimwe ne tjimwe tje mathunde, tjakashanganyiwa ne mafuta kene tjakawoma, zose zowobe zwe bakololo ba Aroni, banowozwikobana.

Zwibhayilo zwe mbakisano

11 “Oyu ndiwo nlayo we tjibhayilo tje mbakisano tjingazhisiwa kuna Yahwe nge nthu. 12 Ha nthu etjidusa tjili tjibhayilo tje mboko, unodusa tjibhayilo tje mboko tjina tjiwunga tjisina mbidzo ne makokisi akabhong'wa mafuta ne makhekhe e bgwisa gwakanathiwa gwakashanganyiwa zubuyanana ne mafuta. 13 Pezhugwi kwe tjibhayilo tjitje tje mbakisano tje mboko, azhisilanye ne tjipo tje zwiwunga zwakavangwa nge mbidzo. 14 Mu tjimwe ne tjimwe tjipo ayise tjiwunga tjing'ompela tjili tjipo tjinopiwa Yahwe, tjowobe tje mpirisiti watola malopa e tjibhayilo tje mbakisano kaanyasa mu tjibeso. 15 Nyama ye tjibhayilo tje mbakisano tjili tje mboko, ijiwe mu zhuba latjazhisiwa, kushete yasala kunoti tjimuka mangwanana.

16 “Koga ha tjibhayilo tjitje tjili tje kutuna kene tjili tje tjipo tje moyo ntjena, tjijiwe mu zhuba layisiwa tjibhayilo, ngono tjasala, mangwana tjijiwe, 17 koga tjasala mu zhuba le butatu tjipisiwe nge moto. 18 Ha kuna nyama yajiwa mu zhuba le butatu, iye wayisa tjibhayilo tje mbakisano aatowoamutjigwa nenguba kuli kutogwa sewathama tjimwe, ngoti ya temapala, ngono unowoija unozwidanila nlandu. 19 Ha nyama ingakuthana ne tjimwe tjakatemapala isijiwe, ipisiwe nge moto.

“Bose bakatjenapala bangaja nyama ye tjibhayilo. 20 Koga nthu unoja nyama ye tjibhayilo tjapiwa Yahwe tjili tjibhayilo tje mbakisano akatemapala, nthu wakajalo unowothubugwa mu gubungano le Ndzimu. 21 Ngono ha kuna ungakutha tjimwe tjakatemapala, kene kuli mu nthu, kene phuka yakatemapala kene ili tjimwe koga tjingabe tjishimisa mbeli kwe Ndzimu, ngono ebe eja nyama ye tjibhayilo tjapiwa Yahwe tjili tjibhayilo tje mbakisano, nthu wakajalo athubugwe mu bathu be Ndzimu.”

22 Yahwe bakadwa Mushe bakati, 23 “Idwa bathu be Iziraela uti, Musitongoja mafuta e ng'ombe kene e pkhwizi kene e mbudzi. 24 Mafuta e phuka yazwifila ne mafuta e phuka yabhakhwa nge tjibandana, angashingisiwa tjimwe tjipoga, koga asitongojiwa nenguba kwakatini. 25 Nthu unowoja mafuta e phuka yathamiwa tjipo tjinopisiwa mu moto tjipisigwa Yahwe, athubugwe mu bathu be Ndzimu. 26 Musitongoja malopa e nyuni kene e phuka mu magalo enyu. 27 Ha kuna nthu unoja malopa, nthu wakajalo athubugwe mu bathu be Ndzimu.”

28 Yahwe bakadwa Mushe bakati, 29 “Lebeleka ne bana be Iziraela uti iye unodusa tjibhayilo ili tjibhayilo tjitje tje mbakisano etjiyisa kuna Yahwe azhise mmwe ntezho uli tjipo kuna Yahwe, kudwa mu tjibhayilo tjitje tje mbakisano. 30 Atjizhise nge maboko awe tjili tjipo tjinopisiwa mu moto tjipiwa Yahwe, azhise mafuta e tjibhayilo ne ifuba, kuti ifuba tjizunguziwe tjili tjipo tjinozunguziwa mbeli kwa Yahwe.Tjipo tjinozunguziwa 31 Mpirisiti unowopisa mafuta mu tjibeso tjinopisigwa zwibhayilo, koga ifuba ngetja Aroni ne bakololo babe. 32 Tjidzwa tje luji tjipiwe mpirisiti tjili tjipo tjinodwa mu tjibhayilo tje mbakisano. 33 Mpirisiti unowodwa mu bakololo ba Aroni unoyisa malopa ne mafuta e tjibhayilo tje mbakisano wakafanila kupiwa gobe le tjidzwa tje luji. 34 Ngobe ifuba tjakazunguziwa ne tjidzwa tjadusiwa ndazwitola mu bana be Iziraela, zwidwa mu tjibhayilo tjabo tje mbakisano, ndibe ndizwipa Aroni mpirisiti ne bakololo babe, kuli gobe lakabalingisana nge kusingapele mu bana be Iziraela. 35 Oyu ndiwo ntezho wa Aroni ne bakololo babe unodwa mu zwipo zwinopisiwa mu moto zwipisigwa Yahwe, wabakashaluligwa mu zhuba labakazhodzegwa kushingila Yahwe bali bapirisiti.” 36 Yahwe bakalaula kuti bapirisiti bapiwe ntezho uwoyu nge bana be Iziraela, mu zhuba labakazhodziwa, ili ndingisano yakabalingisana kunoti ku zwizekugwana zwabo zose.

37 Iwoyu ndiwo nlayo we tjibhayilo tjinopisiwa, tjipo tje mathunde ne tjibhayilo tje tjibi ne tjibhayilo tje nlandu ne tjibhayilo tje kuzhodziwa ne tjibhayilo tje mbakisano, 38 tjakalauligwa Mushe ndi Yahwe ali pezhugwi kwe Dombo le Sinai, mu zhuba Yahwe labakalaulila bana be Iziraela kuti bazhise zwipo zwabo kuna Yahwe, bali mu tjilambanyika tje Sinai.