1 Ndimi Paulo ntumwa wa Kirisiti Jesu nge kuda kwe Ndzimu. Ndina Timoti ikamu tjedu.
2 Ku bayengemali, ibo zwikamu zwinogalamoyo muna Kirisiti, zwimu nzi we Kolosi.
Ngoni ne kunyalala kunodwa ku Ndzimu Tate bedu ngazwibe namwi.
Ntembezelo we kuboka
3 Misi yose ha timutembezelela, toboka Ndzimu ibo Tate ba She wedu Jesu Kirisiti, 4 ngobe takahwa ngekwe kugalamoyo kwenyu muna Kirisiti Jesu nenge ludo gwamunago mu bayengemali bose. 5 Oku koikhwa nge kugalabgwe kwamakabigigwa kudzimu. Makahwa kale ngekwe kugalabgwe ikoku mu dama le malebeswa, iyo ndebo mbuya, 6 yakazha mu shango yose, inozwala zwizwalo kakale ikula sekwa yakayita pakati kwenyu kudwila zhuba lamakaihwa mukahwisisa ngoni dze Ndzimu mu malebeswa. 7 Sekwa makahwa na Epafurasi, nlanda naswi unodika, unoshingila Kirisiti nge malebeswa mu bumo gwedu. 8 Wakatibudza ngekwe ludo gwamakapiwa nge Meya.
9 Ngekwa ikoku, kudwa tjose mu zhuba latakahwa nge kwako, atizotongo letja kumutembezelela ne kukumbila Ndzimu kuti umuzhadze nge luzibo gwe kuda kwawo mu butjenjedu gose ne kuhwisisa kunozhisiwa nge Meya yawo, 10 kuti ndizo mutjile butjilo gwakalulwamila She, gunonshathisa nge buzhalo, makadwilila nge mishingo yenyu yakalulwama inozwala zwizwalo nenge sekwa luzibo gwenyu ngekwe Ndzimu gupaphidzika. 11 Dzene mungasimisiwa nge kusima kose kunodwa mu simba lawo gulu. Kuti ndizo mutubule kube ne kusimisila kukulu ne moyonlefu, nekushatha, 12 nekuboka Tate, ibo bakatithama kuti tibe ne fanilo dzekube ne gobe mu thaka ye bayengemali mu bushe gwe tjedza. 13 Wakatidusa mu simba le zhalima ukatiyisa ku bushe gwe Nkololo wawo unodika, 14 iye watinowana kudzutunungwa ne mazwiibhatigo e zwibi.
Kirisiti ne nshingo uwe
15 Kirisiti tjifano tje Ndzimu usingaboneke, ndiye mbano ye lubumbo gose. 16 Zwithu zose zwakabumbigwa munli, zwithu zwi kudzimu ne zwimu shango, zwinoboneka ne zwisingaboneke, zwigalo zwe bushe kene mibuso kene babusi kene balauli. Ndzimu wakathama zwithu zose ndiye uzwithamila iye. 17 Wakabe yapo zwithu zose zwisathu zwikabe yapo, munli tjimwe ne tjimwe tjimu magalo atjo. 18 Ndiye nsholo we mbili, ilo gubungano. Ndiye kutangisa, kakale ndiye we kutanga emusiwa mu bafi, kuti ndizo abe pezhugwi mu tjimwe ne tjimwe. 19 Kwakashathisa Ndzimu kuti mbumbiko yawo yose igale munli. 20 Ndzimu wakagadzanya zwithu zose nawo ndiye, mu shango ne kudzimu, uthama mbakiso nge malopa e tjileyanyo tjitje.
21 Ngono imwi makatongobe makathubukana ne Ndzimu, muli zwita zwawo mu mikumbulo yenyu mushinga zwa zwakabipa, 22 koga ngwenu, nge lufu gwe nkololo wawo Ndzimu wakamugadzanya, kuti ndizo umubone mbeli kwawo makayengemala musina nlandu kakale musinga soleke. 23 Kodwa koga mu kuti modwilila mu kugalamoyo, makagadzikana makasimisila musingatsheduke mu kugalabgwe mu ndebo mbuya yamakahwa yakasumikiligwa itjili tjimwe ne tjimwe tjimu shango, iyo imi Paulo yandakabe nshingi wayo.
Nshingo wa Paulo
24 Ngwenu, ndoshatha mu kuhwisiwa zogwadza kwangu nge kwenyu, ngono mu nyama yangu ndopeleledza tjakasala mu kuhwisiwa zogwadza kwe mbili wa Kirisiti, ilo gubungano. 25 Ndakabe nshingi we gubungano nge nshingo wandakapiwa nge kwenyu, kuti dama le Ndzimu lizibgwe nge buzhalo, 26 lili masazibgwe akasumbikala makole manjinji mu zwizekugwana zwinjinji, koga ngwenu akazibisiwa bayengemali bawo. 27 Kubali Ndzimu wakashalula kuti bazibe kuti bukulu gwe fumwa ye gudzo le masazibgwe iyawa gungapani mu njudzi dzose, masazibgwe iyawa ndikuti Kirisiti unogala mu muli, iye kugalabgwe kwe gudzo. 28 Ndizo Kirisiti ndiye watinosumikila, titjemela kakale tidiya mmwe ne mmwe butjenjedu gose, kuti ndizo tizhise mmwe ne mmwe akapelela muna Kirisiti. 29 Kuti ikoku kutubuke, ndoshinga ndigwisa nge simba la Kirisiti linondisimisa lishinga lili mundili.
© Kalanga Bible © Bible Society of Botswana, 2008, 2018.