1 Timoti 4 - Kalanga Bible (KBTP)

Badiyi be manyepkhwa

1 Meya inoleba kulipatjena kuti, mu zwibaka zwe bupelo bamwe banowosiya kugalamoyo, ngono bakatobela meya inotjebela ne zwidiyo zwinodiyiwa nge meya mibi. 2 Zwidiyo izwezo zozha nge batjebeli be banyepi, be hana dzakadingindila dzonga dzakababugwa. 3 Banodzibila bathu kulobola, bebadziba kuti basije zwimwe zojiwa zwakathamiwa nge Ndzimu kuti zwiamutjigwe nge kutenda ndi ibabo banogalamoyo ne banoziba malebeswa. 4 Ngobe tjimwe ne tjimwe tjakathamiwa nge Ndzimu tjakanaka, kakale akuna tjakafanila lambiwa ha ili kuti tjoamutjigwa nge kutenda, 5 ngobe tjayengemadziwa nge dama le Ndzimu ne ntembezelo.

Nlanda wakalulwama wa Kirisiti Jesu

6 Ha ubudza zwikamu zwithu izwezwi, unowobe nshingi wakalulwama wa Kirisiti Jesu, wakakudzigwa mu malebeswa e kugalamoyo ne kudiya kwakalulwama kwamakatobela. 7 Koga thubukanani ne ngano ne dumilo dze manyepkhwa dzisi mu Ndzimu, uzwiwolobedze kutjila butjilo gwe kunamata Ndzimu. 8 Kusimisa mbili kwakalulwama, koga kunamata Ndzimu kwakalulwamila zwithu zose, ngobe kogadzabgwe mu butjilo guno ne butjilo gunozha. 9 Ndebo ye malebeswa inoshaka kuamutjigwa nge buzhalo ndi eyi: 10 Ngoti toshinga kwazo ngekuti takabiga kugalabgwe kwedu mu Ndzimu unotjila, iwo Ntjidzi we bathu bose, kwazo ibabo banogalamoyo.

"Praying for Africa: A Powerful Week of Intercession for Peace, Unity, and Revival"

As Africa Day approaches, we take this opportunity to reflect on the beauty, diversity, and resilience of our continent. One of the most impactful ways we can honor Africa is through prayer. This week, let’s dedicate each day to praying for a specific theme, trusting God to continue shaping Africa’s future.

11 Laya, udiye zwithu izwezwi. 12 Kushaye unokudeyelela ngobe uli ntjetjana, koga bigila bagalimoyo tjilakidzilo nge tjaunoleba nenge mu mazwiibhato awo mu ludo, mu kugalamoyo ne mu bubuyanana. 13 Kuswikila ndizha ugale ubalila bathu hwalo dze Ndzimu ne kubalaya ne kubadiya. 14 Usishayile hanya tjipo tjitjo tjawakapiwa nge kubigiwa maboko nge Gulukota le bakulu, ili thumo ye bulebesambeli. 15 Shinga zwithu izwezwi, uzwipe muzwili nge buzhalo, kuti ndizo mmwe ne mmwe abone kudwilila mbeli kuko. 16 Utjengete butjilo gugo kwazo ne tjaunodiya, uzwibhatilile mutjili, ngobe ha uijalo unowozwitjidza iwe kose ne bahwilili babo.