Kunamata midzimu kolambika
1 Ipapo kukazha sholotjena dze Iziraela kundili dzikagala mbeli kwangu. 2 Ngono ipapo dama la Yahwe likazha kundili liti, 3 “Nkololo we nthu, ibaba balume bakalonga midzimu ye zwifano mu moyo yabo, matjinyo abo bakaabiga mbeli kwabo se zwitsha zwinokutha. Apa ndibaamutjile ha bezha bekumbila ikumbuludzo mu ndili kene? 4 Ndizo wali lebeleka nabo ubadwe uti, ‘She Yahwe bakati, Ha mmwe we Baiziraela elonga midzimu ye zwifano mu moyo ebiga mbeli kukwe matjinyo awe se tjitsha tjinokutha ngono ebe eyenda ku nlebesambeli, Imi Yahwe ndowon'dabila kuyendidzana ne midzimu iye minjinji. 5 Ndowothama ikoku kuti nditape moyo ye Baiziraela bakandisiya beyenda ku midzimu.
6 “Ndizo wali idwa bathu be Iziraela uti, ‘Tjinoleba She Yahwe ndietji, shandukilani matjinyo enyu mufupatile midzimu yenyu, fupatilani mishingo yenyu inoshimisa. 7 Ngoti ha mmwe we Baiziraela kene mmwe we bataya bagele mu Iziraela ezwithubukanya nami ebe elonga midzimu ye zwifano mu moyo uwe ebe ebiga matjinyo awe mbeli kukwe se tjitsha tjinokutha ngono ebe eyenda ku nlebesambeli kukumbila ikumbuludzo mu ndili, imi Yahwe ndimi ndinowon'dabila nge kwangu. 8 Ndowobhayana ne nthu iwoyo wakajalo ngono anthama tjilakidzo ne tjiyeye. Ndowonthubula mu bathu bangu. Ipapo mowoziba kuti ndimi Yahwe. 9 Ha nlebesambeli atjengedzeka kalebesambeli, imi Yahwe ndimi ndinobe ndatjengela nlebesambeli ihwoyo ngono ndowontambunudzila luboko gwangu ambulaya, pakati kwe bathu bangu Baiziraela. 10 Ngono banowosengana ne shamu yabo, shamu ye nlebesambeli ne shamu ye wazha ewokumbila ikumbuludzo dzowofanana. 11 Kudwa ipapo bathu be Iziraela abatjowolashika bakadwa pandili, kene kuzwitemapadza kakale nge zwibi zwabo zose. Banowobe bathu bangu nami abe Ndzimu wabo. Koleba She Yahwe.’ ” Kusumikilisiwa akuna ungakuleya.
Nuwa na Daniele na Jobe
12 Dama la Yahwe likazha kundili liti,
13 “Nkololo we nthu, ha shango itjinya nge kusagalikabgwe ndibe ndibhayana nayo nge kutapudza zojiwa zwayo ndizhisa bhamba muili kubulaya bathu bayo ne phuka dzabo, 14 nenguba ibaba balume batatu, Nuwa na Daniyele na Jobe bakabe bali muili, babe bangazwitjidza ibo koga nge ndulamo yabo. Koleba She Yahwe.
15 “Ha ndingatumila phuka dze shango mu shango kuithukudza, kube kusina ungaipalama ngekwe phuka idzedzo, 16 nenguba balume ibaba batatu bangabe bali muili, anditjatjila, koleba She Yahwe, babe basingake bakatjidza bakololo babo kene bakololokadzi babo, ibo koga ndibo babe bangatjidziwa koga shango iyo yathukudziwa. 17 Kene ndingazhisa thumo mu shango ndibe nditi, Thumo ngalipalame shango libulaye bathu bose ne phuka dzabo muili, 18 kene zwako balume ibaba batatu bali muili, nge malebeswa anditjatjila, koleba She Yahwe babe basingake bakatjidza bakololo babo kene bakololokadzi babo, koga ibo boga babe bangatjidziwa.
19 “Kene ha ndingatumila bugwele mu shango iyeyo nge bushongola gwangu kube kutebuka malopa gubulaya bathu bayo ne phuka dzabo, malebeswa se nditjila, 20 nenguba Nuwa na Daniele na Jobe bangabe bali muili, koleba She Yahwe, babe basingake bakatjidza nkololo kene nkololokadzi. Babe bangazwitjidza ibo koga nge ndulamo yabo.
21 “Nge kuti tjinoleba She Yahwe ndietji, Kowoshingikala tjakabipa kungapani ha nditumila ku Jerusalema shamu dzangu nna dzinotjisa edzi, thumo ne bhamba ne phuka dze shango ne bugwele kulilita bathu bayo ne phuka dzabo! 22 Koga kowobe ne batjila, bakololo ne bakololokadzi banowobhuda muuli. Banowozha kumuli ngono mowoti mubona mazwiibhato abo ne mija yabo, mowonyaladzika mu tjiga tjandakazhisa mu Jerusalema, mu tjiga tjimwe ne tjimwe tjandakazhisa muili. 23 Mowonyaladzika ha mubona mazwiibhato abo ne mija yabo ngoti mowoziba kuti akuna tjandakashinga muili kusina tjathama kuti nditjishinge. Koleba She Yahwe.”
© Kalanga Bible © Bible Society of Botswana, 2008, 2018.