Josiya unozana Nzano we Kupinda Pezhugwi
(2 Bomambo 23:21-23)1 Mambo Josiya kalondolodzela Yahwe Nzano we Kupinda pezhugwi mu Jerusalema, bakabhaya phkwizana dze Nzano we Kupinda pezhugwi mu zhuba le bugumi lina manna (14) le mwedzi we kutanga. 2 Wakakobela bapirisiti mishingo ngono kabakulumbidza mu nshingo we Ng'umba ya Yahwe. 3 Ngono wakadwa Balevi bose ibo bakabe bediya Baiziraela, ibo bakabe bakayengemala kuna Yahwe kati, “Mubige Bhokisi le Tjidumano mu Ng'umba ye Ndzimu yakabakwa ndi Solomoni nkololo wa Dafite. Musitongotja lisenga nge mathudzi enyu koga shingilani Yahwe Ndzimu wenyu ne bathu bawo Baiziraela. 4 Muzwilulwamise kuyenda nge misha ne kuyenda nge mishingo yamakakobegwa ndi Mambo Dafite ne nkololo uwe Mambo Solomoni. 5 Mume mu Bugalo gwakayengemala nge makupo e misha e bakanyi kwenyu, bathu koga, ngono nkoba mmwe ne mmwe kume Balevi be nsha nng'ompela. 6 Mubhaye pkhwizana ye Nzano we Kupinda Pezhugwi namwi muzwitjenapadze ngono mululwamisile bakanyi kwenyu pkhwizana, muthama itjo Yahwe tjabakadwa Mushe kuti tjithamiwe.”
7 Ngono Mambo Josiya kapa bathu kudwa mu ngubi iye, pkhwizana ne mbudzana dze Nzano we Kupinda Pezhugwi dzili zwiwulu zwili makumi matatu (30 000) ne mikono ili zwiwulu zwili zwitatu (3 000). 8 Makulukota awe naiwo kadusila bathu be bapirisiti ne Balevi. Hilikiya na Zakhariya na Jehiele bayendisi be Ng'umba ye Ndzimu bakapa bapirisiti zwiwulu zwili zwibili ne mazana ali tathatu (2 600) e zwibhayilo zwe pkhwizana ne mbudzana zwe Nzano we Kupinda Pezhugwi ne mazana matatu (300) e ng'ombe. 9 Konaniya ne banung'una babe Shemaya na Nethanele na Hashabiya na Jeyele na Jozabadi batungamili be Balevi bakadusa zwipo zwe Nzano we Kupinda Pezhugwi zwili zwiwulu zwili zwishanu (5 000) ne mikono ili mazana mashanu (500) bakazwipa Balevi.
10 Ngono kwakati tjimwe ne tjimwe tje Nzano we Kupinda Pezhugwi tjalulwamisiwa bapirisiti ne Balevi bakatola magalo koga mambo sekwa bakalaula. 11 Ngono bakabhaya pkhwizana dze Nzano we Kupinda pezhugwi ngono bapirisiti bakan'nyasa malopa abakabe bepiwa, Balevi ibo beviya phuka dzabhayiwa. 12 Bakabigila ntome zwibhayilo zwinopisiwa kuti ndizo bazwikobe nge makupo e misha ye bathu koga kuti ndizo badusilabo Yahwe koga sekwa kwakakwagwa mu lukwalo gwe nlayo wa Mushe. Bakathama saikoku bo ne zwikondolo. 13 Balevi bakagotja zwibhayilo zwe Nzano we Kupinda pezhugwi mu moto koga sekwa kwakakwagwa ngono bakakapayidza zwipo zwakayengemala mu hali ngothubukana kwadzo ngono bakakobela bathu bose tjinyolotjo. 14 Shule kwa ikoku, Balevi bakalulwamisa nyama yabo neye bapirisiti ibo zwizekugwana zwa Aroni ngoti bapirisiti bakabe basina gwe kugala, bakabe bepisa zwibhayilo zwakabe zwipisiwa zose ne zwibhayilo zwe mafuta kudzina kukabe busiku. 15 Ngono bambi ibo bakabe bali Balevi be nsha wa Asafa bakabe bali mu magalo abo Mambo Dafite sekwa akabe aleba, ibo bakabe bali bo Asafa na Hemani na Jeduthuni iye ali nlebesambeli wa mambo. Balisi be mikoba ibo akuzobe kusheteka kuti bangasiya mikoba ngoti Balevi bakabalulwamisila. 16 Ndizo nshingo wose wa Yahwe wakalulwamisiwa zhuba ilelo, kulondolodza Nzano we Kupinda Pezhugwi, Mambo Josiya sekwa akabe aleba. 17 Baiziraela bakabe balipo bakalondolodza Nzano we Kupinda Pezhugwi nge tjibaka itjetjo bakalondolodza ne Nzano we Tjiwunga tjisina Mbidzo kwe mazhuba ali kutendeka. 18 Akuzotongofa kwabe ne Nzano we Kupinda Pezhugwi wakanga iwoyu mu Iziraela tjinga kwe mazhuba a Samuele nlebesambeli, akuna wa bomambo be Baiziraela wakatongolondolodza Nzano we Kupinda pezhugwi iwoyu nge zila inonga yakathamiwa ndi Josiya ne bapirisiti ne Balevi ne Juda yose ne Baiziraela bakabe balipo ne bagali be Jerusalema. 19 Mu gole le bugumi lina zhanakadzi (18) le mbuso wa Josiya, Nzano we Kupinda pezhugwi wakalondolodziwa.
Bhelelo le mbuso wa Josiya
(2 Bomambo 23:28-30)20 Shule kwe kuti Josiya abe athama zose izwezwi zwe Ng'umba ye Ndzimu, Neko mambo we Egipiti kabhuda kanogwa ku Karikhemishi ku gwizi gwe Yufuratesi. Ngono Mambo Josiya kayenda kunonshanganidza. 21 Koga Neko katumila batumwa kunli ne matama anoti, “Dumbu unotshwa ubhulani mu ngwa iyeyi Mambo we Juda kene? Andizozha kuwogwa nawe ndazha kuwogwa ne wandinogwa naye. Ndzimu wandibudza kuti nditjimbidze, ndizo letjedza kunyanyayidzana ne Ndzimu, iwo unami kusakajalo unokulobesa.” 22 Koga Josiya kabe akazwimisila kugwa, kalamba teedza matama a Neko akabe edwa ku Ndzimu ngono Josiya kanogwa na Neko ku tjibata tje Megido.
23 Josiya kabhayiwa nge misebe ye Baegipiti. Ngono kadwa balanda babe kati, “Mundiduse ipapa ngobe ndakubala zwakabipa.” 24 Ndizo balanda babe bakan'dusa mu koloyi iye ye ngwa ngono bakantathisa imwe ipoga bakan'yisa ku Jerusalema. Wakanofila ikoko ngono kanobiganyiwa ku zwikumbu zwa botate babe. Ngono bathu bose be Juda ne Jerusalema bakan'lilila.
25 Nlebesambeli Jeremiya kakwala lumbo gwe tjililo gwa Mambo Josiya. Kwakabe kwakawolobeleka mu Iziraela kuti bambi ne balume ne bakadzi bambe lumbo igogu abe nlilila. Lumbo igogu gowang'wa mu hwalo dze Zwililo.
26 Tjimwe ne tjimwe tjakathamwa ndi Josiya, kuzwimisila kukwe muna Yahwe ne kulondolodza nlayo kukwe, 27 ne thawu dzidze kudwa mu kutangisa kunoti ku bupelo kwakakwagwa mu Thawu dza Bomambo be Iziraela ne Juda.
© Kalanga Bible © Bible Society of Botswana, 2008, 2018.