Iziraela tjedza tje zwitjaba
1 Mundihwilile imwi shango dzimu tjekelo dze gungwa,
teedzani, imwi bathu banodwa kule.
Yahwe bakandidana ndisathu azwagwa,
ndakati nditji mu tjibumbilo tja mme bakanditumila zina.
2 Bakathama nlomo wangu ukanga bukanu gunopitsha,
banondisumbika mu ntutshi we tjiazha tjabo,
bakandithama anga nsebe wakuswiwa,
banondisumbika mu gobhodo labo.
3 Ngono bakandidwa bakati, “Iwe u nlanda wangu,
mukuli ndowolakidza gudzo langu.”
4 Koga ndakati, “Ndakashingila masimbamalashe,
ndakashingisila matatabuko angu suli ne madatha,
koga nenguba kwakajalo tjandakashinga tjikuna Yahwe,
mbhayilo wangu uku Ndzimu wangu.”
5 Ngwenu Yahwe bakati,
ibo bakandibumba kube nlanda wabo,
kubgwiliza Jakubo ku bali,
ne kukubunganyila Iziraela ku bali,
ngoti ndakudziwa mu mesho a Yahwe,
kakale Ndzimu babe matatabuko angu,
6 bakati,
“Kuthu kutukununu kuti ube nlanda wangu
kubuzila njudzi dza Jakubo mu tjimo,
ne kubuza bakatjila be Iziraela,
ndowokuthama ukabe tjedza ku zwitjaba
kuti jidzo langu linoswika ku ndzibo we shango.”
7 Yahwe bakati,
ibo Ndzutunuli we Iziraela ne N'yengemali wayo
kuna iwoyu wakalengudziwa,
kashimiwa nge zwitjaba, kabe nlanda we babusi
bakati, “Bomambo banowokubona, bakamilika,
makombgwa iwo banowokuthigamila
ngekwa Yahwe ibo banogalika moyo,
ibo Wakayengemala we Iziraela bakakushalula.”
Kubgwiliziwa kwe Iziraela
8 Yahwe banolebeleka bakati,
“Ndowomudabila mu tjibaka tje kuda kwangu,
mu zhuba le jidzo ndowomubhatsha,
ndowomulondolodza amuthama tjidumano ku bathu,
kubiga shango ne kukoba thaka dzayo dzakabe dzathukudziwa
9 udwa basungwa uti, ‘Bhudani,’
kuna bamu zhalima uti,
‘Muzwilakidze.’
Banowoja bali mu dzizila,
banowowana mafulilo pezhugwi kwe matuthu akathukudzika,
10 abangabhakhwe nge zhala kene nge nyota,
kene phepo inopisa ye tjilambanyika kene zhuba azwingabapise,
ngoti iye unobahwila zogwadza unowobatungamila,
unowobayisa ku misenya ye vula.
11 Pana matombo ndowothama zila,
zila dzangu phabi dzowomilidzika.
12 Bonani, banowodwa kulekule,
bamwe banowodwa ku bunandzwa
bamwe bedwa ku golombedzo,
bamwe banowodwa ku ntuthu we Siyene.”
13 Kudzimu ngakumbe nge kushatha,
shango ipululudze nge kushatha,
matombo naiwo ngaamilidze mahwi ambe.
Ngoti Yahwe banyaladza bathu babo,
kakale banowohwila ngoni bathu babo banodziyila.
14 Koga Ziyoni yakati, “Yahwe bakandifupatila,
She wangu wakandikangang'wa.”
15 “Apa mme bangakangang'wa mwana wabo wabanomwisa kene,
bangasahwila ngoni mwana we tjibumbilo tjabo kene?
Ee, kene mme bangakangang'wa mwana wabo zwabo,
imi andingamukangang'we!
16 Bonani, ndakamukwala mukati kwe zwiazha zwangu,
makuma enyu amu mesho angu tjibaka tjose.
17 Bakololo babo baswika ngolibilidza,
ngono ibabo bakakuthukudza banobhuda pa kuli.
18 Milidza mesho awo ulinge kukupoteleka ubone,
banokubungana bana babo banozha ku kuli.
Nge malebeswa se nditjila, koleba Yahwe,
banowonga maseka ku kuli
awakaambala kuzwinakisa,
kube kufanana ne nlongo akaambala maseka anon'nakisa.
19 “Malebeswa shango iyo izhele matongo yakathukudzika yakashakala,
ngwenu inowobe tukununu,
inowozhala bagali bayo bakamanikana,
ibabo bakabe bakukolomodza banobe bali kulekule.
20 Bana bakazwagwa mu tjibaka tje kutapiwa kuko
banowolebeleka uhwa beti,
‘Ntuthu iwoyu ntukunusa patili,
muutalabudze tiwane patingagala.’
21 Ngono ipapo mu moyo uwo unowoti,
‘Ndiani wakandizwalila bana ibaba?
Ndakabe ndabulayigwa bana kakale ndisitjina mbeleko,
ndakabe ndatatiwa ndalambiwa,
ngono ibaba bana bakadwa ngayi?’ ”
22 She Yahwe banolebeleka bakati,
“Bonani tjinyolotjo ndowomilidza luboko gwangu aweba zwitjaba,
ndowomilidzila njudzi dze bathu tjilakidzo tjangu,
ngono banowozhisa bakololo benyu bakabafukata,
bakololokadzi benyu banobazhisa bakabapika mu mathudzi abo.
23 Bomambo banowobe botate benyu banomulela,
bafumakadzi babo bakabe bomme benyu banomumwisa.
Banowothigama mbeli kwenyu bakakotamisa misholo
bebe benazwa hwuluba imu makumbo enyu.
Ipapo mowoziba kuti ndimi Yahwe,
ibabo banogalabgwe mundili abatobhakhwa nge shoni.”
24 Apa ungatolela mbhayani wakasima thundu yaatapa kene?
Batapiwa bangatjidziwa mu ntapi unotjisa kene?
25 Koga Yahwe banolebeleka bakati,
“Ee, bakatapiwa banowotogwa mu babhayani bakasima,
ne thundu yatapiwa inowotogwa mu ntapi unotjisa,
ngoti imi ndowobhayana ne unobhayana namwi,
ngono bana benyu ndowobatjidza.
26 Ndowothama kuti badziyidzi benyu baje nyama ye mibili yabo,
banowolaladzisiwa nge malopa abo se nkumbi we zhambi.
Ipapo bathu bose banowoziba kuti ndimi Yahwe Ntjidzi wenyu,
Ndzutunuli wenyu, iye Wakasima wa Jakubo.”
© Kalanga Bible © Bible Society of Botswana, 2008, 2018.