Goliati unotanga Baiziraela
1 Ndizo Bafilisitiya bakakubunganyila babhayani babo ngwa, bakakubunganila ku Soko mu Juda. Bakakotokela mu Efesidamimu, pakati kwe Soko ne Azeka. 2 Saulo ne Baiziraela bakakubungana bekotokela mu nkuku we Elaya, bakabumba zwikwata kubhayana ne Bafilisitiya. 3 Bafilisitiya bakabe bali mu limwe duthu, Baiziraela bali mu limwe, bakalonga nkuku pakati kwabo. 4 Ipapo kukabhuda gwelemba mu mishasha ye Bafilisitiya linoyi Goliati, we ku Gati, we bulefu gungabe thambo dzili thatu. 5 Wakabe akaambala hwutshe ye phangula mu nsholo, akaambala tjiambalo tje phangula tjinonga ikwapa tje hamba, kulema kwatjo kwakabe kuli shekele dzili zwiwulu zwishanu (5 000) zwe phangula. 6 Mu makumbo awe wakabe ana zwivikisi zwe phangula ne thumo le phangula pakati kwe mathudzi awe. 7 Lukombo gwe thumo lile gwakabe gulizana ne lutungo, kulema kwe nsholo we thumo lile kwakabe kuli shekele dzili mazana matathatu (600) e phangula. Nsengi we tjiviki tjitje wakabe akantungamila. 8 Wakama kamimilila ku miphatho ye Baiziraela kati, “Apa mabhudilani makazwilulwamisila ngwa kene? Apa anditeli Nfilisitiya imi kene? Imwi amutemuli balanda ba Saulo kene? Muzwishalulile nlume, azhe kundili. 9 Ha angatubula gwa nami ebe endibulaya, towobe balanda benyu, koga andingankulila ambulaya, mowobe balanda bedu mukatishingila.” 10 Nfilisitiya iwoyu kabe eti, “Nasi ndotjotja miphatho ye Iziraela! Mundipe nlume, kuti tibhayane.” 11 Kwakati Saulo ne Baiziraela bose behwa matama e Nfilisitiya iwoyu, bakashweshwana bakatja kwazo.
12 Dafite wakabe ali nkololo wa Jesi we Nfurati we Bhetelehema mu Juda, wakabe ana bakololo bali zhanakadzi (8). Mu misi ya Saulo wakabe atjikwegula abe ne makole manjinji. 13 Bakololo ba Jesi batatu bahwola bakabe batobela Saulo ku ngwa. Awa ndiwo mazina abo, we mbano wakabe eyi Eliabu, etobegwa ndi Abinadabu we butatu eyi Shama. 14 Dafite wakabe ali iye kologwe, bahwola batatu bakatobela Saulo, 15 koga Dafite wakabe egala esiya Saulo enofudza pkhwizi dza tate babe ku Bhetelehema. 16 Kwakabe mazhuba ali makumi manna (40) Nfilisitiya iwoyu ebhuda ema pa lubazhe mangwanana ne madekwana. 17 Jesi kadwa nkololo uwe Dafite kati, “Tolela bakulu babo hwomwana ye nkakhwa we mathunde ne zwiwunga zwili gumi, uzwisengele tjinyolotjo ku mishasha ku bakulu babo. 18 Utolelanye ne tjatjile dzili gumi unopa nlauli wabo we babhayani bali tjiwulu (1 000). Ubabone bakulu babo, ngono ubhuzwe se kwabanomuka kudwa ku bali.”
19 Bakabe bana Saulo, ne balume bose be Iziraela, bali mu nkuku we Ela begwa ne Bafilisitiya. 20 Dafite wakabinduka kutji mangwanana, akasiya pkhwizi ne nlisi, katola mbuba, kayenda sekwa adwiwa ndi Jesi. Wakaswika ku mishasha ewana babhayani beyenda ku bugwilo, bakalonga mima ye ngwa. 21 Baiziraela ne Bafilisitiya bakabe bali mile bakalingisana zwikwata zwakapinilana. 22 Dafite wakasiya ntolo uwe mu maboko e nlindi we thundu, kalabukila ku zwikwata, kanodumilisa bakulu babe. 23 Wakati atjalebeleka nabo, gwelemba le Nfilisitiya we Gati, linodang'wa Goliati, likabhudila patjena kudwa mu zwikwata zwe Bafilisitiya, kabgwilulula matama awe e mazhuba wose. Ngono Dafite akanhwa. 24 Balume bose be Iziraela bose, bakabe beti abebona nlume iwoyo, bakantshetshemba, bakabe ne kutja kukulu kwazo. 25 Baiziraela bakabe beti, “Apa mombona nlume iwoje kene? Tjoselele wazhila kuwolengudza Iziraela. Nlume ungabulaya Nfilisitiya iwoyu, mambo banowonfumisa kusikushoma, bebuya benlobodza nkololokadzi wabo, kakale ne nsha wa tate babe unowobe ne sununguko mu Iziraela.” 26 Dafite wakabhuzwa babhayani baakabe alimile nabo kati, “Apa nlume unowobulaya Nfilisitiya iwoyu ebuya edusa Iziraela shoni unowoshingigwani kene? Iye ndiye ani, Nfilisitiya iwoyu usakathumbigwa, unolengudza babhayani be Ndzimu unotjila kene?” 27 Babhayani bakan'dabila nge hwi ling'ompela beti, “Unowotogwa sekwa kungatogwa nlume wabulaya Goliati.”
28 Nkulu uwe Eliabu kanhwa elebeleka ne babhayani, kan'gwadzila moyo kwazo, kambhuzwa kati, “Wazhilani ngeno, wasiya pkhwizi idzedzije dzisingana naani mu tjilambanyika kene? Ndoziba mazwikudzo awo nenge bukukutu gwe moyo uwo, wazhila iko kuwolingilila ngwa.”
29 Dafite kadabila eti, “Ndathamani sangwenu? Kunlandu kuti ndilebeleke?” 30 Katendebuka kalinga ku mmwe, kalebazwe sekwa aleba kutanga, ngono bathu bakan'dabila sekwa adabigwa kutanga.
31 Tjakalebgwa ndi Dafite tjakahwika, tjikabikigwa Saulo, Saulo kantumila bathu bakan'dana. 32 Dafite kadwa Saulo kati, “Kusitongobe ne unopela moyo ngekwe Nfilisitiya iwoyo, nlanda wenyu unonobhayana naye.”
33 Saulo kashandula Dafite eti, “Aungatubule kunogwa ne Nfilisitiya iwoyu, ngobe iwe utji mbisana ntjetjana, iye tjinga kwaakabe n'gwi kudwa mu buzhuzha gugwe.” 34 Koga Dafite kadwa Saulo kati, “Nlanda wenyu wagala elisa pkhwizi dza tate babe, ngono shumba kene bhera yabe iti ayazha ikatola pkhwizana mukati kwe pkhwizi, 35 ndoilonda, ndibe ndinogwila pkhwizana ndiidusa mu nlomo wayo, ngono ha ingashandukila kundili, ndoizhwabula nge mavele ayo ailoba aibulaya. 36 Nlanda wenyu wakabulaya kose shumba ne bhera, ngono Nfilisitiya iwoyu usakathumbigwa kowonshingikalilabo se tjimwe tjazo, ngobe walengudza babhayani be Ndzimu unotjila.” 37 Dafite kapapha kati, “Yahwe bakanditjidza kudwa mu simba le shumba ne kudwa mu simba le bhira, banonditjidza kudwa mu maboko e Nfilisitiya iwoyu.” Saulo kadwa Dafite kati, “Yendazo, ngono Yahwe babe nawe!” 38 Saulo kambadza Dafite zwiambalo zwizwe, kambadza jasi le ngwa ne hwutshe ye phangula mu nsholo. 39 Dafite wakashomeka bukanu gwa Saulo pezhugwi kwe zwiambalo zwe ngwa, kagwiso yenda ngono kukakona, ngobe asakazwiwolobela. Ndizo Dafite kadwa Saulo kati, “Andingayende ndakaambala zwithu izwezwi, ngobe andizozwiwolobela.” Ngono kazwiambula. 40 Dafite katola lukombo gugwe nge luboko, kashalula mabgwe e hwulungwana ali mashanu mu lukobana, kaalonga mukati kwe hwomwana iye, ye nlisi we pkhwizi, kasedzela pejo ne Nfilisitiya, akabhata tjivirimabgwe tjitje nge luboko.
Dafite unokunda Goliati
41 Nge tjibakana Nfilisitiya kasedzela kuna Dafite, ana nsengi we zwibhayano zwizwe akantungamila. 42 Kukati Nfilisitiya elinga Dafite embona, ali mbisananyana, nshaba mbuya, kanthaedza mesho. 43 Nfilisitiya kadwa Dafite kati, “Apa ndi mbgwa imi, kwaunozha kundili nge zwikunyana?” Ngono Nfilisitiya kalonga Dafite bhiso nge zina le midzimu iye. 44 Kandwa kati, “Zhangeno, nyama iyo ndowoipa manyuni ne zwibandana zwe shango.” 45 Koga Dafite kadwa Nfilisitiya kati, “Unozha kundili wakabhata bukanu ne thumo ne thumonyana, koga imi ndozha ku kuli nge zina la Yahwe Masimbawose, Ndzimu we ngwa dze Iziraela, iwoyu wawa lengudza 46 Nasi Yahwe banowokulonga mu maboko angu, ndowokuloba akuligila pasi akuthubula nsholo. Nasi zwidumbu zwe ngwa ye Bafilisitiya ndowozwipa nyuni ne zwibandana zwe shango, ngono shango yose inowoziba kuti kuna Ndzimu mu Iziraela. 47 Bose ibaba bakakubungana ipapa banoziba kuti Yahwe abatotjidza ne bukanu ne thumo, ngobe ngwa nde ya Yahwe, banothama kuti mose timukunde.” 48 Kwakati Nfilisitiya esedzela kuti anobulaya Dafite, Dafite kalabuka tjinyolotjo kushanganidza. 49 Dafite kalonga luboko mu hwomo iye, kadusa bgwe, kalilonga mu tjivirimabgwe, kaposa kaloba Nfilisitiya pa phazha, bgwe likatinyume mu phazha iye, akawila pasi nge phazha. 50 Tjinyolotjo Dafite kakunda Nfilisitiya nge tjivirimabgwe ne bgwe, asina bukanu mu luboko gugwe, kaloba Nfilisitiya kanligila pasi kambulaya. 51 Dafite kalabuka kanoma pa Nfilisitiya, kashomola bukanu mu khata yago kambulaya, kati asinombulaya kanthubula nsholo nge bukanu.
Kwakati Bafilisitiya bebona kuti gwelemba lafa, bakatizha. 52 Balume be Iziraela ne Juda bakamilika ne mima bakatatana ne Bafilisitiya kunoti ku Gati ne ku mikoba ye Ekironi. Zwitumbu zwe Bafilisitiya zwakabe zwakaandama mu zila ye Shaaraimu kunoti ku Gati ne Ekironi. 53 Baiziraela bakati bedwa kutatana ne Bafilisitiya, bebe betapa thundu yakabe ili mu mishasha yabo. 54 Dafite wakatola nsholo we Nfilisitiya kauyisa ku Jerusalema, koga zwibhayano zwe Nfilisitiya kazwibiga mu nshasha uwe. 55 Kwakati Saulo ebona Dafite ebhuda enoshanganidza Nfilisitiya, kabhuzwa Abineri nlauli we babhayani kati, “Abineri, nzhuzha iwoyu nkololo waani kene?” Abineri kashandula eti, “Ndotuna ne butjilo gwenyu, imwi mambo, anditonziba.” 56 Mambo kandwa kati, “Bhuzwa kuti nzhuzha iwoyu nkololo waani.”
57 Kukati Dafite ebuya kubulaya Nfilisitiya, Abineri kantola kan'yisa kuna Saulo, Dafite wakabe akabhata nsholo we Nfilisitiya nge luboko. 58 Saulo kambhuzwa kati, “Nzhuzha, unkololo waani kene?” Ngono Dafite kashandula eti, “Ndi nkololo we nlanda wenyu Jesi we Bhetelehema.”
© Kalanga Bible © Bible Society of Botswana, 2008, 2018.