Yahwe bana ndebo ne Iziraela
1 Ihwani tjinoleba Yahwe,
“Milika ubige ndebo iyo mbeli kwe matombo,
uletje matuthu ahwe hwi lilo.
2 Ihwani ndebo ya Yahwe imwi matombo,
imwi thiwa dze shango dzigelile tjose.
Ngoti Yahwe bana ndebo ne bathu babo,
banowoseka ne Iziraela.
3 Imwi bathu bangu kanti ndathamani kumuli?
Ndamudziyidza ngeni kene? Mundidabile.
4 Ngoti ndakamudusa mu shango ye Egipiti,
amusunungula mu shango ye bulanda.
Ndakatuma Mushe kumutungamila
na Aroni na Miriyamu.
5 Bathu bangu, kumbulani
Bhalaki mambo we Moabu tjaakakumbuludza kuti tjishingwe
nenge kuti Bhalamu nkololo wa Bheori wakashandula eitini.
Kumbulani gwendo gwenyu kudwa ku Shitimu kuyenda ku Giligala,
kuyita kuti muzibe mishingo ye ndulamo ya Yahwe.”
Tjinoshakwa ndi Yahwe
6 Ndowozha ndakabhatani mbeli kwa Yahwe
ndithigama mbeli kwe Ndzimu upezhugwi kwakose?
Apa ndizhe mbeli kwabo ne zwibhayilo zwinopisiwa kene?
Ndizhe ne phulu dzina gole ling'ompela kene?
7 Apa Yahwe banowoshathisiwa nge nyundo dzili zwiwulu
nenge njizi dze mafuta dzili zwiwulu zwili gumi kene?
Apa ndiduse mbano yangu tjibhayilo tje jinyo langu kene,
ntjelo we mbili wangu ndiwudusila tjibi tjangu kene?
8 Bakakulakidza iwe nthu kuti tjakalulwama nditjipi,
ne tjinoshakwa ndi Yahwe mu kuli.
Banoshaka kuti ushinge tjakatambunuka ude ngoni
ne kutjila nge kuzwiyisa pasi nge Ndzimu uwo.
Nlandu we Iziraela ne shamu yawo
9 Hwi la Yahwe lodana nzi nkulu,
kutja zina lenyu ndigo butjenjedu
“Ihwani imwi ludzi ne gubungano!
10 Apa ndingakangang'wa kene iwe ng'umba ye mbipo,
ndingakangang'wa fumwa yakawang'wa nge bubi
ne tjilizanyo tjitukununu tjina bhiso kene?
11 Apa ndingaletjedza nthu una tjiyelo tjisiitjo,
una hwomo inotjebela kene?
12 Bafumi babe banotolela nge simba
bathu babe banyepi
ndimi dzabo dzoleba kutjebela.
13 Ndizo wali ndatangisa kumubulaya,
kumuthukudza ngekwe zwibi zwenyu.
14 Mowoja koga amutowoguta,
mitumbu yenyu inowobe isina tjimwe zwayo.
Mowokubunganya koga akuna tjamungabiganya,
ngoti tjamunobiganya ndowotjipa thumo.
15 Mowodzwala koga amutowovuna,
mowothama mafuta koga mukasiazhole,
mowoswina zhambi koga mukasing'we nkumbi wadzo.
16 Makalondolodza milayo ya Omiri
ne zwiyito zose zwe nsha wa Ahabu
ngono mukatobela zwilenje zwabo.
Ndizo wali ndowomuletjedza mukathukudzika,
ne bathu benyu banowolengudzika,
mowobhabhana ne kudada kwe njudzi.”
© Kalanga Bible © Bible Society of Botswana, 2008, 2018.