Bathu bali 144 000 be Iziraela
1 Shule kwa ikoku, ndakabona batumwa be kudzimu bali banna bali mile ku mbizho nna dze shango, bedzibila phepo kuti isitutudze mu shango kene mu gungwa kene kuzunguza nti ne ng'ompela wose. 2 Ipapo abona ntumwa mmwe we kudzimu edwa ku bhezhuba akabhata lutjwayo gwe Ndzimu unotjila, edana nge hwi lipezhugwi, edana batumwa be kudzimu banna bakapiwa simba nge Ndzimu kutjinya shango ne gungwa. 3 Ntumwa iwoyo we kudzimu wakalebeleka eti, “Musitongo kolomola shango, kene gungwa kene miti kuswikila tatjwaya balanda be Ndzimu wedu mu phazha dzabo.” 4 Ngono ndakahwa kuti mbalo ye bathu bakatjwayiwa yakabe ili 144 000. Bakabe bedwa mu njudzi dzili gumi lina mbili dze Iziraela, 5 zwiwulu zwili gumi lina zwibili (12 000) zwidwa mu ludzi gwa Juda, zwili (12 000) muna gwa Rubheni, zwili (12 000) zwidwa muna gwa Gadi; 6 zwiwulu zwili gumi lina zwibili (12 000) zwidwa mu ludzi gwa Asheri, zwili (12 000) muna gwa Nafutali, zwili (12 000) muna gwa Manase; 7 zwiwulu zwili gumi lina zwibili (12 000) mu ludzi gwa Simiyoni, zwili (12 000) muna gwa Levi, zwili (12 000) muna gwa Isakari; 8 zwiwulu zwili gumi lina zwibili (12 000) mu ludzi gwa Zebhuloni, zwili (12 000) mu ludzi gwa Josefa ne zwili (12 000) muna gwa Bhenjamini.
Mbunga we bathu nkulu
9 Shule kwa ikoku ndakalinga, ngono abona mbunga we bathu nkulu, kwakabe kusina ungabala bathu bose ibaba bakabe bedwa mu itjaba tjimwe ne tjimwe ne mu njudzi dzose ne mu bathu bose ne mu ndimi dzose bali mile mbeli kwe tjigalo tje bushe na mbeli kwe Pkhwizana, bakaambala hazu tjena ndefu dzinoma ku zwinyala bakabhata thabi dze milala mu maboko abo.
10 Bakalebeleka nge hwi lipezhugwi beti, “Jidzo lodwa ku Ndzimu wedu ugele mu tjigalo tje bushe ne ku Pkhwizana.” 11 Batumwa be kudzimu bose bakama bakakombeledza tjigalo tje bushe belonga mukati bakulu ne zwibumbiwa zwinotjila zwinna. Bakawila pasi ne njiso dzabo mbeli kwe tjigalo tje bushe be namata Ndzimu 12 beti, “Ngakujalo! Ndumbidzo ne gudzo ne butjenjedu ne mboko ne gudzo ne bushe ne masimba kube kwe Ndzimu nge kusingapele kose! Ngakujalo.”
13 Ndizo mmwe we bakulu wakandibhuzwa kati, “Ndiboani bathu ibaba bakaambala hazu tjena, banodwa ngayi?”
14 Ashandula nditi, “Ndimwi mungaziba she wangu.”
Kati kundili, “Ibaba ndibo bakadwa mu ndiko hwulu kwazo; bakasuka hazu dzabo mu malopa e Pkhwizana dzikabe tjena. 15 Ndizo bali mile mbeli kwe tjigalo tje bushe gwe Ndzimu, bewunamata siku ne sikati mu Ng'umba yawo. Ndizo iwo ugele mu tjigalo tje bushe unowobabakilila nge kube yapo kwawo. 16 Abatjawotongo bhakhwa nge zhala kene nge nyota kakale; zhuba alitowotongo tjabapisa kene kuli phepo inopisa. 17 Pkhwizana iyo pakati kwe tjigalo tje bushe inowobe nlisi wabo kakale inowobatungamilila ku misenya ye vula inopa butjilo. Ngono Ndzimu unowobukusha nshodzi mmwe ne mmwe mu mesho abo.”
© Kalanga Bible © Bible Society of Botswana, 2008, 2018.