Mako 13 - Kalanga Bible (KBTP)

Jesu unolebeleka ngekwe kukolomogwa kwe Ng'umba ye Ndzimu

1 Jesu kati ebhuda mu Ng'umba ye Ndzimu, mmwe we badiyiwa babe kan'dwa kati, “Bonani N'diyi, mabgwe anotjenamisa ne mbako dzinotjenamisa seni idzedzi!”

2 Jesu kan'dwa kati, “Unobona mbako idzedzi ne bukulu gwadzo kene? Akuna ne bgwe ling'ompela linowosala lakatiliyana ne limwe, lisingawoligigwa pasi.”

Manikano ne kudziyidziwa

(Matewu 24:3-14Luke 21:7-19)

3 Kati agala mu Dombo le Mitoba, kulingisana ne Ng'umba ye Ndzimu, kukazha Pita na Jakubo na Johani na Enduru bakambhuzwa pasipo bathu beti, 4 “Utibudze kuti ikoku kowoshingikala lini, tjilakidzo tjowobe tjipi kulakidza ha zwithu izwezo zose zwabe pejo ngoshingikala?”

5 Ngono Jesu katangisa kubadwa eti, “Ibeni ne njele kuti kusibe ne mmwe ungamudzimidza. 6 Banji banowozha bezwidana nge zina langu beti, ‘Ndimi iye,’ ngono banowolasha bathu banjinji. 7 Koga muti ha muhwa kulebgwa ngekwe ngwa, musitongo lobgwa nge hana, ngobe kwakafanila kuti kushingikale, koga bupelo gowobe gusathu gukaswika. 8 Ludzi gowomukila gumwe ludzi ne bushe gowomukila gumwe bushe. Kowobe ne kutengenyeka kwe shango mu mituthu yakasiyana, kukabe ne bhamba. Ngono ikoku kowobe kunga kutangisa kwe zwibhayo zwe thumbgwa.

9 “Koga imwi muzwitjengete, ngobe banowomuyisa ku mabazhe, mowolobgwa mu ng'umba dze mitembezelo, mukasumikilisiwa ndi boshe na bomambo nge kwangu kupa butendeki mbeli kwabo. 10 Ndebo mbuya yakafanila kuti iswike ku njudzi dzose kutanga. 11 Muti ha bemusunga bemuzhisa ku lubazhe, bemutilika nlandu, musitongo dziyidzika ngoalakana kuti mowolebeleka muyitini. Koga mulebe itjo tjamunowobe mubudziwa nge tjibaka itjetjo, ngobe akutowobe kulebeleka imwi, koga kowobe kulebeleka Meya yakayengemala. 12 Hwola inowowongela nnung'una ku lufu, tate be nthu banowon'wongela mu lufu, bana banowomukila bazwadzi babo bakabawongela mu lufu. 13 Mowobengiwa nge bathu bose ngekwe zina langu. Koga iye unowodzikitadza kunoti ku bupelo, unowotjidziwa.

Mbipo inotjenamisa

(Matewu 24:15-28Luke 21:20-24)

14 “Muti mubona mbipo inotjenamisa ili payisakafanila kubepo (unobala ngaahwisise), ipapo bose bamu Judiya batizhile ku matombo. 15 Iye upezhugwi kwe ng'umba asideluke kangina mu ng'umba iye kutola tjimwe; 16 naiye uku minda, asibgwilile kanyi kunotola ngubo. 17 Yee mme wee! Kowobangalala seni kumuli imwi bakadzi bakazwisenga ne banomwisa mu misi iyeyo! 18 Tembezelani kuti ikoku kusishingikale mu nsi we mbaba. 19 Ngoti mu misi iyeyo kowobepo kudziyidzika kukulu kusakatongo bepo kudwila mu kubumbiwa kwe shango nge Ndzimu kuswikila ngwenu, akutowopapha kukabe yapo kakale. 20 Ngono ha She akabe asatapudza mazhuba iyawo, akuna nthu wabe angatjidziwa. Koga ngekwe bashalugwa babe baakashalula wakathama kuti mazhuba iyawo abe mashomanana.

21 “Mu tjibaka itjetjo ha mmwe angamudwa kati, ‘Bonani woyu Mesiya kene hwouje,’ musitongo duma. 22 Kowozha Bomesiya be manyepkhwa ne balebesambeli be manyepkhwa be lakidza zwilakidzilo bethama matjenamiso kulasha bathu, bukulu kwazo ibabo bakashalugwa, ha kwabe kutubuka. 23 Koga mube ne njele, ngoti ndamubudza tjimwe ne tjimwe kutjikale.”

Kuzha kwe Nkololo we Nthu

(Matewu 24:29-31Luke 21:25-28)

24 “Kowoti mu mazhuba iyawo, shule kwe dzimanikano, zhuba lowoti zwititi, ne mwedzi awutowopa tjedza tjawo, 25 ne nyenyedzi dzowowila pasi ne masimba a pezhugwi anotengenyeka. 26 Ngono ipapo banowobona Nkololo we Nthu ezha ali mu makole ana masimba makulu ne tjedza. 27 Ipapo unowotumila batumwa be kudzimu ku mbizho nna dze shango, kukubunganya bashalugwa kudwa mu phelelo dze shango kunoti ku phelelo dze zhuzhugwi.

Muzwidiye nge mpaya

(Matewu 24:32-35Luke 21:29-33)

28 “Muzwidiye nge mpaya, ha utangisa uthinila, muzibe kuti tjilimo tjabe pejo. 29 Ndizo namwibo muti ha mubona zwithu izwezwi zwishingikala, muzibe kuti wabe pejo pejo, upa nkoba. 30 Ndolebesa ndoti kumuli, tjizekugwana itjetji atjingapinde zwithu izwezwi zose zwisathu zwikashingikala. 31 Zhuzhugwi na pasi zowopela, koga matama angu anowosala.

Akuna unoziba ngekwe zhuba kene tjibaka

(Matewu 24:36-44)

32 “Koga zhuba ilelo kene tjibaka itjetjo, akuna unotjiziba, batumwa be kudzimu kene iye Nkololo, abasi Tate boga. 33 Ibeni nge njele, mulinde, mutembezele, ngobe amutoziba kuti tjibaka tjowoswika lini. 34 Konga nthu ha etola gwendo, unoti ha ebhuda kapa balanda babe mishingo, mmwe ne mmwe kalingisana ne uwe. Kadwa ntjengeti we nkoba kati, ugale wakalinda. 35 Namwibo mugale makalinda, ngobe amutoziba kuti batetshi be nzi banowoswika lini. Pamwe banowoswika madekwana, kene pakati kwe busiku, kene hwuku dzilila kene mangwanana. 36 Lindani, ndizo basiti bezha makafala, bakamuwana makayizela. 37 Tjandinomubudza, ndobudza bose, ‘Lindani.’ ”