Ndzimu we malebeswa ne midzimu yakabezhiwa
1 Ihwani dama la Yahwe labanomudwa imwi Baiziraela. 2 Yahwe bakati,
“Musizwidiye zila dze Bezwitjaba
kene kupalusiwa moyo nge zwilakidzo zwe zhuzhugwi,
nenguba zwitjaba zwizwitja.
3 Ngoti mipanga ye bathu manyepkhwa.
Nti unodwa mu ishaka utemegwa pasi,
ukabezhiwa nge mbezhwana nge maboko e mbezhi.
4 Banounakisa nge siliva ne golide,
bakaukothomela nge hamuli ne zwipikiri,
kuti ndizo usizunguzike.
5 Midzimu yabo inonga dato mu nnda we mabisi,
aitolebeleka,
yakafanila kusengwa,
ngoti aitoyenda.
Isimupaluse moyo,
akuna tjibiibi tjaingamuthama,
kene ikathama tjimwe tjibuya.”
6 Akuna mmwe unonga imwi Yahwe,
mu nkulu kwazo,
ne zina lenyu ligulu lina masimba.
7 Ndiani usakafanila kumutja kene,
imwi mambo we zwitjaba?
Ngoti itjetjo nditjo tjakamufanila.
Mu batjenjedu bose Bezwitjaba,
ne mu mibuso yabo,
akuna unonga imwi.
8 Bose abana mikumbulo bazwilengwe,
ndayo dze midzimu makuni asina nshingo!
9 Siliva yakathugwa inozhisiwa kudwa ku Tashishi,
golide kudwa ku Ufazi.
Midzimu yakabezhiwa mishingo ye maboko e nthuli,
zwiambalo zwayo matyila e mbala we gova ne e bushaba gwakabondelela,
wose akathamwa nge nyambi dze bashingi,
10 koga Yahwe ba Ndzimu we lebeswa,
ba Ndzimu unotjila ba mambo unogalila tjose.
Mu kugwadzamoyo kwabo shango inotengenyeka,
zwitjaba azwinga mililane ne bushongola gwabo.
11 Lebani nge kwayo muti, “Midzimu isakathama kudzimu ne shango inowokolomoka mu shango na pasi kwe zhuzhugwi.”
Lumbo gunokudza Ndzimu
12 Ndibo bakathama shango nge simba labo,
ndibo bakagadzika lubumbo nge butjenjedu gwabo,
nge hwisiso yabo bakatalabudza zhuzhugwi,
13 ha bemilidza hwi labo vula dze zhuzhugwi dzomidukana,
banothama kuti fulele imilidze kudwa mu phelelo dze shango.
Bakathama lupenyo gwe vula,
bakadusa phepo mu matula abo.
14 Nthu mmwe ne mmwe tjilengwe kakale aana luzibo,
nthuli mmwe ne mmwe we golide unobhatisiwa shoni ne midzimu iye,
ngoti zwifano zwizwe manyepkhwa,
kakale azwina meya mu zwili.
15 Azwina nshingo, zwithu koga zwe madado,
mu tjibaka tjazo tjekulobgwa shamu zowoloba.
16 Ngono iye we gobe la Jakubo aazojalo,
ngoti ndiye wakabumba zwithu zose,
Iziraela ludzi gwe thaka iye,
Yahwe Masimbawose ndilo zina labo.
17 Kubunganyani zwitolombaje zwenyu mubhude mu shango,
imwi munogala makakombiwa.
18 Ngoti Yahwe bakati,
“Bonani, ndowolashila kutjena bagali be shango nge tjibaka itjetji,
ngono ndowozhisa buyendasi mu bali,
kuti ndizo baguhwe.”
19 Yee mme wee! Ndapalala ngekwe hwubadzi dzangu!
Mabanga angu ndeasingapole!
Ngono ndakadwilila ndizwidwa nditi,
“Bugwele koga gwandakafanila dzikitadzila.”
20 Nshasha wangu wakolomogwa,
tshi dzangu dzose dzathubugwa,
bana bangu bandifupatila abatjipo,
akuna wasala kubamba nshasha wangu,
kene kuthama ntutshi wangu.
21 Ngoti balisi bazwilengwe,
abatoshakisisa muna Yahwe,
ndizo abazobhudilila,
mbudzi ne pkhwizi dzabo dzakapalala.
22 Bhulutanani! Mbiko yaswika
kushangashangana kukulu kunodwa mu shango ye bunandzwa!
Kowothama mizi mikulu ye Juda ikathukudzika,
ikabe mazwimba e phungubgwe.
Ntembezelo wa Jeremiya
23 Ndoziba imwi Yahwe kuti zila ye nthu aazoibiga munli,
kuti akute kuli mu nthu kuti alaule thambo dzidze.
24 Munditjemele imwi Yahwe kwakalizanila koga,
kusi ngekwe kugwadzamoyo kwenyu,
kungadwa mundithama ndisala ndisi watjimwe.
25 Tebulilani bushongola gwenyu mu zwitjaba zwisingamuzibe,
ne mu bathu bose basingadane zina lenyu,
ngoti bakaja Jakubo,
bakanja bakampeleledza,
bakathukudza mizi iye.
© Kalanga Bible © Bible Society of Botswana, 2008, 2018.