Bhelelo le tjibaka
1 “Nge tjibaka itjetjo Mikaele ntumwa we kudzimu nkulu unolisa bathu babo unowozha. Kowobe kuli tjibaka tje manikano hwulu kwazo kusakatongo bepo kudwa tjose mu kutangisa kwe zwitjaba kuwoti ngwenu. Koga mu tjibaka itjetjo bathu babo, bose be mazina anowowang'wa akakwagwa mu bhuka banowotjidziwa. 2 Banjinji bakafa banowomuka, bamwe babo bakabona butjilo gusingapele koga bamwe banowomukila kubhakhwa nge shoni ne kulengudzika kusingapele. 3 Ibabo bakatjenjela banowopenya se tjedza tje zhuzhugwi ngono banotungamilila banji ku ndulamo banowopenyela tjatjose se nyenyedzi. 4 Koga iwe Daniyele zwimba matama iyawa e bhuka iyeyi ube uzhalila bhuka iyeyi ngo biga itempa muili kudzina kunoti ku bupelo gwe shango.” Banjinji banoyenda yeno na yeno beshaka luzibo ngono luzibo gowowanda.
5 Ngono ipapo imi Daniyele ndakati kudwapo alinga ngono abona balume babili mmwe alimile pa imwe phili ye gwizi mmwe ku imwe. 6 Ngono mmwe wabo kadwa nlume wakaambala jila le ntengo upezhugwi wakabe akaangama pezhugwi kwe vula mu gwizi kati, “Bhelelo le zwithu izwezwi zwinotjenamisa lowozha lini kene?”
7 Nlume wakaambala zwiambalo zwe ntengo upezhugwi wakabe akaangama pezhugwi kwe vula mu gwizi kamilidzila maboko awe wose pezhugwi ngono anhwa etuna ne Ndzimu unotjila eti, “Kowotola tjibaka, kowotola makole ali matatu ana gaswa, kowoti simba le bathu bakayengemala lapela ndiko kwakunowoshingikala zwithu izwezwi zose.”
8 Ndakahwa ngono ndikasibhatisise kuti wakabe edwani eijalo ndizo ndakambhuzwa nditi, “Tetshi wangu konopelela kwakatini kose ikoku kene?”
9 Wakashandula eti, “Tjimilika uyende Daniyele ngoti matama iyawa azwimbiwa, kabigwa itempa kunoti ku bupelo gwe shango. 10 Banji banowotjenapadziwa bakatjena bakasala basina ndodwa ne itoyi koga babi ibo banowodwilila ngo thama mbipo. Akuna we babi unowohwisisa koga batjenjedu ibo banowohwisisa.
11 “Kudwa mu tjibaka tjinowobe tjamisiwa zwibhayilo kube kubigwa tjimwe tjinoshimisa, kowobe mazhuba ali tjiwulu, kowobe kuli mazhuba ali tjiwulu tjina mazana mabili ana makumi ali zhanalume (1 290). 12 Kwakakombolegwa ibabo banowobhatilila mu bugalimoyo kudzina mazhuba ali tjiwulu tjina mazana ali matatu ana makumi ali matatu ana ali mashanu (1 335) awila.
13 “Koga iwe Daniyele ubhatilile kudzina kunoti ku bupelo. Unowofa ngono mukumuka kuko unowopiwa thaka iyo.”
© Kalanga Bible © Bible Society of Botswana, 2008, 2018.