Ndzimu banoshalula Sirasi kusunungula Iziraela
1 “Yahwe banolebeleka ne nzhodziwa wabo Sirasi,
iye wandakabhata nge luboko gwe luji,
kutebamisa zwitjaba mbeli kukwe,
ne kuambula bomambo hazu dzabo,
ne kuzhula mikoba mbeli kukwe,
mazhalilo aatowozhaligwa.
2 Ndowokutungamila,
ndowokolomodza matombo,
ndowovunanya matendele e phangula,
apinda ndivunanya mapangwana e butale.
3 Ndowokupa fumwa ye zhalima,
fumwa inodwa mu magalo akasumbikika,
kuti ndizo uzibe kuti imi ndimi Yahwe, Ndzimu we Iziraela,
iwo unokudana nge zina lilo.
4 Ngekwe nlanda wangu Jakubo,
ngekwa Iziraela iye wandakashalula,
ndokudana nge zina lilo,
ndakakuteta nge kukupa zina, nenguba usingandizibe.
5 Ndimi Yahwe, akuna mmwe usi imi,
kuzhe kwangu akuna ndzimu.
Ndowokupa masimba, nenguba usingandizibe,
6 kuyita kuti kudwa ku bhezhuba kunoti ku golombedzo,
bathu bazibe kuti akuna mmwe kuzhe kwangu,
ndimi Yahwe, akuna mmwe usi imi.
7 Ndobumba tjedza asika zhalima,
ndokombolela azhisa bhiso,
imi Yahwe ndothama zose zwithu izwezwi.
8 “Kudzimu zhuzhugwi ngakunise,
ngakunise ndulamo se vula,
makole ngaakunisile pasi.
Shango ngaizhuke, jidzo ngalimele,
ndulamo ikule nalo,
imi Yahwe ndimi ndakakubumba ikoku.
9 “Yee mme wee wapalala iye unonyanyaidzana ne mbumbi uwe!
Iye hali ye ntapkhwi we ntapkhwi we mavu!
Apa ntapkhwi ungadwa unowusinyanga ukati,
‘Unothamani kene?’
Apa nshingo uwo ungati,
‘Aana maboko kene?’
10 Yee mme wee wapalala iye unoti kuna tate babe,
‘Ini tjamakazwala kene?’
Kene eti kuna mmeyabe,
‘Mumu zwibhayo zweni kene?’
11 “Yahwe, ibo Wakayengemala we Iziraela,
kakale Mbumbi wayo bakati,
Ngekwe zwithu zwinowozha, apa ungandibhuzwa ngekwe bana bangu kene?
Ungandilaya ngekwe nshingo we maboko angu kene?
12 Ndakathama shango, abumba bathu muili.
Ndakatambunudza kudzimu nge maboko angu,
abumba zose zwi pezhugwi.
13 Ndakamilidza Sirasi mu ndulamo yangu,
ngono ndowotambunudza zijana dzidze dzose,
unowobaka nzi wangu nkulu kabuya kasunungula bathu bangu bakatapiwa,
asingakuthamile kulipiwa kene mbhayilo,
koleba Yahwe Masimbawose.”
14 Yahwe banoleba beti,
“Fumwa ye Egipiti ne thundu ye Itopiya ne Basabiya,
bathu bakakula balefu, banowozha ku kuli bakabe babo,
banokutobela, banowozha bakasungwa nge ketani ngono banowokuthigamila.
Banokutembezela beti, ‘Dumbu Ndzimu unawe,
akuna mmwe kakale, akuna ndzimu kuzhe kwawo.’ ”
15 Nge malebeswa mu Ndzimu unozwisumbika,
imwi Ndzimu we Iziraela, Ntjidzi.
16 Bose bathami be midzimu inobezhiwa banowobhakhwa nge shoni bakalengudzika,
banowohwumana bose kang'ompela.
17 Koga Iziraela inotjidziwa ndi Yahwe nge jidzo lisingapele,
amungatongo bhakhwa nge shoni kene mukalengudzika nge kusingapele.
18 Ngoti Yahwe, ibo bakabumba kudzimu, ndibo Ndzimu,
ibo bakalongolosa bakathama shango, bakaigadzikanya,
abazoithama isina mbumbiko,
koga bakaibumba kuti igagwe.
Ngono bakati, “Ndimi Yahwe, akuna mmwe kakale.”
19 Andizolebeleka mu zwikowa,
mu shango ye zhalima,
andizotongodwa ludzi gwa Jakubo ati, “Mundishakile suli.”
Imi Yahwe ndoleba malebeswa, ndoleba tjakalulwama.
20 Shanganani muzhe mu kubungane,
imwi bakasala be zwitjaba.
Ibabo bakasenga midzimu yabo yakabezhiwa abana zibo,
banodwilila betembezela ndzimu usingake ukatjidza.
21 Lebani ndebo yenyu, letjani bakumbuludzane.
Ndiani wakakuleba ikoku ntolo kene?
Ndiani kene wakakuleba mu misi ya ntolo?
Apa ate ndili imi kene, imi Yahwe?
Akuna Ndzimu kuzhe kwangu,
ndi Ndzimu wakalulwama ndili Ntjidzi,
akuna mmwe kuzhe kwangu.
22 Shandukilani kundili mutjidziwe,
imwi phelelo dzose dze shango.
Ndi Ndzimu akuna mmwe kakale.
23 Ndakatuna nge zina langu,
nge nlomo wangu ndakaleba nge ndulamo dama lisingake lika shanduka nditi,
“Tjidwi tjimwe ne tjimwe tjowondithigamila,
lulimi gumwe ne gumwe gowotuna nami.”
24 Banoleba nge kwangu beti,
“Ndulamo ne matatabuko zowang'wa muna Yahwe koga.”
Bose bakabagwadzila moyo banowozha ku bali bakabhakhwa nge shoni.
25 Ludzi gose gwa Iziraela gowokunda
gukakudziwa muna Yahwe.
© Kalanga Bible © Bible Society of Botswana, 2008, 2018.