Mambo Josiya we Juda
(2 Zwiyitikalo 34:1-2)1 Josiya wakabe ana makole ali zhanakadzi tjibaka tjaakatangisa kubusa, wakabusa makole ali makumi matatu ana gole (31) mu Jerusalema. Zina la mmeyabe lakabe liyi Jedida nkololokadzi wa Adayiya we Bhozikati. 2 Kashinga ndulamo mu mesho a Yahwe ngono katobela zila dzose dza tate babe Dafite, kasipambukile ku luboko gwe luji kene lumeshwe.
Lukwalo gwe nlayo go wang'wa
(2 Zwiyitikalo 34:8-28)3 Mu gole le bugumi lina zhanakadzi le mbuso wa Mambo Josiya, mambo bakatuma Shafani nkololo wa Azaliya ali nkololo wa Meshulamu ku Ng'umba ya Yahwe, eti, 4 “Yenda kuna Hilikiya mpirisiti nkulu a bale mari akazhisiwa mu Ng'umba ya Yahwe, akakubunganyiwa ne balindi be mikoba mu bathu. 5 Baape batungamili bakabigwa be nshingo we Ng'umba ye Ndzimu. Balipe bashingi banomusa Ng'umba ya Yahwe, 6 kuli babezhi ne babaki ne babezhi be mabgwe ne kutenga mapango ne mabgwe akabezhiwa ku musa Ng'umba ye Ndzimu. 7 Koga akutowoshakiwa kuti mari dzabakapiwa dzashinga tjini ngoti banoshinga nge lebeswa.” 8 Hilikiya mpirisiti nkulu kadwa Shafani we nkwalili eti, “Ndawana lukwalo gwe nlayo mu Ng'umba ya Yahwe.” Ngono Hilikiya kapa Shafani lukwalo kagubala. 9 Shafani we nkwalili kazha kuna mambo kandwa kati, “Balanda babo badusa mari abe ali mu Ng'umba ya Yahwe ngono baapa batungamili be bashingi be Ng'umba ya Yahwe.” 10 Ipapo Shafani we nkwalili kabudza mambo eti, “Hilikiya we mpirisiti wandipa lukwalo.” Shafani kagubala mbeli kwa mambo.
11 Ngono kukati mambo ehwa matama e lukwalo gwe nlayo, kapalula zwiambalo zwizwe. 12 Ipapo mambo bakadwa Hilikiya we mpirisiti na Ahikamu nkololo wa Shafani na Atjibori nkololo wa Mikaya na Shafani we nkwalili na Asaya nlanda wa mambo kati, 13 “Yendani munondibhuzwila kuna Yahwe, imi ne bathu ne Juda yose ngekwe matama e lukwalo igogu gwawang'wa, ngoti bushongola gwa Yahwe bukulu gwatiwila, ngobe botate bedu abazolondolodza matama e lukwalo igogu, kushinga kuyendidzana nge tjakakwagwa nge kwedu.”
14 Ndizo Hilikiya we mpirisiti na Ahikamu na Atjibori na Shafani na Asaya bakayenda kuna Hulida we nlebesambeli we tjikadzi, ali nkadzi wa Shalumu nkololo wa Tikiva ali nkololo wa Harihasi, ntjengeti we zwiambalo, wakabe egala mu Jerusalema mu ntuthu we bubili. Bakalebesana naye. 15 Ngono kabadwa kati, “Yahwe Ndzimu we Iziraela bakati, ‘Budza balume bakutuma kundili uti, 16 Yahwe bakati, “Ndowozhisa mbatsha mu bugalo igogu ne bagali bago, kuyendidzana nge tjimwe ne tjimwe tjakakwagwa mu lukwalo gwabagwa na mambo we Juda. 17 Ngoti bandifupatila, bapisila midzimu ipoga motsha, kuti bandilonge bushongola nge mishingo yose ye maboko abo, ndizo wali bushongola gwangu gowothutila bugalo igogu ngono agutowodzimiwa. 18 Koga ngekwe mambo we Juda wamutuma kuwobhuzwa kuna Yahwe, tjamunowombudza ndiyetji, Yahwe Ndzimu we Iziraela bakati: Ngekwe matama awahwa, 19 se moyo uwo wakabe nnyolo kakale ukazwiyisa pasi mbeli kwa Yahwe uhwa tjandakaleba ngekwe bugalo igogu ne bathu bago, kuti banowobe bhiso ne duluthulu le malala, ukapalula zwiambalo zwizo ukalila mbeli kwangu, namibo ndakuhwa, koleba Yahwe.” 20 Ndizo wali bona, ndowokubgwiliza kuna bo tate babo, unowobiganyiwa nge kunyalala. Mesho awo aatowobona mbatsha dzose dzandinowozhisa mu bugalo igogu.’ ” Ndizo bakabgwiliza shandulo kuna mambo.
© Kalanga Bible © Bible Society of Botswana, 2008, 2018.