1 Yahwe bakadwa Mushe bakati, “Bona, ndakuthama ukabe se Ndzimu kuna Faro, Aroni nkulu uwo iye unowobe nlebesambeli uwo. 2 Iwe unowobudza Aroni kose kwandinokubudza, Aroni nkulu uwo iye unowobudza Faro kuti aletje Baiziraela babhude mu shango iye. 3 Koga ndowokukutadza moyo wa Faro ngono nenguba ndiwowatsha makaabadzo angu mu Egipiti, 4 Faro aatowomuhwilila. Ipapo ndowoloba Egipiti ndibe ndidusa njudzi dze bathu bangu Baiziraela, mu shango ye Egipiti nge kubaloba shamu kukulu. 5 Baegipiti banowoziba kuti imi ndimi Yahwe ha ndibaloba ndidusa Baiziraela pakati kwabo.” 6 Mushe na Aroni bakashinga koga se kwabadwiwa ndi Yahwe. 7 Mushe wakabe ana makole ali makumi ali zhanakadzi (80), Aroni iye ana makole ali makumi ali zhanakadzi ana makole ali matatu (83).
Ludozo gwa Aroni
8 Yahwe bakadwa Mushe na Aroni bakati, 9 “Ha Faro angati kumuli, ‘Muzwilakidze ngoshinga jenamiso kuti matumwa nge Ndzimu.’ ” Ipapo udwe Aroni uti, “Tola ludozo gugo ugulashile pasi mbeli kwa Faro ngono gowoshanduka gukabe nyoka.” 10 Ndizo Mushe na Aroni bakayenda kuna Faro ngono bakathama sekwabakadwiwa ndi Yahwe. Aroni kalashila ludozo gugwe pasi mbeli kwa Faro ne makombgwa awe ngono gukashanduka gukabe nyoka mbeli kwabo. 11 Faro kabe edana batjenjedu ne ng'anga ne banoshingisa masalamusi be Egipiti ngono bakathamabo saikoko nge bung'anga gwabo. 12 Mmwe ne mmwe wabo kalashila pasi ludozo gugwe ngono gukashanduka gukabe nyoka. Ludozo gwa Aroni gukamidza madozo abo. 13 Nenguba kwakajalo Faro wakakukutadza moyo uwe kasibahwilile se kwakaleba Yahwe.
Mbatsha dzowila Egipiti
Malopa
14 Ipapo Yahwe bakadwa Mushe bakati, “Faro wakukutadza moyo, unolamba kuletja bathu ibaba kuti bayende. 15 Kashangane naye mangwanana, unowobe eyenda ku gwizi gwe Naili ngono iwe ummilile pa phili ye gwizi wakabhata ludozo igogu gwakatongo shanduka nyoka. 16 Uswike undwe uti, ‘Yahwe Ndzimu we Bahebheru bandituma ku kuli bakati, “Letja bathu bangu bayende kuti banondinamata mu tjilambanyika. Koga iwe na ngwenu kose autondihwilila.” ’ ” 17 Ndizo Yahwe bakati, “Oku ndiko kwandinowothama kukulakidza kuti ndimi Yahwe: Bona ndowoloba vula imu gwizi gwe Naili nge ludozo igogu ngono inowoshanduka ikabe malopa. 18 Hwobe dzimu Naili dzowofa ngono gwizi gowonuhwa Baegipiti banowoshima kung'wa vula yago.”
19 Yahwe bakadwa Mushe bakati, “Idwa Aroni atole, ludozo gugwe atambunudze luboko gugwe agumilidzile pezhugwi kwe vula dze Egipiti, pezhugwi kwe njizi dzabo ne ngolo dzabo ne makakhwa abo ne madziba abo e vula kuti ashanduke abe malopa. Kowobe ne malopa mu shango yose ye Egipiti nenge mu zwija zose zwe lukuni ne zwakathamiwa ne bgwe.”
20 Mushe na Aroni bakathama sekwa bakadwiwa ndi Yahwe mu mesho a Faro ne mu mesho e makombgwa awe. Wakamilidza ludozo kaloba vula yakabe ili mu gwizi gwe Naili ngono vula ikashanduka ikabe malopa. 21 Hwobe dzimu gwizi gwe Naili dzikafa gwizi gukanuhwa, Baegipiti bakasitubule kung'wa vula mu gwizi gwe Naili. Malopa kazhala pamwe ne pamwe mu shango yose ye Egipiti. 22 Bana masalamusi mu Egipiti bakathamabo saikoko nge masalamusi abo, ngono Faro kakukutadza moyo uwe sakale kasitongo bateedza sekwakaleba Yahwe. 23 Faro kashanduka kayenda ku bugalo gugwe ngono kasitongogala akulonga mu moyo uwe. 24 Baegipiti bose bakatsha kupoteleka gwizi gwe Naili beshaka vula yabangang'wa ngoti bakabe basingake bakang'wa vula mu Naili.
25 Kukapinda mazhuba ali kutendeka shule kwa Yahwe baloba gwizi gwe Naili.
© Kalanga Bible © Bible Society of Botswana, 2008, 2018.